Read lubukusu Bafil. 3 Bible Online

Bafil. 3 - lubukusu bible

Bafil. 3

¹Bawandaayase, mu khumaliilisia yikhoya mu bulala bwenywe no Mwami. Se ndalua khuandika lundi niko naandike khale tawe, ne mulaba bulayi lukali kaaba bali khola ndio.

²Yeliinda khukhwama khwaabo bakhola kamabi, chimbwa echo, babaandu baandalasia sikhebo sie kumubili.

³Nifwe khukhwanyoola sikhebo sia ng'ali, se bali nibo tawe, sikila khusaayanga Wele khubirira mu Roho wewe lundi khwikhoya mu limenya liefwe mu bulala ne Yesu Kristo. Se khura lisuubila liosi liosi mu misaango kienje busa tawe.

⁴Ng'ali andi ese nara lisuubila liase mu biindu biri. Omundu yesi yesi aaba ne ebaasianga ali anyala khusuubila mu biindu bienje busa, ese ndi ne sifuno siboofu khukhwibaasia mu ngila ng'eneyo.

⁵ Ese nakhebwa ne ndi ne bukhulu bwe chindaalo munaane. Ndi Omuisiraeli mu khusaalwa, owe kholo eya Benjamini, owe kamafuki ko Mueburania omwene, ne khuloondekhana mu khuliinda lilaka lie Bayaudi, ese naba Omufarisayo,

⁶ lundi mu khuloonda lilaka elio lukali, napianga e kanisa siibi. Ne khuloondekhana ne buluungi bwe khuria Lilaka, se naba ne bubi bwosi bwosi tawe.

⁷Ne kakhali bibiindu bioosi nibio ese nyala nabala khuba bie bukhala, luno mbibukula khuba nga khutibia sikila Kristo.

⁸Se bili bibiindu ebio biong'ene tawe, mbukula buli siindu khuba khutibisilia elala sikila sisiindu esio siili ne bukhala bukali lukali, khumanya Yesu Kristo Omwami wase. Namwaata buli siindu sikila niye. Mbukula bioosi khuba nga kamandu busa nio nolaane khunyoola Kristo

⁹mala mbe siindu silala naye, nekhali ne buluungi bwase samwene nibwo omundu anyoola khulwe khuria Lilaka tawe, ne kakhali mbe ne buluungi buaanwa khubirira mu lisuubila mu Kristo, buluungi bubwama khu Wele lundi bubaao sikila lisuubila.

¹⁰Nilio nenya liong'ene lili khumanya Kristo ne kamaani ke lilamukha liewe, saange mu khupisibwa siibi khwewe mala mbe nga niye mu lifwa liewe,

¹¹mu lieyikina ndi ese samwene khalamusibwe.

¹²Se nyala naloma ndi, nanyoola khale bukhili namwe ndi naba omuluungi khale tawe. Njiilililanga khukhola kamaani nyoole kumuruuru ne sikila nikwo Yesu Kristo aambukula mbe wewe.

¹³Bawandaayase, ng'ali ese se nibaasianga ndi nanyoola khale kumuruuru tawe, ne kakhali kholanga sisiindu silala siong'ene, khu khwibilila kakabira ne khukhola kamaani noole khu kaali ebweeni.

¹⁴Khwako ndimanga noole khu lukoye nio nyoole kumuruuru kuli kumulaango kwa Wele khubirira mu Yesu Kristo khucha mu bulamu bwe angaaki.

¹⁵Efwe fweesi khuli bakhulu mwisuubila khwenyekha khube ne liiba nga lino. Ne kakhali balala khwinywe baaba ne liiba liliindi busa, Wele alalikhola libe abuwaanga khwinywe.

¹⁶Ne kakhaba ne kanyala kaba kario, lekha efwe khuchiililile ne kamalaka niko khuloondanga khukhwama khale.

¹⁷ Basaale, chiililila khulolela khwise. Lolela khwaabo baloonda kimiima kimilayi nikio efwe khumwekeesie enywe.

¹⁸Namuboolela enywe lino kamakhabi kamakali, ne luno ngobolelamo ne ndila, baliio bakali nibo limenya liabwe libakholanga baba basiku be lifwa lia Kristo khu musalaba.

¹⁹Sisiakamo siabwe sili mu siiukuumo sia mindali na mindali, sikila liliekoomba lie kimibili kiabwe nilio wele wabwe. Beboneselia khu ke chisoni lundi bebaasia busa ke sibala sino.

²⁰Kakhaba kario, efwe khuli babaandu be mwikulu lundi khuli ne silukuluku mu khulindiilila Omuonia wefwe, Omwami Yesu Kristo, eche khukhwama mwikulu.

²¹Akhakaluukhasie kimibili kiefwe kimitekhele, mala akikhole kibe kie luyali nga kukwewe, mu khurumikhira bunyali nibwo anyala arumikhira khuruka buli siindu.