Read lubukusu Bakol. 1 Bible Online

Bakol. 1 - lubukusu bible

Bakol. 1

¹Khukhwama khu Paulo, oli omurumwa owa Yesu Kristo khulwe lilienya lia Wele, lundi khukhwama khu wandaayefwe Timoteo —

²Khu baandu ba Wele mu kolosayi lundi, bali basaale basuubilwa mu bulala ne Kristo: Wele Paapa wefwe akhoya amuelesia enywe kumwalaalo ne kumuleembe.

³Buli lwosi Khupilanga Wele orio, ooli Paapa owo Mwami wefwe Yesu Kristo, nga ne khumusabilanga enywe.

⁴Sikila khwaulila lisuubila lienywe mu Yesu Kristo ne busiime bwenywe khu baandu ba Wele boosi.

⁵Nga burume bwa ng'ali bwe Elomo Endayi bwamwolela enywe lwe bweeni, mwaulila lilieyikina nilio bwaana. Khwako lisuubila ne busiime bwenywe biama khu niko enywe mwabiikhilwa bulayi mwikulu.

⁶Elomo Endayi elikho echiililila khureera chikhabi lundi elikho yoola buli abuundu mu sibala, nga ne echiililila mwinywe khukhwama khu ndaalo niyo mwaulila khuloondekhana ne kumwalaalo kwa Wele lwe bweeni mala mwakumanya nga ng'ali kuli.

⁷ Mweyika khuloondekhana ne kumwalaalo kwa Wele khubirira khu Epafura omukholi owasiefwe, oli omukholi omusuubilwa owa Kristo mu bweyaangu bwefwe.

⁸Akhuboolele efwe busiime bwenywe mu Roho.

⁹Khulwe sifuno sino khumusabilanga enywe buli lwoosi, khukhwama nga ne khwaulila kakenywe. Khusabanga Wele amuelesie enywe limanya likali lie lilienya liewe, ne limanya lioosi nilio Roho wewe aananga.

¹⁰Nio munyale khumenya nga Omwami ne enya, ne khukhola buli lwoosi kamusiimisia niye. Bulamu bwenywe bukhabemo buli sikholwa silayi, ne khutasa khumanya Wele lukali.

¹¹Kamaani ka Wele ke bunyali kakhabaelesie enywe liliefwiilisia ne kamaani kakolaana khukhwikhaliilikha buli siindu ne khuba basangaafu ng'ali.

¹²Saba ndi enywe mupile Wele orio khulwe khubalekha enywe musaange mu ndakaano niyo aakholela babaandu bewe be mu bwami bwe Mwikulu mu buwaanga.

¹³Aakhureesia efwe khukhwama mu maani ke sisiilima ne khu khureera efwe bulayi, mu bwami bwo Mwana wewe Omukoosi.

¹⁴ Khubirira mu niye efwe khuli balekhuule ne bubwoni bwefwe bwarusibwao.

¹⁵Kristo niye sifwaanani sia Wele okhabonekha tawe, aabaao Wele ne akhabuumbakho sisiindu siosi siosi tawe, mala ali angaaki we bibuumbe bioosi.

¹⁶Sikila khubirira mu niye Wele aabaang'ana buli siindu sie mwikulu ne khu sibala, bibonekha nende bikhabonekha tawe, alala ne bunyali bwa roho, babaami, baruki ne bunyali. Wele aabaang'ana limala lioosi khubirira mu niye lundi sikila niye.

¹⁷Kristo abao ebweeni wa buli siindu, ne mu bulala naye bibiindu bioosi bili niio bienyibwa khuba.

¹⁸ Niye ali kumurwe kwe kumubili kwewe kulaangwa ekanisa, niye sinoko sie bulamu bwe kumubili okwo. Niye lirakikha Omubele khulamusibwa khukhwama mwifwa, nio abe owe bweeni mu buli siindu.

¹⁹Sikila Wele omwene akhalaka ali, omwana wewe abe ne liiba lia Wele lioosi.

²⁰ Nio khubirira mu Mwana, Wele aakhalaka ali limala lioosi likobole khu mwene. Wele aareerao kumuleembe khubirira mu lifwa lie mbosio lio Mwana wewe khu musalaba, khwako eekobosiakho bibiindu bioosi khu sibala ne mwikulu.

²¹Khale akho mwaba aleeyi khukhwama khu Wele, lundi mwaba basiku bewe sikila bibiindu bimayaanu nibio mwakholanga ne khukhwibaasia.

²²Ne kakhali luno, khulwe lifwa lio Mwana wewe, Wele aamukholile enywe khuba basaale bewe, nio amureere enywe ebweeni wewe ne muli, batakatifu, bakwalaafu, lundi nibo bakhabiyakho khu siindu siosi siosi ebweeni wewe tawe.

²³Kakhaba kario mukhoya muchiililile khutiila lisuubila lukali nga kumusiingi kwe kamaani. Mukhafukiilila khurusibwa khu lieyikina nilio mwanyoola nga mwaulila Elomo Endayi tawe. Ese Paulo nakholwa omukholi sikila Elomo Endayi yino, eyelwachibwa khu buli mundu mu sibala.

²⁴Luno ese sangaalila khu khupwa siibi sikila enywe, sikila khubirira mu khupisibwa siibi khwase mu sibala muno, njeeta khukhwichusiao sisiasikalilakho mu khupisibwa siibi khwa Kristo mu bweyaangu bwe kumubili kwewe, nikwo ekanisa.

²⁵Wele aakholile ese khuba omukholi owe kanisa. Wele owamba kumulimo kuno khukukhola, khulwe ngaanga khwinywe. Kuli kumulimo kwe khukhwilwacha elomo yewe mu bwichufu,

²⁶lili liliekisia nilio aakisa khukhwama khu selukho choosi ne babaandu boosi ne luno abooleele babaandu bewe.

²⁷Lirekekha lia Wele lili khukhola liliekisa liewe lino limanyikhe khu baandu bewe, simoonyo siie buiinda sino lundi sie luyali nisio khulwe babaandu boosi. Liliekisa lie buiinda ne luyali lino lili nilio ali nalio khulwe babaandu boosi. Liliekisa lino liboola lili Kristo ali mwinywe, ne liekesia lili enywe mukhasaange mu luyali lwa Wele.

²⁸Khwako khwilwacha Kristo khu buli mundu. Khukaambila ne khubekisia ne limanya linyalikhana lioosi nio khureere buli sia mulala ebweeni wa Wele nga omundu okhulile mu bulala ne Kristo.

²⁹Nio lino liekholekhe, ese khalabananga lukali ne nirana, ne khurumikhira kamaani kamakali niko Kristo aananga lundi kaali khu milimo mwise.