Read lubukusu Bafil. 1 Bible Online

Bafil. 1 - lubukusu bible

Bafil. 1

¹ Khukhwama khu Paulo ne Timoteo bakholi ba Yesu Kristo. Khu baandu ba Wele boosi bali e Filipi bali mu buambaani ne Yesu Kristo, alala ne ba bishopu ne bayeeti be mu Kanisa.

²Lekha Paapa Wele wefwe no Mwami Yesu Kristo bamuelesie enywe kumwalaalo ne kumuleembe.

³Ese khupilanga Wele wase orio buli siise nisio mukhebulilanga enywe,

⁴ne buli siise nisio musabilanga enywe mweesi sabanga ne liliekhoya

⁵sikila nga ne mwanjeeta mu milimo kie Elomo Endayi khukhwama khu ndaalo eye khunyoa khukhwola luno.

⁶Khwako ndi nasuubi ndi Wele owarakikha kimilimo kimilayi kino mwinywe, alachiililila khu kikhola khukhwola nga akimala khu Ndaalo eya Yesu Kristo.

⁷Buli lwoosi enywe muli mu mwoyo kwase! Khwako buli bulayi ese khukhweulila ndio khwinywe. Sikila enywe mweesi mwasaanga nase mu mwalaalo nikwo Wele ambelesia ese, luno nga ne ndi mu siboe, lundi nga naba omulekhuule khu khuupanila Elomo Endayi ne khukiandalasia lukali.

⁸Wele ali omuloli wase ali ese ndikho ndoma bung'ali ndi busiime bwase khwinywe mweesi bwama mu mwoyo kwa Yesu Kristo omwene.

⁹Ese saba ndi busiime bwenywe alala ne limanya lia ng'ali ne busicha bilachiililila khuba bikali mwinywe,

¹⁰nio munyale khurobora lili lilayi. Khwako mulaba balekhuule khukhwama khu bunyaalu bwoosi ne khubiiywa khu Ndaalo eya Kristo.

¹¹Limenya lienywe lilaba ne kamatuunda ke buluungi niko Yesu Kristo yeng'ene anyala aana, khulwe luyali ne fuma eya Wele.

¹²Basaale, nenya enywe mumanye muli bibiindu bibianjikholeekhekho ng'ali biayeetile lichiililila lie Elomo Endayi.

¹³ Khwako, banamae be lichipi ne babaandi boosi ano, bamanyile bali ese ndi mu siboe sikila ndi omukholi owa Kristo.

¹⁴Ne khuba khwase mu siboe khwakholile bawandaayefwe bakali khuba ne lilieyikina likali mu Mwami, khwako bachiililile khuba banyindaafu lukali, khukhwilwacha Elomo Endayi.

¹⁵Ng'ali balala khu nibo belwacha Kristo sikila bali ne sikhalikhali lundi bali ne bulomani, ne kakhali babaandi belwacha khulwe lilienya lilayi.

¹⁶Babelwacha khulwe lilienya lilayi bakhola bario khukhwama mu busiime, sikila bamanyile bali Wele ambelesia ese kimilimo kie khu khupanila Elomo Endayi.

¹⁷Babaandi se bafumianga Kristo mu bung'ali tawe, ne kakhali bakholanga bario mu mwoyo kwe khukhwiyenyela babeene, bebaasianga bali banyala bakila ese napisibwa siibi lukali nga ne ndi mu siboe.

¹⁸Se sili siindu khwise tawe, sikila akhaba ne khuli mu khwiyenyela namwe mu lienya lilayi, Kristo alikho elwachibwa. Khwako ese ndachiililila khuba omusangaafu,

¹⁹sikila manyile ndi khubirira mu masaba kenywe ne buyeeti bubwamanga khu Roho owa Yesu Kristo ese khalekhuulwe.

²⁰Lilienya liase liboofu ne lilieyikina lili mbo khakhilwa mu milimo kiase tawe, ne kakhali mu biise bioosi, ne lukali luno luri, mbe ne bunyindaafu bukali, nio ne kumwoyo kwase kwoosi ndeere efuma khu Kristo, nakhaba ne menya namwe nefwa.

²¹Sikila khuloondekhana nase, khumenya ali Kristo ne khufwa buli bukhala.

²²Ne kakhali kaaba bali ne njiililila khumenya nyala natasa khukhola kimilimo kie bukhala, aba nono se ndi nasuubi siina nisio nenyekha ndobore tawe.

²³Chingila chibili changalikaanie. Nenya lukali ndure mu bulamu buno mala mbe ne Kristo, sikila liliene elio lili lilayi lukali,

²⁴ne kakhali sikila enywe, lili lie bukhala bukali ese khuba omulamu.

²⁵Ese ndi nasuubi khu kano, khwako namanyile ndi ndamenya. Ndachiililila khumenya ne nanywe mweesi, khutasa khu lichiililila lienywe lilayi ne liliekhoya mwisuubila,

²⁶nio mbo ne ndi nanywe lundi mulaba ne sifuno siboofu sie khu khunjeboneseliakho mu limenya mu buambaani ne Yesu Kristo.

²⁷Nono sisiindu siboofu sili mbo limenya lienywe likhoya libe nga Elomo Endayi eya Kristo ne yenya, nio ese nakhanyala khukhwicha khumubona enywe namwe tawe, khaulile ndi mwemile bulayi mu sifuno silala, lundi mulikho mupanila lisuubila ne Lomo Endayi ne liliekoomba lilala liong'ene.

²⁸Mukharia basiku benywe tawe, ba banyindaafu buli lwoosi, mala lino lilabekesia lili balakhilwa ne enywe mulabaula sikila Wele niye omuelesianga enywe bukhili.

²⁹Enywe mwaelesibwa bubweyaangu bwe khukholela Kristo, ne se khuli khusuubila mu niye khwong'ene tawe, ne kakhali akhaba khu khupisibwa siibi sikila niye.

³⁰ Nono munyala mwaba alala nase mwiie lino. Lili liie liliene nilio mwabona ese nekhupana mu ndaalo chichabira, ne nga mu manyile, lili nilio ese siipana.