Read lubukusu Bakal. 5 Bible Online

Bakal. 5 - lubukusu bible

Bakal. 5

¹Khuli ne bulekhuule, Kristo aakhukholile khuba balekhuule! Yiima nono nga babaandu balekhuule ne mukhelekhuula khuba banasioobi lundi tawe.

²Rekeeresia! Ese, Paulo muboolela enywe ndi mwaba ne mwilekhuula mukhebwe, aba liekesia lili Kristo salikho owe bukhala khwinywe na atiiti ene tawe.

³Lundi Ese ngambila buli mundu yesi yesi owilekhuula akhebwe ndi aba nono enyekha khuria Lilaka lioosi.

⁴Abo khwinywe bakhaka khuba baluungi ebweeni wa Wele khulwe khuria Lilaka beyaule khukhwama khu Kristo. Aba muli enje we kumwalaalo kwa Wele.

⁵Ne khwifwe, lilieyikina liefwe lili liri, Wele akhakhuluungisie efwe khu mwene; ne kano kali niko khulindiililanga khulwe bunyali bwa Roho owa Wele okholaanga kimilimo khubirira mu lisuubila liefwe.

⁶Sikila efwe khuli mu buambaani ne Yesu Kristo, khukhebwa namwe khulekha khukhebwa se bili siindu tawe; lilienyekha lili lisuubila libeo khubirira mu busiime.

⁷Mwachiilililenge busa bulayi po! Naanu owamukhola enywe mwalekha khukhola bung'ali? Aamuombelesia enywe ariena?

⁸Se kakholwa ne Wele omulaanganga enywe tawe.

⁹ Balomanga bali, “Kali kamamela matiiti kakholanga sifu mu sipakhilo siyiimba,”

¹⁰ne kakhali ese ndi ne lilieyikina mwinywe. Limenya liefwe mu buambaani no Mwami likholanga ese ne mba ne lilieyikina ndi se mukhabe ne kamebaasio kakaandi tawe, ne omundu omubeelesia enywe, akhaba ne ali naanu, aliukuumwa ne Wele.

¹¹Ne kakhali khwise, enywe bawandaayase, naaba ne njiililila khukhwilwacha ndi sikhebo sikhoyeela sibeo, siina sikila ne bakhupia ese siibi? Ne kaba bali ako kaba kang'ali, aba lililwacha liase khuloondekhana ne kumusalaba kwa Kristo se liakhareerirekho butinyu tawe.

¹²Nikoomba ndi babaandu balamubeelesianga enywe andi bamalileyo elala, lekha bachiililile mala belate babeene!

¹³Ne kakhali, bawandaayase enywe, mwalaangwa khuba balekhuule. Ne mukhalekha bulekhuule buno khwaba nisio mwiambilakho nio mukhole khulwe lilienya lienywe lie kumubili tawe. Ne kakhali, lekha busiime bukile muyeetane.

¹⁴ Sikila Lilaka lioosi liaambaasibwa mu bwimbi lili mbo, “Siima owasio nga ne wesiima wamwene.”

¹⁵Ne mwaba ne bikholwa nga chisaang'i che mundaa ne mulumana ne khuliichana, aba khe mube meeso, ne busa mulamalanao.

¹⁶Niko ndoma niko kano, lekha Roho amuraangirire enywe mwimenya lienywe, ne se mulekusia lilikoomba lie liba lio mundu tawe.

¹⁷ Sikila niko liiba liefwe lienya se kacha alala nende niko Roho enya tawe, ne nisio Roho enya se sicha alala nende nisio liiba liefwe lienya tawe. Bibili bino bili bisiku, ne liekesia lili sonyala wakhola nilio wenya khukhola tawe!

¹⁸Roho aaba ne amurangirira enywe, aba se muli aasi we Lilaka tawe.

¹⁹Niko liba lio mundu likholanga kabonekha busa abuwaanga. Lieyekesia liliene mu sifwaabi, bunyaalu, ne kimiima kimibi;

²⁰mu khusaaya bifwaani ne bulosi. Babaandu bakwa basiku mala bapana; bakwa be likhendekha, be lirima ne be khukhweyenyela. Bekabukhasia mu mikaanda ne bipupu;

²¹bali ne libuba, bameela, bakhola sifwaabi ne bibiindu bibiindi bili nga bino. Mukaambila luno nga namukaambilakho abweeni ao ndi bakholanga bibiindu bino se balinyoola bubwami bwa Wele tawe.

²²Ne kakhali lituunda lia Roho lili busiime, ekhoyo, kumuleembe, liliefwiilisia, kumwoyo kumulayi, bulayi, busuubilifu,

²³lilieboombia, ne khukhwiliinda. Se lilikhoo lilaka likaania khu biindu nga bino biri tawe.

²⁴Ne abo bali ba Yesu Kristo balekhile liiba liabwe ne lisiima lialio ne lilikoomba lialio lioosi.

²⁵Roho akhuele efwe bulamu, mala akhoya lundi emeelele limenya liefwe.

²⁶Khukhoyela khulekhe khukhwibonia namwe khuambia babasiefwe lirima, namwe khukhendekhanila.