Read lubukusu Baef. 6 Bible Online

Baef. 6 - lubukusu bible

Baef. 6

¹ Baananywe, ria basaasi benywe mu Mwami, sikila buli bulayi khukhola murio.

² “Ria raraao ne maao,” lino lili lilaka lie khunyoa lili ne lisuubisia bali.

³“Nio koosi kakhuchiile ewe bulayi, nio omenye siise sileeyi mu sibala.”

⁴ Basaasi, mukhakholela babaana benywe kabakhola baambwa lirima tawe. Ne kakhali, khemubakhusilie mu malaka ne liliekisia lia Kristo

⁵ Enywe nasioobi ria bakhulu benywe be mu sibala mu buri ne khuterema, khola kimilimo ne kimiooyo kimikwalaafu oli manya ne mulikho mukholela Kristo.

⁶Mukhakhola kano sikila bamuboone nio kakile bamusiime enywe tawe, khola ne kumwoyo kwoosi niko Wele eenya, nga banasioobi ba Kristo.

⁷Khola kimilimo kienywe nga banasioobi mu busangaafu bulayi bwene nga mulikho mukhalaabanila Omwami se bali babaandu busa tawe.

⁸Manya muli Omwami akhaelesie buli mundu kumuruuru, abeele nasioobi namwe ooli omulekhuule, sikila kimilimo kimilayi nikio akholanga.

⁹ Nanywe bakhulu kholela kamalayi banasioobi benywe lundi mukhabaapia siibi tawe. Mukhabariikhirisia tawe. Mu manye muli Oyo ooli Omukhulu wabwe ne nanywe ali mwikulu, ne akhalakilanga buli mundu khuloondana ne sikelo sisienyekha mu bung'ali.

¹⁰Khumaliilisia, ba ne kamaani mu Mwami mu buyeeti bwe bunyali bwewe.

¹¹Fwara bibanulwa bioosi nibio Wele amuelesia, nio mwole khunyala khukhila kimireko kimimayaanu kia Sietani.

¹²Sikila se khulikho khupana ne babaandu tawe, ne kakhali khulikho khupana ne kamaani kamamayaanu ka roho we mungaaki, baruki, bunyali, kamaani ke sibala sie sisiilima sino.

¹³Khwako luno banula bibanulwa bia Wele! Nio oli endaalo eye bumayaanu yola, munyale khukhwiteecha omusiku ne amwibwaakala enywe, mala enyuma we khu khuupana se mulikhilwa tawe.

¹⁴ Nio, yiima ne mwirekekhe, ne bung'ali nga kumusiipi kuboyilwe tatatata, mu bibuno bienywe, ne buluungi nga engabo yenywe khu sifuba,

¹⁵ ne nga biraaro bienywe yerekekha khukhwilwacha Elomo Endayi eye kumuleembe.

¹⁶Khutasa khwako koosi, suta lisuubila nga engabo, sikila ne muli nalio munyala khusimia buembo buuburukha bulasiilwe no Mumayaanu.

¹⁷ Lundi fukiilila buonia nga ekofio eye sichuuma eye mwiie, ne likhuwa lia Wele nga embalu ya Roho.

¹⁸Saba mu Roho biise bioosi, ne musaba buyeeti bwa Wele. Ba meeso musabile babaandu ba Wele boosi.

¹⁹Ne akhaba sesi sabilekho nio Wele ambelesie elomo nga nerekekha khulomaloma, nio nole khulomaloma ne bunyindaafu, mala khole esiiri eye Elomo Endayi emanyikhe.

²⁰Khulwe Elomo yino ese ndi omurumwa, ne luno ne ndi mu siboe. Saba nio mbe ne bunyindaafu mukhulomaloma ke Elomo Endayi nga ne khuyela ndome.

²¹ Tichikasi, wandaayefwe omukoosi lundi omukholi omusuubilwa mu milimo kio Mwami, alamuboolela kamakhuwa koosi khwise, nio mumanye nga ese ndikho njililila.

²²Niko kakila ne muruma niye khwinywe, khumuboolela nga efwe fweesi ne khulikho khuchiililila ne khumuramo enywe kumwoyo.

²³Paapa Wele ne Omwami Yesu Kristo bakhoya baelesie bawandaayefwe bakristo kumuleembe ne busiime ne lisuubila.

²⁴Kumwalaalo kwa Wele kube nabo boosi babasiima Omwami wefwe Yesu Kristo ne busiime bukhaliwa tawe.