Read lubukusu Bakol. 3 Bible Online

Bakol. 3 - lubukusu bible

Bakol. 3

¹ Mwaba ne mwalamusibwa alala ne Kristo, nono ra kimiooyo kienywe khu biindu bie mwikulu, nimwo Kristo ali, khu ndebe yewe eye bubwami amukhono kumuseecha kwa Wele.

²Ra kamebaasio kenywe khu biindu biili ebweeneyo, se khuli khu biindu biili khu sibala sino tawe.

³Sikila enywe mwafwa, ne bulamu bwenywe bwakisibwa alala ne Kristo mu Wele.

⁴Bulamu bwenywe bwa ng'ali buli Kristo ne nga akhabonekhe, enywe mweesi mukhabonekhe naye mala musaange mu luyali lwewe!

⁵Nono khukhwola mwire liliekoomba lie sibala lie bubwoni lili mwinywe, bibiindu nga sifwaabi, bunyaalu, liliekoomba libi, kameelu ne bulianga (sikila bulianga buli nga khusaaya bifwaani).

⁶Lirima lia Wele likhabe khwaabo bakhamuria niye tawe sikila bibiindu nga bino biri.

⁷Siise siabao nisio enywe mwabeene mwamenyanga khuloondekhana ne liliekoomba lirio, siise nisio limenya lienywe liechulamo liliekoomba liene elio.

⁸Ne kakhali luno khukhwola mulekhane ne bibiindu bino bioosi, lirima, lisinye, ne kamakuto. Bukhomo ne chilomo chimbi chiikhaamakho mukhanwa mwenywe tawe.

⁹ Mukhabeana tawe, sikila mwefuula liiba lienywe lie khaale ne kimiima kialio

¹⁰ mala mwefwara liiba liya lino. Lili liiba liya nilio Wele, omubuumbi walio, buli busiele akaluukhasianga lifwaanane naye nio amukhole enywe mu mumanye niye bulayi.

¹¹Khwako bubwabukhani se buliio lundi akari we babaandu Be Chikholo ne Bayaudi tawe, akari we babaandu ne basiinde, akari we basomi ne bakhali basomi tawe, nasioobi ne baleekhule tawe. Ne kakhali Kristo ali bioosi, lundi Kristo ali mu bioosi.

¹² Enywe muli babaandu ba Wele; aamusiima enywe mala aamurobora mube babeewe. Khwako mukhoya mube ne siisa, bulayi, lilieboombia, buolu ne liliefwiilisia.

¹³ Mwekhaliilikhane ne khubeelanila, mulala khwinywe aaba ne ali ne likhuwa khu wasie. Mukhoya mubeelanile nga Omwami ne aamubeela enywe.

¹⁴Ne khu biindu bino bioosi, tasakho busiime, busiime bureera alala bibiindu bioosi mu bwichufu.

¹⁵Lekha kumuleembe nikwo Kristo aana kube mu miooyo kienywe. Sikila Wele enya enywe mube alala mu muleembe nga kumubili mulala. Lundi khe mupe orio.

¹⁶ Elomo eya Kristo mu buiinda bwayo bwoosi ekhoya emenye mu miooyo kienywe. Yekisiana ne khukambilana ne limanya lioosi. Yimba kimienya ne chinyimbo chindakatifu, yimbila Wele ne khumupila niye orio mu miooyo kienywe.

¹⁷Khwako buli siindu nisio mukhola namwe muloma, sikhoya siekholekhe mwisina lio Mwami Yesu, nga ne mupila orio Wele Paapa khubirira mu niye.

¹⁸ Enywe Bakhasi, ria baseecha benywe sikila liliene elio lisiimisia Omwami.

¹⁹ Nanywe baseecha, siima bakhasi benywe, ne mukhaba barafu khu nibo tawe.

²⁰ Bananywe, ria basaasi benywe buli lwoosi, sikila elio nilio lisiimisia Wele.

²¹ Ba paapa nanywe, mukhabeelesia babaana benywe tawe, bakhola bario bafwa kimiooyo.

²² Nasioobi enywe, ria bakhulu benywe mu biindu bioosi, se kali bali ne bamulolelele enywe, nio bamusiime tawe, ne kakhali mukhole ne kumwoyo kwoosi sikila buuri bwenywe khu Mwami.

²³Lioosi lioosi nilio mukhola, likhole ne kumwoyo kwenywe kwoosi, oli mulikho mukholela Omwami ne se bali babaandu tawe.

²⁴Manya muli Omwami akhamue enywe kumuruuru nikwo aabiikhila babaandu bewe. Sikila Kristo ali Omwami owa ng'ali niye mukholelanga.

²⁵ Ne buli okhola kamabi akharuungwe khuloondekhana ne kamabi niko aakholanga, sikila Wele akhalakilanga buli sia mulala mu bung'ali.