Read lubukusu Bakol. 4 Bible Online

Bakol. 4 - lubukusu bible

Bakol. 4

¹ Enywe mu mwaandika bamukholela, kholela bakholi benywe bung'ali, khebulila muli enywe mweesi muli no Mukhoongo wenywe mwikulu.

²Ba ne sinani khusaba, lundi ba meso ne mulikho musaba, ne khu khupila Wele orio.

³Lundi khusabilekho efwe fwesi, nio Wele akhuelesie efwe bubweyaangu bulayi khukhwilwacha Elomo yewe khuloondekhana nende limanya lia Kristo liliekisa. Lino nilio likila ese ne ndi mu siboe luno.

⁴Nono enywe saba muli ese nyale khulomaloma nga khoyela, mu ngila eye khulikhola limanyikhe bulayi.

⁵ Ba bakesi mu niko mukhola khu baandu bakhasuubila tawe, ne khurumikhira bulayi bubweyaangu bwoosi nibwo muli nabwo.

⁶Lilomaloma lienywe buli lwoosi likhoya libe lilayi lundi lisiimisia, lundi mumanye nga mukobosia bulayi buli mundu.

⁷ Wandaayefwe, omukoosi Tichikasi oli omukholi omusuubilwa, lundi omukholi nasioobi wasiefwe mu milimo kio Mwami, alamuboolela enywe kakaase koosi.

⁸Ako kakila nendikho muruma omwene, khumutinyilisia enywe kimiooyo khulwe khumuboolela nga ne khulikho khuchiililila.

⁹ Alikho echa ne Onesimo wandaayefwe omukoosi lundi omusuubilwa, owe sipupu sienywe. Balamuboolela enywe buli siindu silekholekhanga eno.

¹⁰ Arisitariko, ooli mu siboe nase, aamurumiire enywe kimileembe, ne Mariko, wandaye owa Baranaba yesi. (Mwaboolelwe khale mwakaanile Mariko aaba ne echa ebweeneyo.)

¹¹Yoshua, lundi olaangwa Yusito, yesi aamurumiire enywe kimileembe. Bataru bano bong'ene nibo Bayaudi basuubili bakholanga nase kimilimo khulwe bubwami bwa Wele, mala babeele be buyeeti bukali po khwise.

¹² Kimileembe khukhwama khu Epafura, omusaangi okundi owe mu sipupu sienywe lundi omukholi owa Yesu Kristo. Amusabilanga enywe lukali buli lwoosi nio Wele amukhole enywe mube ne kamaani, nga bakristo baangafu mwisuubila baloonda mu bwichufu lilienya lia Wele.

¹³Ese samwene nyala narusia buloli bwe kimilimo kiewe mwinywe ne babaandu ba Laotikia ne Hirapoli.

¹⁴ Luka omusilikhi wefwe omusiime ne Tema bamukhesiisie enywe.

¹⁵Khesele bawandaayefwe mu Laotikia ne Nimufa ne basuubili babuusiananga munju mwewe.

¹⁶Ne mumalile khusoma ebarwa yino, lola muli yasomeelwe mu kanisa eya Laotikia. Ne siise sisienesio, musome ebarwa niyo bawandaayefwe mu Laotikia balamurumira enywe.

¹⁷ Ne boolela Arikipo muli, “Lola oli wamalile kumulimo nikwo waebwa khu kholela Omwami.”

¹⁸Ese Paulo ndikho mbandika kimileembe kino ne kumukhono kwase samwene. Mukhebilila muli ndi mu siboe tawe! Kumwalaalo kwa Wele kube nanywe.