Read lubukusu Yosh. 1 Bible Online

Yosh. 1 - lubukusu bible

Yosh. 1

¹Enyuma we lifwa lia Musa omukholi owa Wele Omunyali Owa Bioosi, Wele Omunyali Owa Bioosi aalomaloma no muyeeti owa Musa, Yoshua okhwa Nuni.

²Amuboolela ali, “Omukholi wase Musa afwiile. Nono yirekekha, ewe ne babaandu boosi ba Isiraeli, mala mwambukhe luluuchi lwa Yoritani mwingile mu sibala nisio ndikho mbaelesia.

³ Nga naboolela Musa, nakhuele ewe ne babaandu base boosi sibala sioosi nisio mucha khu keendakho.

⁴Chinjakha chenywe chicha khwama mu sichiimi, ebunafubo, khukhwola mu bikulu bia Lebanoni, ebunaswa, khukhwama khu luuchi luboofu lwa Efurati, ebukwe, khubirira mu sibala sie Bahiti, khukhwola khu nyanja eya Mediterenia, lubeka lwe mumbo.

⁵ Yoshua, mbao yesi yesi ocha khukhuula ewe mu limenya liowo lioosi tawe. Ndaba nawe nga ne naba ne Musa. Ndaba nawe buli lwoosi. Se nja khukhukwisia namwe khukhulekha tawe.

⁶ Ba ne kamaani ne bunyindaafu. Ocha khuba omwimeelesi owe babaandu bano. Ne bacha khunyoola sibala nisio nalaka bakuuka babwe.

⁷Ba ne kamaani lundi ba omunyindaafu lukali. Okhoya orie lilaka lioosi nilio omukholi wase Musa aakhua. Okhalilekelesia tawe nocha khuba ne bukhili osi osi nio ocha.

⁸Okhoya okhole sitabu sie lilaka sisomwe buli lwoosi. Sieyike siilo ne kumuusi. Okhoya orie buli siindu sisiaandikwamo. Nio oindiaale ne khukhila.

⁹Khebulila oli nakhulakiliisie obe ne kamaani lundi omunyindaafu! Okharia tawe, namwe okhafwa kumwoyo tawe, sikila Ese, Wele Omunyali Owa Bioosi, Wele wowo, ndi ne nawe osi osi niio ocha.”

¹⁰Nio Yoshua alaka babemeelesi

¹¹khucha mu kambi. Baboolela babaandu bali, “Rekekha biakhulia sikila mu ndaalo chitaru mucha khwambukha luluuchi lwa Yoritani khuaamba sibala nisio Wele Omunyali Owa Bioosi, Wele wenywe alikho amuelesia enywe.”

¹² Yoshua aboolela chikholo cha Rubeni ne Kati nende balala khu be ekholo eya Manase ali,

¹³“Khebulila likhuwa nilio Musa, omukholi owa Wele Omunyali Owa Bioosi amulaka ali, Wele Omunyali Owa Bioosi, Wele wenywe akhamuelesie sibala sino lubeka lwe ebukwe owa Yoritani khuba sisienywe mumenyemo.

¹⁴Bakhasi benywe, babaana benywe, bacha khurama ano ne chikhaafu. Ne banamae benywe, bakangile bulwaani bwe liie, bacha khunyoa khukhwambukha ebweeni we Baisiraeli basiaabwe nio babayeete.

¹⁵Mulikhola murio nabwila banyoola kamaloba mumbo mwa Yoritani niko Wele Omunyali Owa Bioosi, Wele wenywe abaelesia. Chikholo che Baisiraeli choosi ne chimalile khunyoola kumuleembe ne kamaloba kabwe munyala mwakobola mala mwamenya mu maloba kenywe ebukwe owa Yoritani, sibala nisio Musa, omukholi owa Wele Omunyali Owa Bioosi abaelesia.”

¹⁶Bakobosia Yoshua bali, “khucha khukhola buli sisiindu nisio okhubooleele ne khucha oosi oosi niio okhuruma.

¹⁷Khucha khukhuria nga ne khwarichanga Musa. Nono Wele Omunyali Owa Bioosi, Wele wowo akhoya abe ne nawe nga aba ne Musa.

¹⁸Yesi yesi olekelesia bunyali bwowo namwe alekhe khuria lilala khu malaka kowo, acha khwirwa. Ba ne kamaani ne bunyindaafu!”