Read lubukusu 2 Bakor. 3 Bible Online

2 Bakor. 3 - lubukusu bible

2 Bakor. 3

¹Lino lilolekha nga efwe ne khulikho khwebonia lundi ku? Kanyala kaaba nga babaandu balala bakholanga, chibarwa chiboola khu bulayi bwefwe chenyibwa chireerwe khwinywe namwe chame khwinywe ku?

²Enywe mwabeene muli chibarwa nicho khuli nacho, chaandikwa khu miooyo kiefwe nio buli mundu amanye mala asome.

³ Limanyikhane lili Kristo omwene aandika ebarwa yino mala aakhuruma efwe khukireera. Se yaandikwa ne bubwino tawe, ne kakhali yaandikwa ne Roho owa Wele omenyile mindali, ne se yaandikwa khu mabaale ke kamalaka tawe, ne kakhali yaandikwa khu miooyo kie babaandu.

⁴Khuloma kano sikila khuli ne bunyindaafu mu Wele khubirira mu Kristo.

⁵Siindu siosi siosi se silikhoo mwifwe sikhuelesia efwe kumunwa khulome khuli khunyala khukhola kimilimo kino tawe. Bunyali nibwo khuli nabwo bwamanga khu Wele;

⁶ niye owakhunyalila efwe khurumikhwa khu Ndakaano Embia, ekhali eye lilaka liiandike tawe, ne kakhali eli eya Roho. Lilaka liiandike lireeranga lifwa, ne Roho aana bulamu.

⁷ Lilaka liabeechwa mu nyukuta khu bimesu bie libaale, ne luyali lwa Wele lwabonekha nga liaba ne lilikho liaanwa, akhaba khung'enang'ena khwe mumoni mwa Musa ne khwaba ne khulikho khufulafulana, khwaba ne kamaani lukali, babaandu ba Isiraeli se banyala bamuunguusa tawe. Lilaka liaba ne lireeranga lifwa ne lilikho likhola kimilimo, mala liecha ne luyali nga olwo lurio,

⁸aba luyali lwe kimilimo kia Roho luli lukali po!

⁹Chindaalo che likhalakilwa, chaba ne luyali; ne sikholwa sireeranga buonia nasio aba silaba ne luyali lukali po!

¹⁰Wakana khunyala khwaloma khuli, sikila luyali lung'enang'ena lukali luno, luyali lulwang'enang'ena khaale lwawao.

¹¹Sikila kaaba bali luyali lwaba mwako kakabao khu siise sikeekhe aba luyali luliio lukali po, mwako kaliio luno mindali na mindali!

¹²Khuli banyindaafu lukali sikila khuli ne lilieyikina lino.

¹³ Se khuli nga Musa tawe, owafwaranga lububi mumoni nio babaandu ba Isiraeli bakhabona khung'enang'ena ne khulikho khufulafulana ne khuwelelela tawe,

¹⁴ng'ali kamebaasio kabwe kaba kafuunikhwa, ne akhaba khukhwola endaalo yino kamebaasio kabwe kafuunikhwa ne lububi chana nga basoma bitabu bie Ndakaano Ekhale. Omundu arusibwa mu lububi olwo khubirira mu khuambaanisibwa ne Kristo khwong'ene.

¹⁵Akhaba luno, nga ne basoma Lilaka lia Musa, lububi lusibafuunikha kamebaasio kabwe.

¹⁶ Ne kakhali lububi lurusibwao omundu ne akobola khu Omwami.

¹⁷Nono Omwami niye Roho ne niio Roho owo Mwami ali, aba bulekhuule buliio.

¹⁸Khwako, efwe fweesi mumoni mwefwe musibuulwe mukhosianga luyali lwo Mwami, ne luyali olwo lulwene ne lulwene lwamanga khu Mwami oli Roho, lukhukaluukhasianga efwe khufwaanane naye khukhwama khu sikelo sie luyali silala khucha khu siindi.