Read lubukusu 1 Bates. 1 Bible Online

1 Bates. 1 - lubukusu bible

1 Bates. 1

¹ Khukhwama khu Paulo, Sila ne Timoteo Khu kanisa eye ba Tesalonike, baali ba Wele Paapa no Mwami Yesu Kristo. Kumwalaalo ne kumuleembe bibe khwinywe.

²Buli lwosi efwe khupanga orio khu Wele sikila enywe mweesi, ne buli lwoosi khu murumburangakho mu masaba kefwe.

³Sikila khukhebulila ebweeni wa Wele wefwe lundi Paapa nga ne mwara lisuubila lienywe mu bikholwa, nga busiime bwenywe bwamukhola mwakhola kimilimo ne kamaani, ne lundi nga lilieyikina lienywe mu Mwami Yesu Kristo ne lili liiandalafu.

⁴Bawandaayefwe, efwe khumanyile khuli Wele amusiima enywe mala amurobora mube babeewe.

⁵Sikila se khwamureerera burume bwe Lomo Endayi, mu makhuwa kong'ene tawe, ne kakhali yecha ne bunyali ne Roho Omutakatifu, ne lisuubisia lioosi lie bung'ali bwayo. Mumanyile limenya liefwe, nga ne khwaba nanywe, liaba khulwe bulayi bwenywe.

⁶ Mwaba babeeka befwe lundi bo Mwami, ne akhaba ne mwaba mu sinyaasio sikali, mwakaanila burume ne liliekhoya liliama khu Roho Omutakatifu.

⁷Khwako mwaba be khulolelakho khu basuubili boosi mu Masedonia ne mu Akaya.

⁸Sikila burume bwo Mwami se bwaba bwong'ene bubwama khwinywe bwacha mu Masedonia ne mu Akaya tawe, akhaba ne kamakhuwa ke lisuubila lienywe mu Wele kacha buli abuundu. Nono, se siliio sisiindu nisio khunyala khwaloma tawe.

⁹Babaandu abo boosi bafumia nga ne mwakhwakaanila efwe siise nisio khwamukeniia, lundi nga mwalekha bifwaani ne khukobolela Wele, ne khukholela kimilimo Wele Omenyile mindali lundi owa ng'ali.

¹⁰Ne khulindiilila liliicha lio Mwana wewe khukhwama mwikulu, Omwana wewe Yesu, niye alamusia khukhwama mu lifwa, okhuonianga khukhwama khu lirima lia Wele lilikho liliicha.