Read lubukusu Baef. 2 Bible Online

Baef. 2 - lubukusu bible

Baef. 2

¹ Mu ndaalo chichawa echo enywe mwaba bafu mu roho sikila sileka sienywe ne bubwoni.

²Mu siise esio mwaloonda engila emayaanu eye sibala, mwaria omwami owe bunyali bwa roho mu ngaaki, roho yuno owibinanga babaandu bakharia Wele tawe.

³Ng'ali efwe fweesi khwaba nga nibo, khwamenyanga khuloondekhana ne liba liefwe lie lilikoomba, khwakhola liosi liosi lie lilienya lie kimibili kiefwe ne kamebaasio. Mu liba liefwe lia busiele, efwe, nga omundu yesi yesi khwalaakilwa khunyoola siukuumo mu lirima lia Wele.

⁴Ne kakhali siisa sia Wele siili sikali, ne busiime bwewe khwifwe buli bukali po,

⁵nga ne khwaba ne khusiili bafu mu roho mukhulekelesia khwefwe, akhureera mu bulamu ne Kristo. Lili khulwe kumwalaalo kwa Wele bali enywe luno mwaonisiibwe.

⁶Mu bulala bwefwe ne Yesu Kristo aakhulamusia efwe ne naye khwamiie ne naye mwikulu.

⁷Akhola kano khukhwekesia khulwe siise siosi sisiicha, bukali bukhali ne sikelo tawe, bwe kumwalaalo kwewe mu busiime nibwo akhwekesia efwe mu Yesu Kristo.

⁸Sikila khulwe kumwalaalo kwa Wele mwaonisibwa khubirira mu lisuubila.

⁹Se kali khulwe khukhola kamaani kenywe tawe, sili siianwa sia Wele, nio omundu yesi sakhoya, eboneseliakho tawe.

¹⁰Wele aakhukhola efwe khuba nga ne khuli khuri, ne mu bulala bwefwe ne Yesu Kristo, akhubumbile efwe khulwe bulamu bwe bikholwa bilayi nibio akhung'oonela khaale efwe khukhole.

¹¹Enywe Be Chikholo sikila lisaalwa lienywe, nibo Bayaudi babelanganga bali “babaandu,” balanganga enywe bali “basiinde” (liboola, sikhebo khu mibili kiabwe), khebulila nga mwaba khaale.

¹²Mu siise esio mwaba mwaukha khukhwama khu Kristo. Mwaba baakwa, ne se mwaba babaandu bali barobore ba Wele tawe. Semwaba ne kumukabwa mu ndakaano tawe. Chindakaano chichaloondekhana ne lisuubisia lia Wele khu baandu bewe, mala mwamenya mu sibala sino ne mukhali ne lilieyikina lundi ne mukhali ne Wele tawe.

¹³Ne luno, mu Yesu Kristo, enywe mu mwaba aleeyi lukali mwareerirwe aembi khulwe lifwa lia Kristo.

¹⁴Sikila Kristo omwene akhureerera kumuleembe khulwe khukhola Bayaudi nende Be Chikholo khuuba ekholo ndala. Ne kumubili kwewe, aatechula lisiisi liliabaukhasianga ne khubalekha nga basiku.

¹⁵ Arusiao Lilaka lie Bayaudi ne kamalaka kalio, nio khukhwama mu kholo chibili abuumbe babe be kholo ndala mu niye omwene, mungila yino, areera kumuleembe.

¹⁶ Khulwe lifwa liewe khu musalaba Kristo arusiao busiku bwabwe, khulwe engila eye khu musalaba aambaasia Chikholo chombi mu mubili mulala, mala achikobosia khu Wele.

¹⁷ Nio Kristo echa mala elwacha Elomo Endayi, eye kumuleembe khu boosi, khwinywe Be Chikholo mu mwaba aleeyi khukhwama khu Wele ne khu Bayuda, ba baaba aembi khu niye

¹⁸lili khubirira mu Kristo bali efwe fweesi, Bayuda ne Chikholo, khunyala khwecha mu Roho mulala ebweeni wa Paapa

¹⁹Nio luno, enywe Be Chikholo se muli baakwa namwe bareende lundi tawe, luno muli batakatifu lundi babaandu be enju eya Wele.

²⁰Akhaba enywe mwesi mwombakhwa khu musiingi kukwombakhwa ne barumwa ne bang'oosi, enjeko niye Yesu Kristo omwene.

²¹Niye ali owatililila liliombakho lioosi alala ne khulikhola lichoe libe lukaangu lutakatifu lulwaanwa khu Mwami.

²²Mu Kristo akhaba enywe mwesi mulikho mwombakhwa alala ne babaandi boosi abuundu niio Wele amenyanga khubirira mu Roho wewe.