Read lubukusu Bakol. 2 Bible Online

Bakol. 2 - lubukusu bible

Bakol. 2

¹Lekha muboolele enywe nga namukhalaabanila enywe lukali alala ne babaandu ba Laotikia ne babaandi boosi bakhabonanakho nase tawe.

²Kholanga nio babe banyindaafu lukali lundi bolaane khureerwa alala mu busiime, khwako bali ne lilieyikina likali nilio limanya lia ng'ali lireeranga. Mu ngila yino bakhamanye lilienya lia Wele liliekisa, niye Kristo Omwene.

³Buyiinda ne bukesi bwa Wele bwoosi bwakukhuulilwa mu niye.

⁴Nono ese muboolela enywe ndi, mukhalekha yesi yesi amubea enywe khubirira mu mayiingano ke bubeeyi akhaba ne kabonekhana khuba kamalayi tawe.

⁵Sikila akhaba ne khali ne nanywe mu mubili tawe, ndi nanywe mu Roho, lundi ndi ne busangaafu nga ne mbona khukhwirusia khwenywe khukali mu bulala bwe lisuubila mu Kristo.

⁶Sikila mwafukiliile Yesu Kristo nga Omwami, menya mu bulala naye.

⁷Yiandalasia lukali mu Kristo mala mu mubukule niye khuba kumusiingi kwe bulamu bwenywe. Ba ne lisuubila likali khuloondekhana nga mwekisibwa. Nio mube babapa orio engali.

⁸Nono, mukhalekha yesi yesi amubea enywe ne kamayiingamo busa tawe. Kamayiingamo ako kanyala kalolekha khuba ke limanya, ne kakhali kamekisio ke babaandu niko. Ke bunyali bwe mu sibala muno busa, se kali ka Kristo tawe.

⁹Sikila liba lia Wele lioosi lili mu Kristo ooli omundu,

¹⁰ne enywe mwaelesibwa bulamu bwoosi mu bulala naye. Ali omukhulu khu buli omuruki owa roho ne bunyali bwoosi.

¹¹Mwakhebwa mu bulala ne Yesu, ne se sili sikhebo sikholwa ne babaandu tawe, ne kakhali sikhebo sikholwa ne Kristo. Sikhebo sino sili siaana bulekhuule khu maani ke bubwoni.

¹² Sikila mu khubatiisibwa khwenywe mwasiikhwa ne Kristo, lundi mu batisimu mwene omwo, enywe mwalamusibwa alala ne Kristo khubirira mu lisuubila lienywe mu bunyali bwa Wele owalamusia Kristo.

¹³ Siise sisiabira esio mwaba bafu mu Roho sikila bubwoni bwenywe, lundi sikila se mwaba babaandu ba Wele tawe. Ne kakhali Wele luno aamuelesie enywe bulamu ne Kristo. Wele aakhubeela efwe bubwoni bwefwe bwoosi.

¹⁴ Aarusiao efaili eye kamakobi kefwe alala ne kamalaka kayo kamarafu, afuuta kano koosi akarusirao elala mu khukakhoma khu musalaba.

¹⁵Khu musalaba okhwo, Kristo akhila bunyali ne kamaani ka roho. Aalekha sibala sioosi siabona nga baba ne bayilwa nga baambe, Kristo na baraangirire mu bukhili bwewe.

¹⁶ Khwako mukhalekha yesi yesi aamuraakho kamalaka khu nisio mulia namwe munywa namwe khu ndaalo chindakatifu namwe naikara eye kumwesi kumuyia namwe Sabato tawe.

¹⁷Bibiindu bino bioosi bili busa sisiiniini sie bibiindu bikheeche; bung'ali buli Kristo.

¹⁸Mukhalekha omundu yesi yesi owe bukula khuba omulayi lukali khukhila enywe sikila kamalola kewe, lundi owenya busa lilieboombia lie bubeeyi ne khusaaya ba malaika tawe. Ne kakhali ako koosi kali ka busa sikila kamebaasio kabwe kali kasaangasia babeene,

¹⁹ ba benabo balekha khuba mu bulala ne Kristo ooli kumurwe kwe kumubili kwoosi. Kristo aelesianga kumubili kamaani, lundi arumikhiranga bubwongelo bwe kumubili kwoosi khu kuambaania nga kukhula khubirira mu bunyali bwa Wele.

²⁰Mwafwa ne Kristo mala mwalekhuulwa khukhwama khu baroho ba bamiia mu limala. Siina sikila nono, ne mu menya nga be sibala sino? Siina sikila ne muria kamalaka nga,

²¹“Mukhatiila khu sino tawe, mukhachanjaama esio tawe,” namwe “Mukhetiila khu siindu esio tawe”?

²²Kano koosi kali busa khu biindu bitaamba bukhala ne bimalile khurumikhirwa. Kano kali kamalaka ne kamekisio ke babaandu busa.

²³Kamalaka nga ako kalolekhana khuba ke limanya mu khu saaya bamalaika khwabwe khwe khuyingililwa, ne lilieboombia lie bubeeyi ne khura kumubili mu buchuuni, ne kakhali se bili ne bukhala bwa ng'ali mu khukhiingilila liliekoomba lie kumubili tawe.