Read lubukusu Bakal. 3 Bible Online

Bakal. 3 - lubukusu bible

Bakal. 3

¹Enywe Bakalatia basilu! Naanu owamulokile enywe? Ebweeni wenywe, mwaboolelwa bulayi bwene khu lifwa lia Yesu Kristo khu musalaba!

²Mboolele ese siindu silala sino. Mwanyoola Roho owa Wele khulwe khukhola niko lilaka lienya namwe khulwe khuulila Elomo Endayi ne khukisuubila?

³Muli basilu muriena! Mwarakikha ne Roho owa Wele; ne luno mwenya khumala ne bunyali bwenywe mwabeene!

⁴Kakamubakho koosi kaaba ka busa? Ng'ali kekesia siindu!

⁵Wele amuelesia enywe Roho Omutakatifu ne khukhola kamayia mwinywe sikila mukhola niko Lilaka lienya, namwe sikila mwaulila Elomo Endayi ne khukisuubila?

⁶ Yibaasia limenya lia Aburahamu. Liiandiko liboola lili, “Asuubila Wele, ne sikila lisuubila liewe Wele amufukiilila niye nga omuluungi.”

⁷ Mukhoya mumanye, nono, muli lisaaye lia Aburahamu lia ng'ali bali babaandu be lisuubila.

⁸ Liiandiko liang'oola lili Wele alikhola Be Chikholo babe baluundi khu niye omwene khubirira mu lisuubila. Khwako liiandiko liaboolela Aburahamu Elomo Endayi lili, “Khubirira mwiwe Wele alabiita babaandu boosi chikhabi.”

⁹Aburahamu asuubila mala aabiitwa chikhabi; ne boosi ba basuubila babiitwa chikhabi nga niye.

¹⁰ Abo bamenya mu khuria Lilaka liong'ene bamenya mu silaamo. Sikila liiandiko liloma lili, “Yesi yesi okharichanga buli lwosi buli siindu sisiaandikwa mu sitabu sie Lilaka tawe, ali ne silaamo khukhwama khu Wele!”

¹¹ Luno kamanyikhaane kali yesi yesi saluungisibwa ne Wele khulwe Lilaka tawe, sikila liiandiko liloma lili, “Omundu okholwa ne Wele khuba omuluungi khubirira mu lisuubila alamenya.”

¹² Ne Lilaka se liiambaanakho ne lisuubila tawe. Ne kakhali, nga liiandiko ne liloma lili, “Yesi yesi okhola buli siindu nisio Lilaka lienya alamenya.”

¹³ Mu khuba silaamo khwifwe, Kristo akhusikula efwe khukhwama khu silaamo nisio Lilaka lireranga; sikila liiandiko liloma lili, “Yesi yesi osuungwa khu murongooro ali ne silaamo khukhwama khu Wele.”

¹⁴Kristo akhola kano nio chikhabi nicho Wele asuubisia khu Aburahamu chiaanwe khu Be Chikholo khubirira mu Kristo Yesu, nio khubirira mu lisuubila khwole khunyoola Roho niye Wele asuubisia khuruma.

¹⁵Bawandaayase enywe, ndikho nja khurumikhira silolelo sia buli ndaalo. Babaandu babili ne bafukiilisiana khwikhuwa mala baandikisiana, se aliio onyala alifunaka namwe atasakho siindu tawe.

¹⁶ Nono, Wele asuubisia Aburahamu nende owe lisaaye liewe. Liiandiko se lirumikhira mu bukali lili, “Be lisaaye,” tawe, ne kakhali lili mu bulala lili, “Oyo owe lisaaye liewe,” khukhwekesia khuli ali omundu mulala yeng'ene, olaangwa Kristo.

¹⁷ Nilio ndikho ndoma lili liri, Wele aakhola endakaano ne Aburahamu mala aasuubisia khukikhola. Lilaka liliaanwa enyuma we kimiiko chimia chine ne kamakhumi kataru se linyala liafunaka endakaano eyo ne khurusiao lisuubisia lia Wele tawe.

¹⁸ Kaaba bali siianwa sia Wele siamanana ne Lilaka, aba se siamanana ne lisuubisia lia Wele tawe. Kakhaba kario, khulwe lisuubisia liewe, Wele aelesia Aburahamu siianwa.

¹⁹Nono, sifuno sie Lilaka siaba siina? Lilaka liatasibwakho khukhwekesia kamakhiikha nisio siina. Ne Lilaka lieenyekha khubao khukhwola nga owe lisaaye lia Aburahamu ne echa sikila ali niye owasuubisibwa. Lilaka liaanwa ne bamalaika, liechela khu mundu owaba akari we babaandu ne Wele.

²⁰Nono omundu owe akari oyo ekesia ali babaandu babaandi baliio bakali. Ne kakhali Wele ali mulala.

²¹Kano kekekesia kali Lilaka se lienya lisuubisia lia Wele tawe ku? Se kali kario tawe! Sikila abanga omundu anyoola Lilaka lireera bulamu, andi buli mundu aluungisibwa ne Wele khulwe khuliloonda.

²²Ne kakhali liiandiko liloma lili sibala sioosi sili mu bunyali bwe bubwoni; khwako siianwa sisiasuubisibwa khulwe lisuubila mu Yesu Kristo siaelesibwa khwaabo babasuubila.

²³Ne kakhali siise sie lisuubila ne sikhoola tawe, Lilaka lia khwikaliilila efwe fweesi nga baboe khukhwola nga lisuubila liliicha, ne limanyikha.

²⁴Khwako Lilaka lia khwimeelela efwe khukhwola nga Kristo ne echa, nio khukholwe baluungi khu Wele khubirira mu lisuubila.

²⁵Ne sikila siise sie lisuubila siliio, Lilaka se lilikho likhwimeelela efwe tawe.

²⁶Khubirira mu lisuubila mweesi muli babaana ba Wele mu buambaani ne Yesu Kristo.

²⁷Mwabatiisibwa mu buambaani ne Kristo, ne luno muli ne bulamu bwa Kristo omwene.

²⁸Khwako likabukhana se liliio akari we Bayaudi nende be Chikholo, nasioobi ne balekhuule, namwe akari we baseecha ne bakhasi tawe. Mweesi muli siindu silala mu buambaani ne Kristo Yesu.

²⁹ Ne mwaba ne muli ba Kristo, aba muli be lisaaye lia Aburahamu ne mulanyoola nisio Wele asuubisia khubaelesia enywe.