Read lubukusu Baef. 4 Bible Online

Baef. 4 - lubukusu bible

Baef. 4

¹Ese mwekoonjelela enywe, ese oli omuboe sikila kholelanga Omwami kimilimo. Menya limenya lilekhaana ne sikelo nisio Wele arao nga amulaanga enywe.

² Buli lwosi yeboombia, mube baolu, lundi be khukhwifwiilisia. Yokesia busiime bwenywe khulwe khukhwekhaliilikhana.

³Khola kamaani khuliinda bulala nibwo Roho aananga khulwe kumuleembe kumuambaasianga enywe alala.

⁴Khuli ne kumubili mulala ne Roho mulala, bulayi bwene busa nga ne liliio lilieyikina lilala nilio Wele amulangilamo enywe,

⁵Aliio Omwami mulala, lisuubila lilala, libatiisia lilala,

⁶aliio Wele mulala, Raraawe owe babaandu boosi, oli Omwami owa boosi, akholanga kimilimo khubirira mu boosi, mala ali mu boosi.

⁷Buli mulala khwifwe anyoola kumwalaalo khuloondekhana siianwa nisio Kristo amwelesia.

⁸ Nga liiandiko ne liboola lili, “Nga ne aniina mu ngaaki elala, acha nende be mbaambe bakali, aana biianwa khu baandu.”

⁹Nono, khuloma khuli aaniina mu ngaaki liboola lili siina? Ne kakhali aba anyoa, ekha aasi khu sibala.

¹⁰Nio oyo owekha aasi niye owachana oyo owaniina mu ngaaki, angaaki lundi khutuuma likulu, nio khubao khwewe khwichusie liimala lioosi.

¹¹Aba niye, “owaana biianwa khu baandu,” arobora balala khuba barumwa, babaandi khuba bang'oosi, babaandi balandaasia elomo eya Wele, babaandi khuuba babelwachi, ne babeekisia.

¹²Akhola kano khurekekha babaandu ba Wele boosi khulwe kimilimo kia Kristo, nio ombakhe kumubili kwa Kristo.

¹³Nio efwe fweesi khukheche alala mu bulala bwene obu mu lisuubila liefwe ne limanya liefwe lio Mwana owa Wele, khulaba babaandu bakhulu, khwolele bubwichufu bwe bukhulu bwa Kristo.

¹⁴Nono, se khulaba lundi babaana tawe ba sutwa ne bubeeyi bwa buli lukano ne kamekisio ke babaandu babacha barangirira babaandu babaandi khucha mu mamayaanu khulwe bubacha nibwo bekhochoochanga tawe.

¹⁵Ne khali khuloma bung'ali mu Roho we busiime, khukhwola khuchoe mu buli ngila mu Kristo, oli kumurwe.

¹⁶ Mu bwimeelesi bwewe bitonyi bie kumubili biaambaana alala, mala kumubili kwoosi kuambaasibwa alala na buli bwongelo, nibwo khwaebwa. Nio nga buli silala sikhola kimilimo nga ne sienyibwa sikhole, kumubili kwosi kuchoa mala kweyombakha kumwene khubirira mu busiime.

¹⁷Nono, mu lisina lio Mwami, mukaambila enywe. Mukhachiililila khumenya nga bakhamanyile Wele tawe, nibo kamebaasio kabwe kakhali ne bukhala tawe.

¹⁸Ne nibo kamebaasio kabwe kaali mu siilima. Se bali ne sitonye mu bulamu nibwo Wele aananga tawe, sikila se bamanyilekho siindu na akeekhe ene tawe, lundi be sileka.

¹⁹Se baambwanga chisoni tawe, berusia khukhola sifwaabi ne khukhola bibiindu bioosi binyaalu, ne bakhekhingililakho tawe.

²⁰Kamenako se kali niko mweyika khu Kristo tawe!

²¹Ng'ali mwaulila, ne nga babeeka bewe mwekisibwa bung'ali buli mu Yesu.

²² Nio yerusiekho liba lienywe likhale, liliamukhola mwamenya nga mwamenyanga, liba likhale liliaba ne lilikho lionakwa, liliekoomba lialio lie bubeeyi.

²³Kimiooyo kienywe ne kamebaasio, khukhwola bikholwe biyia elala,

²⁴ mala khukhwola mufware liba liya liliakholwa mu khufwaana khwa Wele, mu buluungi bwa ng'ali ne butakatifu.

²⁵ Nono, mwaata bubeeyi! Buli mundu khukhwola alome bung'ali khu wasie, sikila fweesi khuli basaangi alala mu mubili kwa Kristo.

²⁶ Aaba ne muambwa lirima mukhalilekha liamuyila mu bwoni tawe, ne mukhalekha enyanga yakwa ne muli ne lirima chana tawe.

²⁷Mukhaelesia Sietani bubweyaangu tawe.

²⁸Babefwi bakheeba lundi tawe. Khukhwola balekhe khukhwiba mala barakikhe khukhola kimilimo ne kamakhono kabwe nio bosi banyoole bie limenya liabwe liluungi, mala bayeete bataambi.

²⁹Kamakhuwa kamabi kakhaama mukhanwa mwenywe tawe, ne kakhali kamakhuwa ke buyeeti kong'ene, ako kanyala khukhwombakha ne khuaana kakenyekha, nio liosi nilio muboola likhole kamalayi khwaabo bamuulila.

³⁰Ne mukhabelesia Roho Omutakatifu owa Wele tawe, sikila Roho ali simanyisio sia Wele khwinywe sisiekesia sili muli babewe. Ali rubuni khukhwekesia khuli endaalo elikho yiicha niyo Wele alimusikulila enywe.

³¹Lekhela elala bukhalafu bwoosi, libiila ne lirima, luyoka ne khukhoma. Lekha bumayaanu bwoosi!

³² Mube balayi be kimiooyo kimilayi khu mwabeene ne mwabeene, mala mubeelanile buli mulala nga Wele ne aamubeela enywe khubirira mu Kristo.