Read lubukusu Bafil. 4 Bible Online

Bafil. 4 - lubukusu bible

Bafil. 4

¹Khwako basaale, enywe muli bakoosi khwise po! Nekoomba lukali mubone enywe! Mukholanga ese ne mba omusangaafu, lundi nibonia lukali sikila enywe! Basaale base, mukhoya mube murio mu khwetinya mu limenya lienywe mu Mwami.

²Yutia ne Sindike enywe, ne musiima, mukhake khufukiilisiana nga bayaaya mu Mwami.

³Ne akhaba ewe wesi, wasiaase omusuubilwa nenya oyeete bakhasi bano, sikila bakhola kamaani nase khukhwilwacha Elomo Endayi alala ne Kelemendi, ne bakholi basiaase babaandi boosi, nibo kamasina kabwe kali mu sitabu sia Wele sie balamu.

⁴Buli lwoosi khe mube babekhoya mu buambaani bwenywe no Mwami. Ndoma lundi ndi, yikhoya!

⁵Ba baolu khu buli mundu. Omwami ali siimbi khwicha.

⁶Mukheembeelela khu siindu siosi siosi tawe, ne kakhali mu masaba kenywe koosi reeba Wele nisio mwenya, buli lwoosi mureebere mu mwoyo kwe khumupila niye orio.

⁷Ne kumuleembe kwa Wele kukhila limanya lio mundu, kulaliinda bulayi kimiooyo ne kamebaasio kenywe mu buambaani ne Yesu Kristo.

⁸Basaale, mu khumaliilisia, yibaasia lukali bibiindu bilayi, lundi bibiolaana efuma, bibiindu bia ng'ali, biluungi bisiimisia lundi bie lukoosi.

⁹Khola niko mweyika nende niko mwabonela khwise, khubirira mu makhuwa kase ne mu bikholwa biase ne Wele okhuechanga efwe kumuleembe alaba nanywe.

¹⁰Mu bulamu bwase mu buambaani no Mwami lili liliekhoya liboofu khwise sikila enyuma we siise sileeyi, mwanyoolile lundi bubweyaangu bwe khukhwekesia muli mu khebulilanga ese. Se ndikho ndoma ndi abeele mwanjibilila tawe, ne kakhali se mwaba ne bubweyaangu khukhola murio tawe.

¹¹Se ndikho ndoma lino sikila neulila ndi nanjuukhwe tawe, sikila buli lwoosi nayeika khunyalikha nende nisio ndi nasio.

¹²Ese manyile khutaamba ne khuba nabio bikali. Nayeika likhuwa lino ndi, buli abuundu osi osi siise siosi siosi nyalikhe nakhaba ne nikuure namwe ne ndi ne njala, nakhaba ne ndi nabio bikali lukali namwe ne ndi nabio bikeekhe lukali.

¹³Ndi ne kamaani ke khubirira mu koosi khulwe bunyali nibwo Kristo ambelesianga.

¹⁴Ne kakhali bwaba bulayi lukali khwinywe khu khunjeeta ese mu matinyu kase.

¹⁵ Enywe Bafilipi, mwabeene mu manyile bulayi bweene muli nga naama Masedonia mu ndaalo che khunyoa che khukhwilwacha Elomo Endayi, enywe mwaba e kanisa yanjeeta yong'ene, enywe mweng'ene mu mwasaanga mu bukhala bwase ne khutibia khwase.

¹⁶ Nga nenya buyeeti ne ndi mu Tesalonike mwandumira kamakhabi kamakali.

¹⁷Se kali busa bali nenya khunyoola biianwa tawe, ne kakhali nenya khubona bukhala ne butasikha khu libiikhilo lienywe.

¹⁸ Nono, nanyoolile buli siindu nisio mwandumiire, mala bili bikali lukali. Epafurodito aandereere biianwa bienywe bioosi, ne luno ndi nende nibio nenya bioosi. Bili nga siianwa khu Wele sie kumuuya kumulayi, embosio efukiililwa lundi esiimisia Wele.

¹⁹Wele wase, khulwe buiinda bwewe bukali bwoosi, khubirira mu Yesu Kristo, alamuelesia enywe buli siindu nisio mwenya.

²⁰Luyali lube khu Wele wefwe lundi Paapa wefwe, mindali na mindali! Amina.

²¹Kimileembe khu buli mulala khu baandu ba Wele khubirira mu Yesu Kristo. Bawandaayefwe bali ano ne nase bamurumiire enywe kimileembe kiabwe.

²²Babaandu ba Wele ano boosi baruma kimileembe, lukali be mwichipi lia Kaisari.

²³Kumwalaalo kwo Mwami Yesu Kristo kube nanywe mwesi.