Read lubukusu 2 Bakor. 13 Bible Online

2 Bakor. 13 - lubukusu bible

2 Bakor. 13

¹ Luno lukhola khataru ese khumukeniia enywe. Lisitakana liosi liosi khukhwola liekesibwe ne baloli babili namwe bataru nga liiandiko ne liboolanga.

²Nenya khuboolela balala khwinywe babakhola bubwoni mu ndaalo chichabirire, ne babaandi boosi. Nalilomakho khale nga namukeniia enywe lukhola khabili, ne luno nga ne ndi aleeyi ndaliloma lundi. Ne ndiicha lwanyuma, se aliio okhekobe siiukuumo tawe.

³Mukhanyoole bung'ali nibwo mwenya nio mubone muli Kristo alomalomelanga mwise. Khwinywe Kristo se ali omutekhele tawe, ekesianga bunyali bwewe, mwinywe.

⁴Akhaba mu butekhele ne abaambwa khu musalaba, amenyanga sikila bunyali bwa Wele. Mu bulala naye akhaba efwe fweesi khuli batekhele; ne mu buambaani bwefwe ne nanywe khulasaanga mu bunyali bwa Wele mu bulamu bwewe.

⁵Khe mwire khu likela mala mwikhalakile nio mwimanye ne mwamenya mu lisuubila namwe tawe. Ng'ali se mumanyile muli Yesu Kristo ali mwinywe tawe ku? Ngeba mwaba ne mwakwila elala.

⁶Suubila ndi mulamanya muli efwe se khuli babakhilwa tawe.

⁷Khusaba Wele khuli mukhakhola kamabi tawe, se kali bali nio khwekesie khuli khwabira tawe, ne kakhali nio enywe mwole khukhola liili liluungi, akhaba wakana ne khubonekha nga babakhilwa.

⁸Sikila se khunyala khwakhola sisiindu siosi siosi khulwe khulekeelesia bung'ali tawe. Khukhola sie bung'ali bwong'ene.

⁹Khusangaala ne khuli batekhele ne kakhali enywe muli be kamaani. Mala khusaba khuli mwesi mube babechufu.

¹⁰Sino nisio sikila ne mbandika lino ne ndi aleeyi khukhwama niio muli, mbandika lino nio ne khoole ebweeneyo khakhola ndio narumikhira bunyali nibwo Omwami aambelesia khumubiiya enywe mu bukhalafu tawe, bunyali buno buli bwe khu mwombakha enywe, ne se buli bwe khumusambuula tawe.

¹¹Nono, bawandaayase, muliindwa! Khaka kamaani mube babechufu, rekeeresia liliekoonjelela liase; mwabeene fukiilisiana; menya mu muleembe. Mala Wele owe busiime ne kumuleembe alaba nanywe.

¹²Khesiana mu khwekwayilana nga wandaaye ne wandaaye.

¹³Batakatifu boosi bamukhesiisie. Kumwalaalo kwo Omwami Yesu Kristo ne busiime bwa Wele ne busaanganilo bwa Roho Omutakatifu bube nanywe mweesi.