Read lubukusu Baef. 5 Bible Online

Baef. 5 - lubukusu bible

Baef. 5

¹Nga muli babaana bakoosi ba Wele, khukhwola mukhake kamaani mube nga niye.

² Bulamu bwenywe khukhwola bwimeelelwe ne busiime, bulayi bwene nga Kristo akhusiima efwe mala aana bulamu bwewe khwifwe nga siianwa sie kumuuya kumulayi nende sie khukhwosia sisiimisia Wele.

³Nga enywe muli babaandu ba Wele, se buli bulayi kamakhuwa kosi kosi ke liiba lie bueeyi namwe bunyaalu namwe bulianga kalomekhekho mwinywe tawe.

⁴Namwe se buli bulayi khwinywe khurumikhira lulomo lwe bunyaalu, lwe sifwaabi namwe lubi tawe, ne kakhali mupile Wele orio.

⁵Mube na suubi muli se aliio yesi yesi owe sifwaabi, bunyaalu, namwe bulianga (sikila bulianga buli nga khusaaya bifwaani) oli ne kumukabwa mu Bwami bwa Kristo ne Wele tawe.

⁶Mukhalekha omundu yesi yesi amubea ne kamakhuwa ke busilu tawe, sikila bili bibiindu bino ne bibieene nibio lirima lia Wele likheche khwaabo bakhamuria niye tawe.

⁷Khwako mukhaambaana ne nabo mu siindu siosi siosi nisio bakhola tawe.

⁸Enywe mwabeene mwaba mu siilima, ne khukhwama nga ne mwaba babaandu bo Mwami muli mu buwaanga. Nio enywe khukhwola mumenye nga babaandu baali mu buwaanga,

⁹sikila buli buwaanga[1] bureeranga likesa likali lie bulayi bwe chingano chingali, buluungi ne bung'ali.

¹⁰Khaka khu khweyika ako kasiimisia Omwami.

¹¹Mukhaba ne buambaani nende bibiindu biikhali ne bukhala nibio babaandu bakholanga tawe, bibiindu bie sisiilima. Ne kakhali bireere mu buwaanga.

¹²(Ng'ali lili lie chisoni lukali khuloma khu biindu nibio bakhola mu bwikisi.)

¹³Ne nga bibiindu bioosi ne bireerwa mu buwaanga, nono liba liabwe ng'ali liekesebwa abuwaanga.

¹⁴Sikila sisiindu siekesebwa abuwaanga siekela buwaanga. Elio nilio likila ne liboolwa lili, “Ewe oolikho okona, siisimukha, ne lamukha khukhwama mu lifwa, ne Kristo alakhua buwaanga.”

¹⁵Nio yiliinda nga mumenya, mukhamenya nga babaandu bakhali ne limanya tawe, mumenye nga bakesi.

¹⁶ Rumikhira bulayi buli bubweyaangu nibwo muli nabwo, sikila chino chili chindaalo chimayaanu.

¹⁷Khwako, mukhaba basilu tawe, khaka mumanye niko Omwami enya mukhole.

¹⁸Mukhameela endali tawe, elamwonaka busa, ne kakhali yichusibwa ne Roho.

¹⁹ Lomaloma buli mundu no wasie kamakhuwa ke kimienya kia Wele ne chinyimbo chindakatifu, yimba chinyimbo ne kimienya khu Mwami ne khumufumia mu miooyo kienywe.

²⁰Mu lisina lio Omwami wefwe Yesu Kristo buli lwoosi khupila orio Wele Paapa khu buli siindu.

²¹Richana mwabeene ne mwabeene sikila buriaani bwenywe khu Kristo.

²² Bakhasi enywe ria baseecha benywe nga muria Omwami.

²³Sikila omuseecha ali ne bunyali khu mukhasi wewe nga Kristo nali ne bunyali khu Kanisa, mala Kristo omwene ali Omuonia owe kanisa, niyo eli kumubili kwewe.

²⁴Ne bakhasi khukhwola bariire elala baseecha babwe mu buli siindu nga e kanisa ne yaria Kristo.

²⁵ Nanywe baseecha siima bakhasi benywe mungila ndala eyo nga Kristo asiima e kanisa mala aana bulamu bwewe sikila niyo.

²⁶Akhola kano khuaana e kanisa khu Wele khulwe Elomo yewe, namalile khukikwalaasia khulwe khukisiinga ne kameechi,

²⁷nio akiaane khu niye omwene, lukoondo lulayi lwayo lwoosi mu bukwalaafu ne ekhalimo kamabi, lipala namwe ekhalimo linyiisia tawe, namwe limayaanu liosi liosi tawe.

²⁸Baseecha khukhwola basiime bakhasi babwe nga ne basiima kimibili kiabwe. Omundu owasiima omukhasi wewe esiima omwene.

²⁹(Se aliio omundu obiila kumubili kwewe omwene tawe. Ne khali akuliisia, ne khukuliinda, bulayi bwene nga Kristo nakholanga e kanisa,

³⁰sikila efwe khuli basaangi mu mubili kwewe.)

³¹ Nga liiandiko ne liboolanga lili, “Khulwe sifuno sino omundu we siseecha alalekha raraawe ne maawe mala aambaane no mukhasi wewe, mala babili babe mulala.”

³²Eliio esiiri eye mukari eye bung'ali bubwafuunulwa mwiaandiko lino, nilio manyile ndi liboola khu Kristo ne kanisa.

³³Ne liboola akhaba khwinywe. Buli omuseecha khukhwola asiime omukhasi wewe nga esiima omwene, ne buli omukhasi khukhwola arie omuseecha wewe.