Read lubukusu 1 Bates. 2 Bible Online

1 Bates. 2 - lubukusu bible

1 Bates. 2

¹Bawandaayefwe, enywe mwabene mu manyile muli khu mukeniia khwefwe se khwaba khwa busa tawe.

² Mu manyile nga khwaba ne khunyaasibwe ne khukhomwa mu Filipi ne khukheecha Tesalonike niyo muli eyo tawe. Ne akhaba ne khwaba ne butinyu bukali, Wele wefwe akhutasa kumwoyo khumuboolele enywe Elomo Endayi, eyaama khu niye.

³Liliekoonjelela liefwe khwinywe, se lili nio efwe khukhole kakhenyibwa namwe kamabi tawe, namwe se khukhakanga khureka yesi yesi tawe.

⁴Se khulomalomanga nio khusiimisie babaandu tawe, ne kakhali khulomalomanga khusiimisie Wele, owakhusuubila efwe mala khwafukiililwa mu moni chewe khukeesia burume bwe Lomo Endayi, nio apiime kimiooyo kiefwe.

⁵Mumanyile bulayi bwene muli se khwecha khwinywe ne lulimi lwe khuombelesia tawe, namwe se khwarumikhira kamakhuwa ke khukisa bulianga tawe, Wele ali omuloli wefwe!

⁶Se khwakhaka khunyoola efuma khukhwama khu yesi yesi, namwe khwinywe namwe khu baandi tawe, akhaba ne khwaba ne bung'ali bwe khumwenyakho kumuruungo nga barumwa ba Kristo.

⁷Ne kakhali khwaba baolu bulayi bwene nga maayi ne alelanga babaana bewe.

⁸Sikila busiime bwefwe khwinywe, se khwerekekha khusaanga nanywe mu Lomo Endayi khukhwama khu Wele yong'ene tawe, khwasaanga akhaba limenya liefwe liosi. Mwaba basiime lukali khwifwe!

⁹Bawandaayefwe ng'ali mukhebulila nga ne khwakhola ne khunyaakhana! Khwakhola kimilimo siilo ne kumuusi, nio khukhaba butinyu khwinywe tawe, siise nisio khwamwilwachila Elomo Endayi khukhwama khu Wele.

¹⁰Enywe muli baloli befwe, ne akhaba Wele yesi, liba liefwe khwinywe basuubila liaba litakatifu, liluungi, ne likhalikhomo kamabi kosi kosi tawe.

¹¹Mu manyile muli khwabukula buli sia mulala khwinywe bulayi bwene busa nga Paapa ne akholelanga babaana bewe.

¹²Khwamuramo kamaani, ne khumuoleelesia, mala khwachiililila khumuchuuba enywe mumenye limenya lisiimisia Wele, omulaanganga enywe musaange mu Bwami bwewe ne luyali.

¹³Ne siliio sifuno sisiindi sikila ne khupanga orio buli lwoosi khu Wele. Nga khwamureerera enywe burume bwa Wele, mwabuulila mala mwabufukiilila, nga burume bukhali bwe babaandu tawe, ne kakhali mwabubukula nga burume bwa Wele, mala ng'ali buli bwa Wele. Sikila Wele akhola kimilimo mwinywe mumwasuubila.

¹⁴ Bawandaayefwe, bibiindu bibieene ne bibieene bibiamwikholekhekho, biekholekha khu chikanisa cha Wele mu Buyuda, khu baandu baali ba Yesu Kristo ebweeneyo. Binyaasio nibio mwanyoola khukhwama khu baandu be mu sibala sienywe sisiene bili busa bibieene ne bibieene nibio nibo banyaasibwa khukhwama khu Bayaudi,

¹⁵ babeera Omwami Yesu ne bang'oosi, mala bakhunyaasia efwe. Bali bakhasiimisia Wele tawe! Bali basiku bayingania buli mundu!

¹⁶Lundi bakhaka khukhukhiingilila efwe khulekhe khwilwacha burume khu Be Chikholo, burume bunyala bwabareerera buonia. Mu ngila ng'eneyo bamalile elala khukhwichusia esaabu eye bubwoni bwabwe. Ne luno lirima lia Wele liamalile khubechakho!

¹⁷Ne efwe, bawandaayefwe, nga khwaba ne khwaukhaane nanywe khu siise sitiiti mu mubili, se khwamurusia mumebaasio kefwe tawe, khwamwikoombile mala khwakhaka lukali khumukeniye lundi!

¹⁸Khwenyile khwiche lundi. Ese samwene nakhakile lukali khukhwicha, ne kakhali Sietani se enya khwiche tawe.

¹⁹Kakhaba kario, enywe muli, lilieyikina liefwe, liliekhoya liefwe, ne sifuno siefwe sie khukhwibonia khu bukhili bwefwe ebweeni wo Mwami Yesu nga ne akheeche.

²⁰Ng'ali enywe muli liliebonia liefwe ne liliekhoya liefwe.