Read lubukusu Bakal. 2 Bible Online

Bakal. 2 - lubukusu bible

Bakal. 2

¹ Enyuma we kimiiko ekhumi na kine nakobola Yerusalemu ne Baranaba, nabukula Tito yesi nacha naye.

²Nacha sikila Wele afunulila ali khoyeele nje. Mu siikhasio sie mu bwikisi ne babemeelesi, nenoosia Elomo Endayi niyo nilwachanga khu Be Chikholo. Se nenya kimilimo kiase kia luno nende kie khaale kitaambe bukhala tawe.

³Owasiase Tito, akhaba ne aaba Omukiriki, se aayingililwa khukhebwa tawe,

⁴akhaba balala ne benya akhebwe. Mu khwikhola khuba basuubili basiefwe, babaandu bano bengila mu sipupu siefwe nga bayooti nio babone bulekhuule nibwo khuli nabwo khubirira mu bulala bwefwe ne Yesu Kristo. Benya khu khukhola efwe khube nasioobi,

⁵ne kakhali mu khuliinda bung'ali bwe Lomo Endayi sikila enywe, se khwafukiilila kakaabwe akhaba khu siise sitiiti tawe.

⁶ Ne kakhali abo bababonekha khuba babemeelesi, ndoma kano sikila se kekesiakho liliaukhana khwise baba nanu tawe. Wele sakhalakilanga khulwe liba lie enje tawe, ne ese ndoma ndi babemeelesi abo, se bamboolelakho ese kamebaasio kamakeni tawe.

⁷Ne kakhali, babona bali Wele aba ambelesia ese kimilimo kie khukhwilwacha Elomo Endayi khu Be Chikholo, nga aba ne aelesia Petero kimilimo kie khukhwilwacha Elomo Endayi khu Bayaudi.

⁸Sikila khubirira mu bunyali bwa Wele, nakholwa omurumwa khu be Chikholo, bulayi bwene nga Petero ne akholwa omurumwa khu Bayaudi.

⁹Yakobo, Petero ne Yoana, ba babonekha khuba babemeelesi, babona bali Wele aaba ambelesie ese kumulimo kuno, khwako bakheesia Baranaba nase, nga simanyisio mbo efwe fweesi khwaba basaangi alala. Khwafukiilisiana khuli Baranaba nase khukhole mu Be Chikholo ne nibo mu Bayaudi.

¹⁰Khu koosi niko bareeba kaba bali khukhoyeele khukhebulile bataambi mu sipupu siabwe, ne sino sili sisiindu nisio nabeelenge ne silukuluku khukhola.

¹¹Nga Petero ne echa Andioka, ese nemelekhana naye sikila abonekha abuwaanga ne ekhiikhile.

¹²Babaandu ba baaba ne barumirwe ne Yakobo ne bakhoola tawe, Petero alichanga alala ne bawandaayefwe Be Chikholo. Ne nga babaandu bano ne boola, enyokhao aloba khulia nende Be Chikholo abo. Sikila aria abo babenyanga khukhebwa khwe Be Chikholo.

¹³Bawandaayefwe babaandi be Siyuda boosi baba baari alala ne Petero; ne akhaba Baranaba yesi aba mu sikholwa siabwe sie buuri esio.

¹⁴Nga ne nabona ndi se balikho bakeenda mu ngila enuungi khuloondekhana ne bung'ali bwe Elomo Endayi tawe, naboolela Petero ebweeni wabwe boosi ndi, “Ewe oli Omuyaudi, ne mala wama khumenyanga nga owe Chikholo, se wabeele nga Omuyaudi tawe. Onyala oriena, nono, wakhaka khuyingiilila Be Chikholo bamenye nga Bayaudi?”

¹⁵Ng'ali, khuli Bayaudi mu khusaalwa, se khuli “Be Chikholo baali ne bubwoni” tawe, nga ne balaangwa.

¹⁶ Ne khumanyile khuli omundu aluungisibwanga ne Wele khubirira mu lisuubila mu Yesu Kristo liong'ene, seli khulwe khukhola niko lilaka lienya tawe. Akhaba fweesi khwasuubila mu Yesu Kristo nio khwaluungisibwe ne Wele khubirira mu lisuubila liefwe mu Kristo ne se kali mu khukhola busa niko lilaka lienya tawe.

¹⁷Ne khwaaba, ne khukhaka khuba baluungi khu Wele khulwe bulala bwefwe ne Kristo, khunyoolekhana khuba babooni, bulayi bwene nga Be Chikholo ne bali. Khwako aba lino liekesia lili Kristo alikho areera bubwoni ku? Khaba ta!

¹⁸Ne naaba ne ndakikha khukhwombakha niko nonakakanga, aba niyekesia khuba omundu ofunaka Lilaka.

¹⁹Khuloondekhana nga Lilaka ne lili, ese ndi omufu, neerwa ne Lilaka liliene nio nolaane khumenya khulwa Wele. Neerwa khubirira mu lifwa ne Kristo khu musalaba khwewe,

²⁰khwako se ndi ese lundi omenyanga tawe, ne kakhali ali Kristo omenyanga mwise. Limenya nilio menya luno, menya khulwe lisuubila liase mu Mwana owa Wele, owasiima ese, mala aafwiila.

²¹Ndoba khukhwikaana kumwalaalo kwa Wele! Ne kakhali aaba bali Wele aluungisia omundu khubirira mu Lilaka, aba liekesia lili Kristo afwa busa!