Read lubukusu Bafil. 2 Bible Online

Bafil. 2 - lubukusu bible

Bafil. 2

¹Limenya lienywe mu Kristo limukholanga enywe muba ne kamaani, ne busiime bwewe bumuoleelesianga enywe. Enywe muli ne bulala ne Roho Omutakatifu lundi mukholanila siisa ne khuoleelesiana.

²Nono muchuuba enywe musangaasie ese lukali khulwe khuba ne kamebaasio malala, khusaanga mu busiime, ne khuba ne liiba lilala ne kamebaasio malala.

³Mukhakhola sisiindu siosi siosi mu khweyenyela namwe mukhwenya khukhwibonia tawe, ne kakhali mwiboombie khu mwabeene ne mwabeene, buli lwoosi mubone babaandi khuba balayi khumukhilakho mwabeene.

⁴Omundu akhabao okhola kamuyeeta omwene yeng'ene tawe, ne kakhali kayeeta babasie bosi.

⁵Mukhoya mwaba ne liiba nga nilio Yesu Kristo aaba nalio.

⁶Buli lwoosi aaba Wele, ne se aakhaka khukhaabilila alekhaane ne Wele tawe,

⁷Ne kakhali, khu lienya liewe omwene aalekha bioosi nibio aaba nabio, mala aba nga nasioobi. Aaba nga babaandu, abonekha mu fwaani yo mundu.

⁸Eboombia mala aaba omurekeerefu khukhwola aakhaba khufwa, lifwa lie khu musalaba.

⁹Khulwe sifuno sino Wele aamuniinia mu bukono bwe angaaki lukali, mala amuelesia lisina liboofu lukali likhila kamasina koosi.

¹⁰ Khwako mu khuelesia Yesu luyali, bibiindu bioosi mwikulu ne khu sibala ne emakoombe bilisikama,

¹¹mala bioosi biliboola abuwaanga bili Yesu Kristo ali Omwami khulwe luyali lwa Paapa Wele.

¹²Khwako, basaale base bakoosi, nga buli lwoosi ne mwaloondanga kakaase nga nabechanga nanywe, lili liboofu luno muloonde kakaase ne ndi aleeyi khukhwama niio muli. Chiililila khukhola mu buri ne mu khuterema mumaliilisie buonia bwenywe,

¹³sikila buli lwoosi Wele ali khu milimo mwinywe khumukhola enywe mufukiilile ne khunyala khuria lilienya liewe omwene.

¹⁴Khola buli siindu ne mukhali ne khukhwilung'unya namwe khukhandarana tawe.

¹⁵ Nio mube babaana ba Wele bakhabiiywakho khu liosi liosi tawe lundi bakwalaafu bamenyile mu sibala siibi ne mu baandu babooni. Mukhoya mukhosie akari wabwe nga ching'enieesi ne chikhosianga mu ngaaki

¹⁶ne mubaboolela burume bwe bulamu. Mwaba ne mukhola murio khabe ne sifuno sie khumweboneseliakho khu Ndaalo eya Kristo, sikila likhekesie lili khukhola kamaani khwase ne kimilimo kiase, se biaba bia busa tawe.

¹⁷Lisuubila lienywe mu Mwami ne bukholi bwenywe bili nga embosio niyo oaanile khu Wele. Kaaba kario ese ndi ne busangaafu bukali, mala ese saanga nanywe mweesi mu liekhoya liase.

¹⁸Mu ngila ng'eneyo, mweesi mukhoya mube basangaafu mala musaange nase mu liekhoya lienywe.

¹⁹Liaba ne lili lilienya lio Mwami, nyala naruma Timoteo khangu, nio noole khureebwamwo kumwoyo khulwe khuulila nga muli.

²⁰Niye yeng'ene osaanganga mu mebaasio kase lundi ng'ali owibaasianga kamalayi khwinywe.

²¹Buli mundu eembeelela khu kewe kong'ene, se kali khulwe sifuno sia Yesu Kristo tawe.

²²Ne enywe mwabeene mu manyile nga ne eyekesia khuba owe bukhala, nga niye nase khwakholelanga alala kimilimo nga omwana ne raraawe khulwe Elomo Endayi.

²³Khwako neyikine khu muruma niye khwinywe khangu, ne manyile bibiindu nga bilikho bicha khuba.

²⁴Lundi suubila mu Mwami ndi kakhanyalikhane bwangu akhaba ese samwene mukeniye.

²⁵Nibaasiisie ndi nenyekha ndume wandaayefwe Epafurodito khwinywe owakhola ne khu khupana alala nase lundi owabeele nga omurumwa wenywe mu khunjeeta ese.

²⁶Ali ne liliekoomba likali khu mubona enywe mweesi ne abeleele lukali sikila enywe mwaulila muli aaba omulwale.

²⁷Ng'ali aaba omulwale enga khufwa. Ne kakhali Wele amukholela siisa, ne se aamukholela niye yeng'ene siisa tawe, akhaba ese sesi, sikila andi natasa bubeeleli khu buundi.

²⁸Nono ese ndi ne silukuluku sikali po khumuruma niye khwinywe, nio lundi mube basangaafu ne mu mubona, ne aba sesi bubeeleli bwase bulawa.

²⁹Khwako mwakaanile ne liliekhoya, nga wandaayefwe mu Mwami. Yokesia buriaani khu baandu boosi nga bano,

³⁰sikila alekha bulamu bwewe bwaba mu busiku, mala enga khufwa sikila kimilimo kia Kristo, nio aambelesia buyeeti nibwo enywe mukhanyala abeele mwamba tawe.