Read lubukusu 2 Bakor. 7 Bible Online

2 Bakor. 7 - lubukusu bible

2 Bakor. 7

¹Basaale base bakoosi sikila lisuubisia lino lioosi lili khwifwe, nono khekhwikwalaasie khukhwama khu buli siindu sinyaalutianga kumubili namwe kumwoyo, mala khubeele elala batakatifu khwole khumenya mu khuria Wele.

²Khe mukhwikulile bubweyaangu mu miooyo kienywe, se khwarumikhiirekho omundu yesi yesi khulwa fwabeene tawe.

³Se ndikho ndoma kano khumukhalakila enywe tawe, nga naloma khaale, enywe muli bakoosi lukali khwifwe, buli lwoosi khuli alala akhaba ne khumenya namwe ne khufwa.

⁴Ndi na suubi engali khwinywe, nebonia lukali sikila enywe! Mu butinyu bwefwe bwoosi, ese siili ne bunyindaafu, ndi ne liliekhoya likali po.

⁵ Akhaba enyuma we khukhwola mu Masedonia, se khwaolakho tawe. Khwaba buli abuundu, bulomani ne babaandu bwaba enje ne buuri nabwo bwaba mu miooyo kiefwe.

⁶Ne kakhali Wele, ochuubanga bafwiile kumwoyo, aakhuchuuba efwe khubirira mu khwicha khwa Tito.

⁷Se khwaba khukhwicha khwewe khwong'ene khukhwakhusangaasia efwe tawe ne kakhali buloli bwewe nga mwamuchuuba niye bwosi bwakhusangaasia. Aakhuboolela efwe nga enywe ne mwenya lukali khu khumbona ese, ne musaba khubeelwa khu niko mwakhola. Lundi amboolela nga nilwo mwerekekhera khu khusoola ese. Nono ese ndi omusangaafu lukali po.

⁸Sikila akhaba ebarwa yase ne yamubeelesia enywe ese se nisonia ndi nakiandika tawe (akhaba ne nisonia sikila mbona ndi ebarwa eyo yamubeelesia, akhaba ne yaba khu siise sitiiti).

⁹Nono luno ndi omusangaafu, ne se lili sikila namubeelesia enywe tawe, ne kakhali sikila bubeeleli obwo bwarumikhirwa ne Wele, khumukhola enywe mukaluukhane mu ngila chenywe. Nono se khwamunyaalakho enywe mu ngila yosi yosi tawe.

¹⁰Sikila bubeeleli burumikhirwa ne Wele bureraanga likaluukhana lie kumwoyo lireera buonia, ne mu lienelio khukhwesonia mbamo! Ne kakhali bubeeleli buli bwo mundu busa, busaasianga lifwa.

¹¹Lola niko Wele akholile khurumikhira bubeeleli bwenywe buno: bwamukholile muli ne sinani, lundi muli ne silukuluku sie khukhwekesia muli se muli ne bubi tawe, bwamukholile mwabeele ne lirima ne buuri. Bwakila mwenya sisiindu sikhoyela sikholekhe sikholebwe mwekesia mwabeene muli se muli ne kamakhiikha mu kano koosi tawe.

¹²Nono nakhaba ne naandika ebarwa eyo, se yaba sikila mulala owakhola kamabi namwe mulala owakholelwa kamabi tawe. Ne kakhali nakiandika khumwekesia enywe abuwaanga, mumoni cha Wele, nga sinani sienywe khwifwe ne sili sikali.

¹³Ako niko kakakhuraamo efwe kumwoyo. Se khuli khuchuubwa khwong'ene tawe; Tito akhusangaasia efwe lukali ne busangaafu bwewe nga enywe mwesi mwamusangaasia!

¹⁴Nebonia khu niye sikila enywe, ne enywe se mwambeelesie tawe. Buli lwosi khwalomalomanga bung'ali khwinywe, ne mu ngila eyo ne ng'ene ekibonio niyo nakholela Tito yechile khuba eya ng'ali.

¹⁵Nono busiime bwewe khwinywe butasikhanga buba bwe kamaani po, nga nakhebulila, nga enywe mwesi ne mwerekekha khuria kamekisio kewe, nga ne mwamwakaanila ne buuri bukali.

¹⁶Ndi omusangaafu lukali sikila nyala na mweyikina enywe!