Read lubukusu Baef. 3 Bible Online

Baef. 3 - lubukusu bible

Baef. 3

¹Khulwe sifuno sino ese, Paulo, omuboe owa Yesu Kristo sikila enywe Be Chikholo, musabila enywe khu Wele.

²Ng'ali mwaulila muli Wele mu mwalaalo kwewe amba ese kimilimo kino khukhola khulwe bulamu bwenywe.

³Wele abuula lirekekha liewe lie abwikisi mala alikhola liamanyikhana khwise. (Naandike kano mu bwimbi khulwa kano,

⁴ ne mwaba ne musoma niko mbandike kano, munyala mweyika khulwe limanyilisia liase lie abwikisi mu Kristo).

⁵Mu siise sisiabira babaandu se baboolelwa bibiindu bino tawe, ne luno Wele arumbure ne Roho khu barumwa bewe batakatifu ne bang'oosi.

⁶Esiiri eli bali khulwe Lomo Endayi Be Chikholo bali ne sitonyi ne Bayuda mu khabi cha Wele. Bali basaangi be kumubili mulala okwo mala basaanga mu lisuubisia nilio Wele ang'oona khubirira mu Yesu Kristo.

⁷Ese nakholwa omukholi owe Lomo Endayi khulwe siianwa sie kumwalaalo kwa Wele nisio ambelesia khubirira mu khukhola khwe bunyali bwewe.

⁸Ese ndi omukeekhe lukali khu baandu ba Wele boosi, ne kakhaba kario Wele ambelesia bubweyaangu buno, mbilile Be Chikholo Elomo Endayi yino, eye buiinda bwa Kristo bukhali ne sikelo tawe,

⁹mala mbukhole babaandu boosi babone nga lirekekha lia Wele liliekukhuulilanga ne licha khureerwa mu bukhalabani. Wele, oli omuluungi owe bibiindu bioosi akisa esiiri yewe khu selukho chichabira choosi,

¹⁰nio mu siise sino, khulwe kanisa, baruki, be bumalaika ne bunyali bwe mwikulu bole khukhweyika ke limanya liewe, mungila chalio choosi lukano na lukano.

¹¹Wele akhola kano khuloondekhana ne sifuno siewe sia mindali, nisio akhola khubirira mu Kristo Omwami wefwe.

¹²Mu buambaani ne Kristo mala khubirira mu lisuubila liefwe mu niye khuli ne bunyindaafu khucha ebweeni wa Wele ne lisuubila lioosi.

¹³Mwikoonjelela enywe nono, mukhafwa kimiooyo sikila ese khupwa siibi sikila enywe tawe, lili khulwe bukhala bwenywe.

¹⁴Khulwe sifuno sino ese sikamanga ebweeni wa Paapa.

¹⁵Khukhwama mu niye buli luuya mwikulu ne khu sibala lunyoolanga lisina lialwo lia ng'ali.

¹⁶Saba Wele khukhwama mu buiinda bwe luyali lwewe, amuelesie enywe bunyali khubirira mu Roho wewe mube be kamaani mu liba lienywe lie mukari,

¹⁷ne saaya ndi Kristo akhoya amenya mu miooyo kienywe khubirira mu lisuubila. Ese saaya ndi mukhoya mube ne kimili kienywe ne kumusiingi mu busiime,

¹⁸nio enywe alala ne babaandu ba Wele mwole khuba ne bunyali khumanyilisia bubalaayi, ne buleeyi, nga khucha angaaki ne aasi lukali busiime bwa Kristo.

¹⁹Yee, mwole khumanya busiime bwewe akhaba ne bukhanyala bwamanyikhila elala tawe, mala nio mwichusibwe elala ne liiba lia Wele liliene.

²⁰Khu niye, khulwe bunyali bwewe bukholanga kimilimo mwifwe anyala khukhola ario khukhila nga ne khumusaba namwe akhaba nga khwibaasiakho.

²¹Khu Wele lube luyali mu Kanisa ne mu Yesu Kristo khulwe siise siosi mindali na mindali. Amina.