Read lubukusu 1 Bates. 5 Bible Online

1 Bates. 5 - lubukusu bible

1 Bates. 5

¹Bawandaayefwe, se silikhoo sikila khumuandikile enywe, khuloondekhana ne biise nibio bibiindu bino bikhekholekhelemo tawe.

² Sikila enywe mwabene mumanyile bulayi bwene muli Endaalo yo Mwami ekheeche butundubikha nga omwifwi ne echa mu silo.

³Babaandu nga bakhabe ne balikho baloma bali, “Luno khuli ne kumuleembe, butinyu mbakhoo tawe” khane siise esio nisio lilionaka lilikho libanyoola! Liliicha khangu busa nga khulumwa khwo mukhasi ne enya khusaala, mala babaandu se baliebachakho tawe.

⁴Ne enywe bawandaayefwe, se muli mu siilima tawe, Endaalo eyo se khoya yamutundubikha nga omwifwi ne atundubikha tawe.

⁵Enywe mweesi muli babaandu be mu buwaanga, be kumuusi. Se khuli be siilo namwe be sisiilima tawe.

⁶Khwako, se khukhoyeele khwakona nga babaandi tawe, khukhoya khube meso lundi milengaala.

⁷Babaandu bakonaanga siilo, lundi bameelanga siilo.

⁸ Ne efwe khuli be kumuusi khwako khukhoyeele khwaba milengaala. Khukhwola khwifware lisuubila ne busiime nga engabo eteecha sifuba, ne lilieyikina lie buonia nga ekofio eye sichuuma ekisa kumurwe.

⁹Wele se akhurobora efwe khuukuumwe mu lirima liewe tawe, ne kakhali khunyoole buonia khubirira mu Mwami wefwe Yesu Kristo,

¹⁰owakhufwiila efwe nio khwole khumenya alala ne naye nga ne akheeche akhunyoole balamu namwe bafu.

¹¹Nono, khemuchuubane ne khuyeetana mwabeene ne mwabeene, nga luno ne mulakholanga.

¹²Khumusaba enywe, bawandaayefwe, mube ne buuri khwaabo bakhola kimilimo mwinywe, bamurangirira ne bamwekisia enywe mu liimenya lie Bukristo.

¹³Baelesie liria likali ne busiime sikila kimilimo nikio bakhola. Ba ne kumuleembe khu mwabeene ne mwabeene.

¹⁴Khumuchuuba enywe, bawandaayefwe, kaambila bakara. Tasa kamaani baari, yeeta batekhele, mala mube ne khukhwefwiilisia khu buli sia mulala.

¹⁵Lola muli omundu yesi yesi se aruungia kamabi khu mabi tawe, ne buli lwoosi yeluungikha khukhola kamalayi khu buli mundu ne khu baandu boosi.

¹⁶Yekhoya buli lwoosi,

¹⁷saba biise bioosi,

¹⁸ba mumupa orio mu buli siindu siosi siosi. Sikila lino lili lilienya lia Wele mu Yesu Kristo khwinywe.

¹⁹Mukhasimia Roho Omutakatifu tawe,

²⁰mukhalekelesia burume bwe bung'oosi tawe.

²¹Ne kakhali ra buli siindu khwikela. Tililila siili silayi.

²²Yebacha buli bubwafuma bumayaanu bwoosi.

²³Wele okhuelesianga efwe kumuleembe, akhoya amukhola enywe mwaba batakatifu mu buli ngila, mala aliinde roho, kumwoyo, ne kumubili, bilobe khubakho ne bubi bwosi bwosi khu ndaalo niyo Omwami wefwe Yesu Kristo akheechelekho.

²⁴Oyo omulaanganga enywe akhakhole ario, sikila ali omusuubilwa.

²⁵Bawandaayefwe, khusabilekho akhaba fweesi.

²⁶Kheesia basuubili boosi ne liliekwayila litakatifu.

²⁷Musaba enywe mu bunyali bwo Mwami, musome ebarwa yino khu basuubili boosi.

²⁸Kumwalaalo kwo Mwami wefwe Yesu Kristo kube ne nanywe.