Read lubukusu 1 Bates. 3 Bible Online

1 Bates. 3 - lubukusu bible

1 Bates. 3

¹ Ekhumaliilikha, se khwanyala khu khwekhaliilikha lundi tawe. Nio khwakhalaka khukhwikhala mu Ateni fweng'ene

²mala khwaruma Timoteo, wandaayefwe okholanga ne nafwe khulwa Wele mu khwilwacha Elomo Endayi eya Kristo. Khwamuruma khwinywe amuandalasie mu lisuubila lienywe lundi amuchuube,

³nio yesi yesi khwinywe akhela enyuma sikila binyaasio bino tawe. Enywe mwabeene mu manyile muli binyaasio biri, bili bilala khu lienya lia Wele khwifwe.

⁴Sikila nga khwaba ne khu siili ne nanywe, khwanyoa khwamuboolela khuli khulikho khucha khunyaasibwa, ne nga ne mu manyile bulayi bwene, ako niko busa kamene kakekholekha.

⁵Ako niko kakakila naruma Timoteo. Beele se nyala khukhwekhaliilikha lundi tawe, nio namuruma manye lisuubila lienywe. Naba ne buuri ndi wakana abeele Omusiku amukhakile enywe mala kimilimo kiefwe kiabele kia busa!

⁶ Ne kakhali luno Timoteo akobole khukhwama ebweeneyo, mala akhureerere efwe kamakhuwa kamalayi, khu lisuubila ne busiime bwenywe. Akhuboolele efwe ali buli lwoosi mukhwibasilianga efwe kamalayi, ne lundi mwekoomba khukhubona efwe, nga fweesi ne khwekoombanga khumubona enywe.

⁷Khwako bawandaayefwe, mu butinyu ne buchuuni bwefwe bwoosi, khwaandalasiibwe kimiooyo sikila enywe. Lisuubila lienywe nilio liliakhuandalasia efwe kimiooyo,

⁸sikila luno ng'ali khumenya, mwaba ne mweandalasia mu limenya lienywe mu buambaani no Mwami.

⁹Luno khunyala khwapila Wele wefwe orio sikila enywe. Khumupila orio sikila liliekhoya nilio khuli nalio ebweeni wewe sikila enywe.

¹⁰Siilo ne kumuusi khumusabanga niye ne kumwoyo mulala akhulekhuule efwe khumubone enywe moni na moni, mala khumuelesie nibio mukhoyela mu lisuubila lienywe.

¹¹Khusaba Wele wefwe lundi oli Paapa Omwene no Mwami wefwe Yesu akhuraangirire efwe khumukeniye enywe!

¹²Omwami akhoyeele atasa busiime bwenywe khu buli mulala ne khu baandu boosi bukuche ne khutasikha, mala bube bukali nga bubwefwe khwinywe.

¹³Mu ngila yino akhamuandalasie, mala mu khabe baluungi lundi batakatifu ebweeni wa Wele wefwe, lundi oli Paapa, nga Omwami wefwe Yesu ne akheeche ne naabo boosi bali babeewe.