Read lubukusu Bakal. 1 Bible Online

Bakal. 1 - lubukusu bible

Bakal. 1

¹Khukhwama khu Paulo, niye kumulaango kwe khuuba omurumwa kuukhaama khu mundu namwe khu maani ko mundu tawe, ne kakhali khukhwama khu Yesu Kristo ne Wele Paapa owamulamusia niye khukhwama mu lifwa.

²Bawandaayase boosi bali ano baambanile nase khuruma kimileembe khu kanisa cha Kalatia.

³Wele Paapa wefwe no Mwami Yesu Kristo akhoya amuelesie enywe kumwalaalo ne kumuleembe.

⁴Kristo eana omwene khulwe bubwoni bwefwe, mu khuloonda lilienya lia Wele lundi Paapa wefwe, nio akhusikule efwe khukhwama khu selukho emayaanu yino.

⁵Luyali lube khu Wele mindali na mindali! Amina.

⁶Enywe mumbukia! Mu siise sikeekhe busa mulikho mwanjukha oyo owamulaanga enywe khulwe kumwalaalo kwa Kristo, mala mulikho muloonda elomo ekiindi.

⁷Ng'ali, “Elomo Endayi” ekiindi se liio tawe, ne kakhali ese mboola ndio sikila babaandu balala baliio balikho bamunaania enywe, ne khukhaka khukaluukhasia Elomo Endayi eya Kristo.

⁸Ne kakhali khwakhaba efwe namwe malaika khukhwama mwikulu ne elwacha khwinywe elomo lukano luluundi khukhwama khu niyo khwamwilwachila, akhoya alaamwe!

⁹Khwalomakho khale, ne luno ndoma lundi, aaba bali yesi yesi amwilwachila elomo eli lukano luluundi khukhwama khu niyo mwafukiilila, akhoyeele alaamwe!

¹⁰Kano kalolekha nga ese olikho okhaka khufukiililwa ebweeni we babaandu busa ku? Ng'ali se kali kario tawe! Nilio nenya lili khufukiililwa ebweeni wa Wele! Namwe kalolekha nga ese olikho okhaka khukhwimanyisia khu baandu? Abanga ese ndikho khaka khukhola ndio, andi se ndi omukholi owa Kristo tawe.

¹¹Lekha muboolele enywe bawandaayase, ndi Elomo Endayi niyo nilwacha se yaama khu mundu busa tawe.

¹²Se nakinyoola khukhwama khu mundu tawe, namwe omundu yesi se anjikisia tawe. Yesu Kristo omwene niye owafunulila.

¹³ Mwaboolelwe ke limenya liase lie khaale, nga naba ne nerusilia elala khu dini eye Bayaudi. Napia ekanisa eya Wele siibi ne se nabakho ne siisa siosi siosi tawe, mala nakhola kamaani khu kionakaka.

¹⁴ Naba ebweeni we Bayaudi basiaase be selukho yase mu likhola liase lie dini eye Bayaudi, mala nerusia lukali khuloonda kimiima kie bakuuka befwe.

¹⁵ Ne kakhali Wele mu mwalaalo kwewe andobora ese ne khasaalwa tawe, anaanga mukholele niye. Nga ne abisia

¹⁶khukhumanyisia ese Omwana wewe, nio nolaane khukhwilwacha Elomo Endayi yewe khu Be Chikholo, se nacha khu mundu yesi khulwe khukaambilwa tawe,

¹⁷namwe se nacha Yerusalemu khubonana ne naabo ba baaba barumwa ebweeni wase tawe. Ne kakhali, nacha bwangu Ebuaraabu, mala lundi nakobola Damasika.

¹⁸ Kimiiko kitaru kiabira nio nacha Yerusalemu khunyoola kamakhuwa khukhwama khu Petero, mala namenya naye kamachuuma kabili.

¹⁹Se nabonakho omurumwa okundi tawe, nakhali Yakobo wandaaye owo Mwami yeng'ene.

²⁰Niko mbandika kali kang'ali. Wele amanyile ali se ndikho mbea tawe!

²¹Enyuma wa kano nacha mu ngoongo cha Siria ne Silisia.

²²Siise siene esio basaangi be chikanisa mu Buyuda baba bakhamanya ese bulayi tawe.

²³Baulilanga busa niko babaandi balomanga bali, “Omundu owakhupianga efwe siibi luno alikho elwacha lisuubila nilio akhakanga khukhwonaka!”

²⁴Khwako bafumia Wele sikila ese.