Read lubukusu 2 Bakor. 12 Bible Online

2 Bakor. 12 - lubukusu bible

2 Bakor. 12

¹Ndebonia akhaba ne khanyoolamo sisiindu siosi siosi tawe, ne luno ndakachula khulwe kamalola ne lifuunulwa nilio naelesibwa no Mwami.

²Manyile omukristo nabulebe owayuulwa ayilwa mwikulu lie khataru, kimiiko kiabirire ekhumi na kine. (Se manya kano ng'ali ne kakholekha, namwe naba ne kamalola busa tawe, Wele yeng'ene niye omanyile.)

³Ne, manyile ndi omundu yuno ayuulwa ayilwa mu Paratiso. (Lundi se manya ng'ali kano ne kakholekha namwe ne kaaba kamalola busa tawe, Wele yeng'ene niye omanyile.)

⁴Ne ebweeneyo aulila bibiindu bikhaboolekha tawe, bibiindu nibio kiminwa kio mundu kikhanyala kialomaloma tawe.

⁵Nono ndeboneselia khu mundu yuno, ne se ndebonia khulwa samwene tawe, ne kakhali khu biindu bibiokesia nga ese ne ndi omutekhele.

⁶Abanga nenya khukhwebonia andi se mbeele omusilu tawe, sikila aba ndikho ndoma bung'ali. Ne kakhali se ndebonia tawe, sikila se nenya omundu yesi yesi anjibaasilie kamakali khukhila niko amboone ne khola, nende niko auliile ese ne ndoma tawe.

⁷Ne kakhali khu khuukhingila ese khebonia lukali sikila lifuunulwa likali lie khuukia nilio nabona tawe, naelesibwa buchuuni mu mubili mwase nga liiwa buuli omurumwa owa Sietani khu khukhupa ne khu khuukhiingilila ese khakhola ndio nebonia tawe.

⁸Nasaba Omwami kamakhabi kataru, nemureeba ndi andusiemo sisiindu sino.

⁹Ne kakhali aangobosia ali, “Kumwalaalo kwase kukhunyala sikila bunyali bwase bubonekha lukali po mu butekhele bwowo.” Nono ese ndi omusangaafu lukali khukhweboneselia khu butekhele bwase, nio bunyali bwa Kristo bumenye mwise.

¹⁰Nanyalikha ne butekhele, bukhomo, buandalafu, kiminaanio, ne butinyu khulwa Kristo. Sikila ne ndi omutekhele aba ndi ne kamaani.

¹¹Ndikho khola nga omusilu, ne enywe ninywe mukilile. Enywe ninywe mukhoya mwekesie mwafukiliile ese. Sikila akhaba ne khali siindu tawe, se ndikho omukeekhe mu ngila yosi yosi khu “Barumwa bakhoongo” benywe abo tawe.

¹²Kamayia kamakali ne kamakhuwa ke khuukia, ne bikholwa bie kamaani bibiekesia bili ese ndi omurumwa, biekholekha akari wenywe ne liliifwiilisia likali.

¹³Siina nisio namwimana mala nakholela chikanisa chichiindi? Ne kakhali se namunaania enywe mu khu musaba buyeeti bwe chirupia tawe? Ne musiima mumbeele khulwe khumwimana enywe bung'ali obwo!

¹⁴Luno nerekeekhe khumukeniia lukhola khataru, mala se ndenya mumbelesie siosi siosi tawe. Enywe nibo nenya, se chili chirupia chenywe tawe. Babaana se bakhoya babe nibo barusilia basaasi babwe tawe, ne kakhali basaasi nibo bakhoya barusilia babaana babwe.

¹⁵Ndaba omusangaafu khurumikhira bioosi nibio ndi nabio, lundi akhaba samwene nderusia nio muyeete enywe. Munyala mwasiima ese akeekhe sikila ese namusiima enywe lukali ku?

¹⁶Khwako mufukiilila muli ese se namuluyiakho enywe tawe. Ne kakhali omundu okundi anyala aaloma ali, naba omukesikesi, mala namureka enywe ne bubeeyi.

¹⁷Ese namunyoolakho enywe bukhala ndiena khubirira khu yesi yesi khu nibo naruma khwinywe?

¹⁸Nekoonjelela Tito ache, mala namuruma niye ne wandaayefwe omukristo okundi. Munyala mwaloma muli Tito anyoolela khwinywe bukhala ku? Niye nase se khukholanga ne lilienya ne liba lifwaanane lundi mu ngila ndala?

¹⁹Wakana mwibaasia muli mu kano koosi efwe khukhakanga khukhwebabila ebweeni wenywe. Se kali kario tawe! Khulomaloma nga Kristo ne enya khulomalome ebweeni wa Wele, ne buli siindu nisio khukhola bakoosi, khukhola khumuyeeta enywe.

²⁰Ese ndi ne buuri ndi nga ndiola ebweeneyo ndi munyoola enywe ne mwakaluukhana mwaba lukano lundi busa khuloondekhana nga nenya mube, nanywe mukhabone sesi ne ndi lukano lundi busa khuloondekhana nga ne mwenya mbe. Ndi ne buuri ndi khanyoole bulomani ne likhalikhililwa, kurima ne khukhweyenyela, bukhomo ne kamakuto, ekibonio ne likoyaana.

²¹Ndi ne buuri ndi siise sisiindi ne niicha Wele wase alimbambia chisoni ebweeni wenywe, mala khalile khulwe bakali babakhola bubwoni mu ndaalo chibirire, mala bakhekanila bibiindu biabwe bie sifwaabi nibio bakhola tawe, liliekoomba liabwe ne bubwoni bwabwe bwe bueeyi.