Read lubukusu 2 Bakor. 5 Bible Online

2 Bakor. 5 - lubukusu bible

2 Bakor. 5

¹Sikila khumanyile khuli liiema nilio khumenyilemo khu sibala khuno ne lionaakwe, khuli ne nju eya mindali mwikulu khukhwama khu Wele enju ekhombakhwa ne kamakhono tawe.

²Ne luno khulila ne liliekoomba likali khuli khufware mungo mwefwe mumwichanga khukhwama mwikulu.

³Ne khumalile khukhwifwara se khukhabe sichula tawe.

⁴Ne khusimenya mu liiema lie khu sibala khuno, khuchuunisibwa ne kamebaasio ke khumiinikhwa, se kali bali khwenya khulekha kumubili kwefwe kwe khu sibala tawe, ne kakhali khwenya khufwaarwe kumubili kwe mwikulu, nio kwe khufwa kukaluukhasibwe ne bulamu.

⁵Wele niye owakhukholile khwerekekhera likaluukhana lino, mala aakhuelesia Roho wewe nga kumusiingo, kuli khu bioosi nibio aakhubikhila efwe.

⁶Nono buli lwosi khuli ne kumwoyo kwe khuandalala, khumanyile khuli ne khuli mu mibili kino, aba khuli aleeyi khukhwama khu Mwami.

⁷Sikila khukeenda khulwe lisuubila, ne seli khulwe khubona tawe.

⁸Khuli ne bunyindaafu, ne khwakharoboore khurura mungo mwefwe mu mubili mala khube engo no Mwami.

⁹Ne kakhali siindu siboofu lukali khukhila bioosi sili mbo, efwe khwenya khumusiimisia niye, khwakhaba mungo mwefwe ano namwe eyo.

¹⁰ Sikila fweesi khukhwola khwiche ebweeni wa Kristo, akhukhalakile. Buli mulala alinyoola kakenyekha anyoole khuloondekhana khu buli siindu nisio akholile mu bulamu bwe kumubili buno, silayi namwe siibi.

¹¹Sikila efwe khumanyile khuria Omwami nisio siina, khukhaka khuboolela babaandi beche. Wele akhumanyile efwe bulayi, mala neyikina ndi mu miooyo kienywe mumanyile ese sesi.

¹²Se khulakhakanga lundi khumuboolela enywe bulayi bwefwe fwabeene tawe, ne kakhali khulakhakanga khumuelesia enywe sifuno silayi sie khukhwebonia sikila efwe, nio munyale khukobosia abo babebonia sikila khubonekha khwenje khwe babaandu ne seli khulwe kimiima kiabwe tawe.

¹³Khwaaba ne khulaluukhe, aba khuli khurio khulwa Wele. Namwe ne khuli ne limanya lilayi, aba kali sikila enywe.

¹⁴Busiime bwa Kristo bukhurukanga efwe sikila khumanyile khuli niye aafwiila buli mundu, nono liekesia lili boosi basaanga mu lifwa liewe.

¹⁵Aafwiila boosi, nio abo bamenya, bakhamenya lundi sikila babeene tawe, ne kakhali bamenyele oyo yeng'ene owafwa, ne khulamusibwa sikila nibo.

¹⁶Khwako, efwe se khukhalakila omundu yesi yesi khulwe sikelo sio mundu tawe. Akhaba fweesi asiise silala ne khwakhalakila Kristo khulwe sikelo sio mundu, se khukhola khurio lundi tawe.

¹⁷Khwako, omundu yesi yesi ne ali mu Kristo, aba ali sibuumbe siya, kamakhale kabirire, kamaya kechile.

¹⁸Kano koosi kakholwa ne Wele, owakhukaluukhasia efwe khubirira mu Kristo, khukhwaba basiku khwekela basaale bewe, mala aakhuelesia efwe kimilimo kie khukhola babaandu boosi babe basaale bewe.

¹⁹Burume bwefwe buli buno, Wele aba alikho akhola babaandu boosi babe basaale bewe khubirira mu Kristo. Wele se aabalilila bubwoni bwabwe tawe, mala akhuelesie efwe burume bukhuboolela nga niye nabakholanga nibo khuba basaale bewe.

²⁰Nono, efwe khulomaloma mu bweyaangu bwa Kristo, bulayi bwene oli Wele omwene ne alikho ekoonjelela khubirira mwifwe. Khulwa Kristo khumwekoonjelela enywe, lekha Wele amukaluukhasie enywe mulekhe khuba basiku mube basaale bewe!

²¹Kristo se aaba ne bubwoni tawe, ne sikila efwe Wele amukhola niye asaange mu bwoni bwefwe mala mu buambaani naye khwole khusaanga mu buluungi bwa Wele.