Read lubukusu Bakal. 6 Bible Online

Bakal. 6 - lubukusu bible

Bakal. 6

¹Enywe bawandaayase, kaaba bali yesi yesi anyoolekhane mu sikholwa siibi siosi siosi, abo khwinywe babemeelelwa ne Roho khukhwola mumukololosie, ne mukhoyeele mumukololosie mu buolu mala mweliinde nio mwesi mukhakhakwa tawe.

²Yeetana khusuta busiro bwenywe, nio mungila eyo murie lilaka lia Kristo.

³Ne kaaba bali yesi yesi ebaasianga ali, ali siindu ne khane ng'ali se ali siindu tawe, aba alikho ebea omwene.

⁴Buli mundu akhoyeele amanya liba liewe omwene. Ne kaaba bali lili lilayi, anyala ebonia sikila nibio omwene akholile, nio akhekelaania khu niko omundu okundi akholile tawe.

⁵Sikila buli mundu akhoyeele khusuta sisutwa siewe omwene.

⁶Omundu olikho wikisibwa elomo eye bukristo akhoyeele akabekho omwekisia wewe bibiindu bilayi bioosi nibio ali nabio.

⁷Mukhebea tawe; se aliio onyala aasilwasia Wele tawe. Omundu akhakese nisio amiicha sisiene.

⁸Kaaba bali omundu amiicha mu mukuunda kwe liiba lie liliekoomba, khukhwama mu bwenomwo alikesa likesa lie lifwa, ne kaaba bali amiicha mu mukuunda kwa Roho alikesamo likesa lie bulamu bwa mindali.

⁹Khwako khukhaluilila mu khukhola kamalayi tawe, sikila khwaba ne khukhafwa kimiooyo tawe, siise sikheche nisio khukhakeselemo likesa.

¹⁰Nono, buli lwoosi nga ne khuba ne bubweyaangu, khukhoyeele khukholele buli mundu kamalayi, ne lukali khu basiefwe mu lisuubila.

¹¹Bona chinyukuta chimboofu nicho ndikho muandikila enywe luno ne kumukhono kwase kumwene!

¹²Babaandu balakhakanga khumuyingiilila enywe mukhebwe nibo babenya khukhwiyokesia ne khukhwibonia khulwe bibiindu bie anje. Kakhaba kario, bakhola bario nio bakhapisibwa siibi khulwe kumusalaba kwa Kristo tawe.

¹³Akhaba abo bakholanga sikhebo se barichanga Lilaka tawe, benya enywe mukhebwe nio bebonie bali mweanile khu mwiima kwe kumubili kuno.

¹⁴Kakhaba kario, ese khebonie khulwe kumusalaba kwo Mwami wefwe Yesu Kristo yeng'ene, sikila khulwe kumusalaba kwewe, sibala siafwiile khwise ne sesi nafwiile khu ke sibala.

¹⁵Khuba omusaani namwe omusiinde se lili ne bukhala tawe. Sie bukhala sili khuba sibuumbe siya.

¹⁶Ne khwaabo baloonda lilaka lino mu bulamu bwabwe, kumuleembe ne siisa bibe nabo, alala ne babaandu ba Wele boosi!

¹⁷Khumaliilisia, yesi yesi akhananiakho lundi tawe, sikila chimbala nicho ndi nacho khu mubili khwase chekesia chili ndi nasioobi owa Yesu.

¹⁸Wandaayase enywe, kumwalaalo kwo Mwami wefwe Yesu Kristo kube alala ne nanywe mweesi. Amina.