Read lubukusu 2 Bakor. 4 Bible Online

2 Bakor. 4 - lubukusu bible

2 Bakor. 4

¹Wele khubirira mu siisa siewe akhuelesia efwe kimilimo kino khukhole. Khwako se khufwa kumwoyo tawe.

²Khura alubeka bikholwa bie mu bwikisi bie chisoni; se khukholela mu bubeeyi tawe, namwe se khukholela elomo eya Wele bubeeyi tawe. Ne kakhali khwekesia bung'ali mu khukhola bung'ali, khwako khwireera aasi we bukhalaki bwe kimiooyo kie babaandu ebweeni wa Wele.

³Sikila abanga bali Elomo Endayi niyo khwilwacha yakiswa, aba yakisiibwe khwaabo balikho ne batiba bong'ene.

⁴Se basuubila tawe, sikila wele khe sibala sino khaabi khekaliilila kamebaasio kabwe mu siilima. Khabekaliililanga nio bakhabona bali buwaanga bulikho bubakhosiakho tawe, buwaanga bwe Lomo Endayi eye luyali lwa Kristo oli busa bulayi bwene nga Wele.

⁵Sikila efwe se khweyilwacha fwabeene tawe, khwilwacha Yesu Kristo nga Omwami; ne efwe fwabeene nga bakholi benywe khulwa Yesu.

⁶ Wele owaloma ali, “Buwaanga bulakhosia ne buli mu siilima!” Ali Wele chana no mwene owakhola buwaanga bwewe bwakhosia mu miooyo kiefwe, khu khureerera efwe bukesi bwe luyali lwa Wele lukhosia ebweeni wa Kristo.

⁷Ne efwe khuli ne libiikhilo lia roho lino khuli nga chinyuungu chisala busa, nio khwekesie khuli bunyali bwoosi buli bwa Wele ne se buli khwifwe tawe.

⁸Buli lwosi khunyoola butinyu ne se khutibia lilieyikina tawe, biise bilala khuba mu liaayaaya, ne se khufwa kumwoyo tawe;

⁹basiku baliio bakali, ne se khutaamba omusaale tawe, ne akhaba biise bilala ne khuyaalwa lukali, se khubunisibwa tawe.

¹⁰Buli lwosi khusutanga lifwa lia Kristo mu mibili kiefwe nga babaandu busa, nio bulamu bwewe bwosi bwoole khubonekha mu mibili kiefwe.

¹¹Buli lwosi mu bulamu bwefwe bwoosi khuli mu butinyu bwe khufwa khulwa Yesu, nio bulamu bwewe bwolaane khubonekha mu mibili kiefwe nga babaandu busa kie khuwao kino.

¹²Lino liekesia lili lifwa lili khu milimo mwifwe, ne bulamu buli khu milimo mwinywe.

¹³ Liiandiko liboolanga lili, “Nalomaloma sikila nasuubila,” khubirira mu roho owe lisuubila mwenoyo, akhaba fwesi khulomaloma sikila khwasuubila.

¹⁴Khumanyile khuli Wele, owalamusia Omwami Yesu, akhakhulamusie efwe fwesi ne Yesu mala akhubukule akhuyile efwe alala ne nanywe ebweeni wewe.

¹⁵Kano koosi kali sikila enywe; ne nga kumwalaalo kwa Wele kuchiililila khukhwolela babaandu bakali balaana lisaba likali lie khu khuupa orio khulwe luyali lwa Wele.

¹⁶Khulwe sifuno sino, se khufwa kumwoyo tawe. Akhaba liiba liefwe lienje ne lilikho likora kalaa, liiba liefwe lia roho lilikho likholwa liya buli ndaalo.

¹⁷Ne butinyu butiiti bwe siise sitiiti nibwo khuli nabwo buno bulakhureera efwe mu luyali lukali lwa mindali lukhila butinyu.

¹⁸Sikila se khura kimiooyo kiefwe khu biindu bibonekha tawe, ne kakhali khura khu bikhabonekha tawe. Bibonekhana binyala biabonekha khu siise sitiiti, ne kakhali bikhabonekha tawe bimenyanga mindali na mindali.