Read lubukusu 2 Bakor. 8 Bible Online

2 Bakor. 8 - lubukusu bible

2 Bakor. 8

¹ Bawandaayefwe, khwenya mumanye nisio kumwalaalo kwa Wele kukholile mu chikanisa mu Masedonia.

²Babeele mu makhako lukali po ne linaanisibwa nilio babiriiremo; ne kakhaba kario ekhoyo yabwe yaba engali lukali. Sikila ekhoyo yino, baba baani lukali akhaba ne bali babanani.

³Nyala namusuubisia enywe ndi mu bulekhuule bwe kumwoyo baana bikali lukali nga baba banyala, lundi baana batumakho lilienyalila liabwe.

⁴Bakhusaba efwe ne khukhwekoonjelela khulwe bubweyaangu bwe khuyeeta babaandu ba Wele mu Buyuda.

⁵Bwaba buyeeti bukali khukhila nga ne khweyikina! Khunyoa beaana babeene khu Mwami, mala khulwe lilienya lia Wele beaana babeene akhaba khwifwe fwesi.

⁶Khwako khwatinyilisia Tito, owarakikha kimilimo kino, achiililile nakio mala amuyeete enywe mumale bukholi bwe busiime buno.

⁷Muli baiinda lukali mu bioosi nibio muli nabio: mu lisuubila, lilomaloma ne bukesi, mu silukuluku sienywe sie khuyeeta ne mu busiime bwenywe khwifwe. Nono khwenya mwesi mube baani mu bukholi bwe busiime buno.

⁸Se ndikho ndaao kamalaka kosi kosi tawe. Ne kakhali nga ndikho mwekesia nga babaandi ne bali ne silukuluku sie khuyeeta, nda khakanga khumanya nga busiime bwenywe ne buli.

⁹Enywe mumanyile kumwalaalo kwo Mwami wefwe Yesu Kristo; aaba omuiinda mala omwene ekhola omutaambi sikila enywe, nio amukhole enywe mube baiinda khulwe butaambi bwewe.

¹⁰Ese nibaasia ndi buli bulayi mumaliile luno kimilimo nikio mwarakikha kumwiiko kukwabirire. Enywe mwaba be khunyoa khukhwirusia khukhola lundi be khunyoa khukhola khwosi.

¹¹Nono chiililila mala mumaliile kimilimo chana! Ba ne silukuluku sie khukimaliila nga ne mwaba nasio mu khurekekha, mala kikhole khurumikhira nisio muli nasio luno.

¹²Mwaba ne muli ne silukuluku sie khuaana, Wele alafukiilila siianwa sienywe khuloondekhana nende khuaana nisio muli nasio, seli khuloondekhana nende nisio mukhali nasio tawe.

¹³Se ndakhakanga khuuluusia babaandi mu khu muluyia enywe tawe, ne kakhali sikila siise sino muli nabio bikali, buli bulayi enywe muyeete abo bakhali nabio tawe.

¹⁴Nanywe oli se muli nabio tawe, ne nibo bali nabio bikali, bakhamuyeete enywe, mu ngila yino mwembi mulakholelwa kamafwaanane.

¹⁵ Nga liiandiko liboolanga lili, “Omundu owabuusia bikali se aba nabio bikali lukali tawe, ne omundu owabuusia bikeekhe se biaboomba tawe.”

¹⁶Efwe khuupila Wele orio khulwe khukhola Tito abe ne silukuluku nga efwe ne khuli khumuyeeta enywe!

¹⁷Se kali busa bali aafukiilila nga ne khwamusaba tawe, yesi aba ne silukuluku sikali sie khuyeeta, mala khulwe bulekhuule bwewe omwene aakhalaka khukhwicha khwinywe.

¹⁸Alala ne naye khulikho khuruma wandaayefwe omurie lukali mu chikanisa choosi khulwe kimilimo kiewe mu khwilwacha Elomo Endayi.

¹⁹Ne alala ne nako aroborwa ne khuelesibwa kimilimo ne chikanisa khucha nafwe nga khukhola kimilimo kie busiime kino khulwe luyali lwo Mwami ne khwekesia khuli khwenya khuyeeta.

²⁰Khuli ne liloleelesia likali khukhakhola khurio khwenyosia liliilung'unya khulwe mu ngila niyo khubukulilamo siianwa sino tawe.

²¹ Sifuno siefwe sili khukhola lili liluungi ebweeni wo Mwami, nende ebweeni we babaandu.

²²Nono khulikho khuruma wandaayefwe alala ne nabo; khwamukhosia likela biise bikali mala khwanyoola khuli buli lwosi ali ne silukuluku sikali sie khuyeeta. Ne luno nga ali ne lisuubila likali mwinywe, ali ne silukuluku sikali sie khuyeeta.

²³Ne Tito naye ali omukholi owasiase mala akholanga alala nase khumuyeeta enywe; ne khulwe bawandaayefwe babaandi balikho ne becha naye, balikho becha mu bweyaangu bwe chikanisa lundi bareera luyali khu Kristo.

²⁴Bekesie busiime bwenywe, nio chikanisa choosi chibe na ng'ali khu busiime bwenywe mala bamanye bali efwe khuli ng'ali khukhwibonia sikila enywe.