Read lubukusu 2 Bakor. 6 Bible Online

2 Bakor. 6 - lubukusu bible

2 Bakor. 6

¹Nono mu milimo kiefwe alala ne Wele, khumusaba enywe mu mwanyoola kumwalaalo kwa Wele mukhakulekha kwasasikha busa tawe.

² Ulila niko Wele alomanga: “Nga siise siase sie khukhubabila ne siola nakhuulila; nga endaalo eye khu khuonia ne yola, nakhuyeeta.” Rekeeresia! Sino sili siise sie khubabilwa ne Wele; Luno eli endaalo eye khuonisibwa!

³Se khwenya omundu yesi yesi anyoole kamakhiikha mu milimo kiefwe tawe, khwako se khukhaka khura sikundula khu ngila yo mundu yesi yesi tawe.

⁴Ne kakhali, buli mu siindu siosi siosi nisio khukhola khwekesia khuli efwe khuli bakholi ba Wele khulwe khukhwifwiilisia ne khukhwikhaliilikha mu linaanisibwa, mu buandalafu, ne mu butinyu.

⁵ Khwakhupwa, khwabowa, ne khusangililwa; khwakhosibwa kimilimo lukali, khwareengecha ne khuonga enjala.

⁶Khulwe bukwalaafu bwefwe ne bukesi ne liliefwiilisia ne kimiooyo kimilayi khweyekesie fwabeene khuba bakholi ba Wele khulwa Roho Omutakatifu, khulwe busiime bwefwe bwa ng'ali,

⁷khulwe burume bwefwe bwe bung'ali ne bunyali bwa Wele. Khuli ne buluungi nga bulwaani bwefwe bwe khu khupanila ne khukhwitechela.

⁸Khuelesebwa lukoosi ne lundi khuchangalaasibwa, khukhomwa lundi khufumisibwa. Khwabukulwa khuba babeeyi, ne khane khulomaloma bung'ali;

⁹nga khukhamanyikhe tawe, ne khane khwamanyikha khu boosi, oli khukhwafwa ne kakhali khuli balamu nga mubona. Khwaba ne khuukuumwa, se khwirwa tawe;

¹⁰khwakhaba ne khubeelesibwa, khuli basangaafu buli lwosi; khubonekha khuba bataambi, ne kakhali khukhola bakali khuba baiinda, khubonekha nga khukhali ne sisiindu tawe, ne khane ng'ali khuli na buli siindu.

¹¹Basaale bakoosi muli mu Korinjo! Khwalomalome khwinywe abuwaanga, khwamwikulila kimiooyo kiefwe.

¹²Efwe se khwaloba khumusiima enywe tawe, enywe ninywe mumwaloba khu khusiima efwe.

¹³Luno ndomaloma busa oli enywe muli babaana base. Lekha kamebaasio kenywe khwifwe kabe nga niko efwe khuli nako khwinywe, yikula kimiooyo kienywe!

¹⁴Mukhaambaana ne babaandu bakhasuubila tawe, sikila se linyala liakholekha tawe. Buwaanga bunyala bwaambaana ne sisiilima ku?

¹⁵Kristo ne Sietani banyala bafukiilisiana ku? Omusuubili no mundu okhasuubila baambanila khu siina?

¹⁶ Lukaangu lwa Wele lunyala lwafukiilisiana ne bifwaani bie bakhamanyile Wele luriena? Sikila efwe khuli Lukaangu lwa Wele omenyile mindali! Nga Wele omwene ne aalomile ali, “Ndakhola mungo mwase mu baandu base mala mbamenyemo. Ese khabe Wele wabwe, ne nibo bakhabe babaandu base.”

¹⁷ Khwako Omwami aloma ali, “Khukhwola mubaruremo mala mubeyaulekho, mukhatiilakho sisiindu sili sinyaalu tawe mala ndamufukiilila enywe.

¹⁸ Wele Omunyali Owa Bioosi alomile ali, Ndaba Raraawenywe, ne nanywe mulaba babaana base basoleeli ne bakhaana.”