Read lubukusu 2 Bakor. 2 Bible Online

2 Bakor. 2 - lubukusu bible

2 Bakor. 2

¹Nono nabisia mu mebaasio kase ndi se nicha emukhole mubelele lundi tawe.

²Sikila naaba ne mukhola enywe mubeelele, naanu aba olarama onyala aasangaasia ese ne bakhali babaandu nibo mbeelesie?

³Ako niko kakakila namuandikila enywe ebarwa eyo, se nenya niche ebweeneyo mala babaandu chana bakhoya basangaasie bakhole mbeelele tawe. Sikila suubila ndi nga ne sangaala aba mwesi musangaala.

⁴Namuandikiile ne kumwoyo kunaanisibwa lukali ne bubeeleli ne kamasika kamakali po, sifuno siase se siabeele khu mubeelesia enywe tawe, ne kakhali khumukhola enywe mumanye nga namusiima mwesi lukali.

⁵Nono omundu yesi yesi nabeelesiisie okundi, aba se ambeelesie ese tawe, ne kakhali mu ngila ndala aba amubeelesie enywe mweesi, (Ndoma kano sikila se nenya mbe omurafu khu niye lukali tawe).

⁶Omundu yuno anyoolile siiukuumo mu ngila yino khukhwama khu bakali khwinywe, mala kanyalile kario.

⁷Ne luno, mwenyekha mu mubeele mala mu mutinyilisie nio akhakhola ario abeelela lukali ne khutibisilia elala lilieyikina liewe tawe.

⁸Khwako ese musaba enywe mu mukhole niye amanye ali ng'ali mwamusiima.

⁹Namuandikila ebarwa eyo sikila nenya khumanya nga ne mwabira likela bulayi lundi nga mwirekekhanga buli lwosi khuria kamekisio kase.

¹⁰Ne mubeela omundu khu niko akholile akhaba sesi mubeela niye. Sikila ese ne mubeela aba ng'ali nenyekha khubeela sisiindu siosi siosi, khola ndi ebweeni wa Kristo sikila enywe

¹¹nio khiingilile Sietani akhakhuula efwe tawe, sikila khumanyile lirekekha liewe nga lili.

¹² Nga noola mu Turoa khukhwilwacha Elomo Endayi eya Kristo, nabona ndi Omwami ekuule engila khulwe kimilimo ebweeneyo.

¹³Ne kakhali naba ne khukhwiiembeelela khukali po, sikila se nanyoolayo wandaayefwe Tito tawe. Khwako, nakheesia babaandu be bweneyo, mala nabalekha nacha e Masedonia.

¹⁴Ese khupila Wele orio! Sikila buli lwosi akhurangiriranga mu bukhili mu Kristo. Lundi akhurumikhiranga efwe khusalanisia efuma eya Kristo buli abuundu nga kumuuya kwe bimuli biiunya bulayi.

¹⁵Sikila efwe khuli nga bupaani buunya bulayi burusibwe ne Kristo khu Wele; nibwo liliisi liabwo lifwelaanga akari waabo balikho ne baonisibwa ne naabo balikho ne batiba.

¹⁶Khwaabo balikho ne batiba bupaani buno buli bubolo bubwira, ne khwaabo balikho ne baonisibwa kuli kumuuya kumulayi kureeranga bulamu. Nono, naanu onyala khukhola kimilimo nga kino kiri?

¹⁷Se khuli nga babaandu babaandi bakali, baboorabooranga Elomo eya Wele nga bibiindu bikusibwa biikhali ne bukhala tawe. Ne kakhali sikila Wele aakhuruma efwe, khulomaloma mu bung'ali ebweeni wewe nga bakholi ba Kristo.