Read lubukusu Bakal. 4 Bible Online

Bakal. 4 - lubukusu bible

Bakal. 4

¹Niko ndikho mboola niko kano, omwana olinyoola kimiaandu kia raraawe kioosi akholwanga busa nga nasioobi nasiili mwana, akhaba mu bung'ali kimiiandu kioosi ne kili kikiewe.

²Nasiili mwana, baliio bamuliinda ne bamuyeeta mu bikholwa khukhwola siise nisio raraawe aarao.

³Mu ngila ng'ene eyo akhaba fwesi khwaba nasioobi be bisieeno bie mu sibala ne khukhakhula mwisuubila tawe.

⁴Ne kakhali nga siise sisienyekha ne siola, Wele aaruma Omwana wewe omuteelwa. Echa nga Omwana owo mukhasi, mala amenya aasi we Lilaka lie Bayaudi,

⁵ khusikula abo ba baaba aasi we Lilaka nio khube babaana ba Wele.

⁶Wele aruma Roho owo Mwana wewe mu miooyo kiefwe khukhwekesia ali muli babaana bewe, Roho olaanganga ali, “Paapa, Paapa wase.”

⁷Khwako se oli lundi nasioobi tawe, ne kakhali oli omwana owe mungo. Ne sikila oli omwana wewe, Wele alakhuelesia bioosi nibio ali nabio khulwe babaana bewe.

⁸Khaale mwaba se mwamanya Wele tawe, khwako mwaba nasioobi be bibiindu biikhali bia Wele tawe.

⁹Ne luno mumanyile Wele, namwe khe ndome ndi, luno Wele amumanyile enywe, kali kariena mwenya khukalukha lundi khu bisieeno bibiamiianga mu sibala? Siina enywe ne mwenya khuba nasioobi babio lundi?

¹⁰Mukholanga kimilukha kie chindaalo nabulebe, ne kimieesi, ne biise, ne kimiiko.

¹¹Neembeleele sikila enywe! Kanyala kaba bali kimilimo kiase khwinywe kioosi kiabele kia busa?

¹²Musaba enywe wandaayase, mube nga ese, sikila sesi nekhola khuba nga enywe, ne se mwakholelekho ese kamabi tawe.

¹³Mukhebulila sikila ne nelwacha Elomo Endayi khwinywe mu siise sie khunyoa; sikila naba ndwala.

¹⁴Ne kakhaba bali liba liase lie kumubili liaba likhako liboofu khwinywe, se mwanjikuta namwe mwandoba tawe. Ne kakhali, mwanjakaanila ese nga malaika khukhwama mwikulu; mwanjakaanila ese nga mumwakaanila Yesu Kristo.

¹⁵Mwaba basangaafu lukali! Siina sisiekholekha? Ese samwene nyala naloma ndi muba munyala, andi mwerusiamo chimoni chenywe mwambelesia ese.

¹⁶Ne luno nabeele omusiku wenywe khulwe khumuboolela bung'ali?

¹⁷Babaandu babaandi abo bekesia busiime bukali mwinywe, ne kakhali kamebaasio kabwe se kali kamalayi tawe. Niko benya busa kali khumurusia enywe khwise, nio mubenanekho nibo nga nibo boosi ne bamwinanaangakho.

¹⁸Buli bulayi khuba ne busiime bukali kaaba bali sifuno sili silayi, kano kali ka ng'ali buli lwoosi, ne se kali busa kario ese ne ndi nanywe tawe.

¹⁹Baana base bakoosi! Lundi, kali busa nga omukhasi oli siimbi khusala seesi ndi ne buchuuni burio khwinywe khukhwola nga liiba lia Kristo ne libao mwinywe.

²⁰Nikoomba ndi luno andi ndi nanywe, nio mbe ne lilibaasia liliindi khwinywe. Ese niiembeelela lukali khwinywe.

²¹Lekha ndeebe abo mwinywe babeenya khuba aasi we Lilaka ndi: Se mumanyile niko Lilaka liboola tawe?

²² Liboola lili Aburahamu aba ne babaana babili, mulala owo mukhasi nasioobi ne okundi owo mukhasi omubula.

²³Omwana wewe wo mukhasi nasioobi asaalwa nga baandu boosi, ne omwana wewe owo mukhasi omubula asaalwa enyuma we khulakiilisia khwa Wele.

²⁴Bibiindu bino binyala biabonekha nga sisiekesio, bakhasi babili abo bekesia Chindakaano chibili. Oyo owe babaana babasaalwa mu siboe ali

²⁵Haka, owima nga Sikulu sia Sinai Ebuaraabu, ali sifwaani sisiekesia lukoba lwa Yerusalemu lwa luno, luuli mu siboe ne babaandu balwo boosi

²⁶Ne kakhali Yerusalemu lwe mwikulu luli Lulekhuule, lundi luli maayi wefwe.

²⁷ Sikila liiandiko liloma lili, “Ewe omukhasi mukuumba, ba omusangaafu! Ewe okhabaakho mu buchuuni bwe khusaala tawe, yokela ne khukhwekhoya lukali! Sikila omukhasi owalekhwa aliba ne babaana bakali khukhila omukhasi niye omuseecha akhalekha tawe.”

²⁸Luno, enywe, bawandaayase, muli babaana ba Wele khulwe lisuubisia liewe, nga Isaaka ne aba.

²⁹ Siise esio omwana owasaalwa nga babaandu boosi aapia siibi owasaalwa khubirira mu Roho owa Wele; luno kali busa kario.

³⁰ Ne kakhali liiandiko liloma siina, “Oona omukhasi nasioobi no mwana wewe, sikila omwana owo mukhasi nasioobi se alaba ne kumukabwa khu miaandu kia raraawe alala no mwana owo mukhasi omubula tawe.”

³¹Khwako, wandaayase efwe se khuli babaana ba nasioobi tawe, ne kakhali khuli bo mukhasi omubula.