Read lubukusu 1 Bates. 4 Bible Online

1 Bates. 4 - lubukusu bible

1 Bates. 4

¹Ekhumaliilikha, bawandaayefwe, mweyikile khukhwama khwifwe nga nemukhoyeele khumenya nio musiimisie Wele. Eyino niyo engila niyo mwama khumenyelangamo. Ne luno khumusaba enywe ne khumuchuuba mu lisina lio Mwami Yesu mukhole kamakali khukhilakhoo.

²Sikila mumanyile kamekisio niko khwamwekisia mu bunyali bwo Omwami Yesu.

³Sikila lino nilio lilienya lia Wele, mube batakatifu mu bwichufu, lundi mwibebee sifwaabi sie bueeyi.

⁴Buli sia mulala khwinywe oli omuseecha, khukhwola amanye khumenya no mukhasi wewe mungila endakatifu lundi eye lukoosi,

⁵ne seli eye liliekoomba limayaanu nga bakhamanyile Wele tawe.

⁶Mu makhuwa kano, nono, omundu akhakholela omukristo wasie kamabi, namwe anyooleleo bubweyaangu bwe khu khola kamabi tawe. Khwanyoa khwamuboolela kano, ne khumukaambila lukali khuli Omwami akhaukuume abo bakholanga bario.

⁷Wele se akhulaanga efwe khumenya mu sifwaabi tawe, ne kakhali mu butakatifu.

⁸Khwako, oyo yesi yesi oloba liliekisia lino, se alikho aloba omundu tawe, ne kakhali aloba Wele omuelesianga enywe Roho wewe Omutakatifu.

⁹Se siliio sikila khumuandikile enywe khulwe busiime khu basuubili basienywe tawe. Enywe mwabeene mwekisibwa ne Wele nga ne mukhoyeele mwasiimana.

¹⁰Ne mala ng'ali mwakholile murio khu bawandaayenywe boosi be mu Masedonia mwoosi. Khwako bawandaayefwe, khumusaba enywe, mukhole khukhilakhoo.

¹¹Khola libe lilienya lienywe khumenya limenya lili litembelefu, ne mukhola kimilimo kienywe, mala munyoole kumuruungo kwenywe, bulayi bwene nga khwanyoa khwamuboolela.

¹²Mu ngila yino mukhanyoole lukoosi khukhwama khwaabo bakhasuubila tawe, mala se mukhabe butinyu khu mundu yesi khu nisio mwenya tawe.

¹³Bawandaayefwe, se khwenya mulekhe khumanya kamakhuwa kabo ba baafwa tawe, nio mulekhe khuba ne bubeeleli, nga abo bakhali ne lilieyikina tawe.

¹⁴Khusuubila khuli Yesu aafwa mala aalamukha, lundi khusuubila khuli Wele akhakobosie Yesu alala ne naabo babaafwa ne bamusuubile niye.

¹⁵ Nilio khulikho khumuboolela lino lili kamekisio ko Mwami. Efwe khuuliba balamu khu ndaalo niyo Omwami akheechele, se khulirangirira babaafwa khale tawe.

¹⁶Lilaka lilirusibwa mu mumilo kwe angaaki lukali ne malaika omukhulu, liiuliilikhana lie ekhoombi eya Wele libeo, mala Omwami omwene akhekhe khukhwama mwikulu. Abo babafwa ne basuubile Kristo balinyoa balamukhe,

¹⁷ne efwe khuuliba balamu mu sibala siise esio, khulibukulibwa alala ne nabo mu maleesi, mala khwakaanile Omwami mu ngaaki. Nio buli lwoosi khuliba alala no Mwami.

¹⁸Nono, khemuoleelesiane ne kamakhuwa kano.