Read lubukusu Yosh. 10 Bible Online

Yosh. 10 - lubukusu bible

Yosh. 10

¹Atoni-Seteki, omwami owa Yerusalemu[4], aulila bali Yoshua aaba abukuule ne khukhwonakila elala lukoba lwa Ai lundi erire omwami walwo, nga nilwo aakhola khu Yeriko ne omwami walwo. Lundi aaulila bali babaandu be e Kibeoni baba bakholile endakaano eye kumuleembe ne Baisiraeli lundi baba babamenyilemo.

²Atoni-Seteki aria lukali sikila Kibeoni lwaba lukoba luboofu nga chingoba chichiindi chichaba ne babaami. Kibeoni lwaba lukoba luboofu khukhila lukoba lwa Ai, ne babaandu balwo baba be kamaani.

³Nono Atoni-Seteki omwami owa Yerusalemu aruma likhuwa khu mwami Hohamu owa Heburoni, omwami Piramu owa Yarimuti, Yafia, omwami owe Lakishi, ne omwami Tebiri owa Ekironi.

⁴Ababoolela ali, “Yiicha munjeete mala khwibwaakale lukoba lwa Kibeoni, sikila babaandu balwo bakholile kumuleembe ne Yoshua ne babaandu ba Isiraeli.”

⁵Babaami baraano be Baamori: omwami owa Yerusalemu, omwami owa Heburoni, omwami owa Yarimuti, omwami owa Lakishi, ne omwami owa Ekironi, babuusia banamae babwe mala bacha e Kibeoni, balusira mala balwibwaakala.

⁶Babaandu be lukoba lwa Kibeoni barumira Yoshua likhuwa mu kambi eyaba e Kilikali bali, “Okhakhulekha tawe! Yiicha khangu okhuyeete mala okhuonie! Babaami boosi be Baamori babaamenya mu sibala sie bikulu babuusiisie alala banamae babwe mala bakhwibwakaale.”

⁷Nio Yoshua ne banamae bewe boosi, alala ne babaandu bewe be kamaani, baniina khukhwama e Kilikali.

⁸Wele Omunyali Owa Bioosi aboolela Yoshua ali, “Okhabariakho tawe. Namalile khukhua bukhili khale. Mbao khu nibo ocha khukhwima ebweeni wowo tawe.”

⁹Siilo siosi Yoshua ne banamae bewe bakeenda khukhwama e Kilikali boola e Kibeoni, mala bebwaakala Baamori matundubiikha.

¹⁰Wele Omunyali Owa Bioosi akhola Baamori bareenga ebweeni we banamae ba Isiraeli. Baisiraeli baberera e Kibeoni mala babatimania khubirira khu muyila khubira emwaalo owa Beti-horoni. Bachiililila khubaapa khukhwola ebunafubo e Aseka ne Maketa.

¹¹Ne nga Baamori ne baaba ne belukha banamae ba Isiraeli, Wele Omunyali Owa Bioosi akhola kamaarara kamaboofu khukhwama khwikulu kabapila khu ngila, khukhwola e Aseka mala bafwa. Bakali beerwa ne kamaarara khukhila nibo Baisiraeli beera ne embalu.

¹²Endaalo niyo Wele Omunyali Owa Bioosi aaelesia Baisiraeli bukhili khu Baamori, Yoshua alomaloma ne Wele Omunyali Owa Bioosi ebweeni we Baisiraeli ali, “Enyanga, yiima khungaaki khwa Kibeoni, Ne ewe kumwesi, yiima khungaaki khwe litooma lia Aiyaloni.”

¹³ Enyanga yema alala ne kumwesi kwema khukhwola nga ekholo eya Isiraeli ne yeyaacha basiku babwe. Lino liaandikwa mu sitabu sia Yasiari lili; “Enyanga yema akari we likulu ne se yakwa khu ndaalo yoosi tawe.”

¹⁴Se yabakhoo endaalo nga eyo namwe ekhabaakhoo endaalo ekiindi nga endaalo eyo niio Wele Omunyali Owa Bioosi aaulila omundu tawe. Wele Omunyali Owa Bioosi apanila Isiraeli.

¹⁵Enyuma wa kano Yoshua ne banamae bewe bakobola mu kambi e Kilikali.

¹⁶Babaami be Baamori baraano, kakhaba kario, baba beluukhe mala bekisile mwibina lie e Maketa.

¹⁷Omundu mulala abanyoola, mala aboolela Yoshua niio bekisile.

¹⁸Nio Yoshua aloma ali, “Piringisia kamabaale kamaboofu kafuunikhe e muliango we libina elio. Rayo baliindi ebweeneyo,

¹⁹ne kakhali enywe mwabeene mukhekhalayo tawe. Tima khu basiku mala mubebwaakale khukhwamila enyuma, mukhabalekha boola mungoba chabwe tawe! Wele Omunyali Owa Bioosi, Wele wenywe amuelesie bukhili khu nibo.”

²⁰Yoshua ne Baisiraeli beera basiku. Ne kakhali balala banyala khukhwilukhila mungoba chabwe chisire, khwirwa tawe.

²¹Nio babaandu boosi bakobola khu Yoshua bulayi mu kambi e Maketa. Mbao omundu yesi yesi mu sibala owakhakakho khukuta Baisiraeli tawe.

²²Nio Yoshua aloma ali, “Ikulayo emuliango we libina mala mundeerere babaami baraano abo.”

²³Khwako libina liekulibwa, ne babaami ba Yerusalemu, Heburoni, Yarimuti, Lakishi, ne Ekironi barusibwa enje.

²⁴Mala bayila babaami abo khu Yoshua. Yoshua alanga babaandu boosi ba Isiraeli. Aboolela bakhulu be banamae ba baaba ne bachile ne naye ali, “Yiicha siimbi mala mure bikele bienywe khu makosi ke babaami bano.” Nio becha siimbi mala bara bikele biabwe khu makosi ke babaami abo.

²⁵Nio Yoshua ababoolela ali, “Mukharia namwe mwafwa kimiooyo tawe. Ba ne kamaani ne bunyindaafu, sikila kano niko Wele Omunyali Owa Bioosi acha khukholela basiku benywe boosi nibo mulipana nabo.”

²⁶Enyuma wako, Yoshua eera babaami baraano abo mala abasuunga khu mirongooro kiraano. Basikala khu mirongooro ekio khukhwola ekolooba.

²⁷Oli enyanga echa khukwa, Yoshua arusia lilaka kimibili kiabwe kiasungulwa mala bakimwaata mwibina nimwo abeele baba ne bekisile. Bara kamabaale kamaboofu e muliango we libina. Kamabaale ako kasiilio khukhwola luno.

²⁸Yoshua aamba lukoba lwa Maketa endaalo eyo mala aluulila elala ne omwami walwo khulwe khurumikhira embalu. Abunisilia elala buli mundu mu lukoba olwo, mbao niye alekha tawe. Akhola khu mwami owa Maketa niko akhola khu mwami owa Yeriko.

²⁹Nio Yoshua ne Baisiraeli boosi bacha khukhwama e Maketa boola mu lukoba lwa Libuna, mala balwibwaakala.

³⁰Wele Omunyali Owa Bioosi lundi aelesia Baisiraeli bukhili khuula lukoba luno no mwami walwo. Beera bamenywa bamwo boosi khuramiakho akhaba omundu namulala yeng'ene tawe. Bakhola omwami walwo niko bakholela omwami owa Yeriko.

³¹Enyuma wa kano, Yoshua ne Baisiraeli boosi bacha khukhwama e Libuna bola khu lukoba lwa Lakishi, balukara mala balwibwaakala.

³²Wele Omunyali Owa Bioosi aelesia Baisiraeli bukhili khuula Lakishi mu ndaalo ekhola khabili eye liie. Baluulila elala khulwe khurumikhira embalu. Beera buli mundu walwo, nga nilwo bakhola Libuna.

³³Omwami Horamu owa Keseri echa khuabina Lakishi. Yoshua amwiira ne babaandu bewe ne se abakhoo owarama tawe.

³⁴Nio, Yoshua ne Baisiraeli boosi bacha khukhwama e Lakishi boola mu lukoba lwa Ekironi, balusira mala balwibwaakala.

³⁵Baluaamba, endaalo eyo ne khuluulila elala khulwe khurumikhira embalu. Babunisilia elala buli omundu mu lukoba omwo endaalo eyo nga bakhola e Lakishi.

³⁶Enyuma wa kano, Yoshua ne Baisiraeli boosi baniina khukhwama Ekironi khukhwola mu Heburoni.

³⁷Balwibwaakala mala baluaamba. Baluulila elala ne omwami owe mu lukoba ne chingoba chalwo chindiiti, ne buli mundu khulwe khurumikhira embalu. Se baramiakho omundu tawe, nga bakhola khu Ekironi, balubunisilia elala nende buli mundu walwo.

³⁸Nio Yoshua ne Baisiraeli boosi bakobola e Tebiri mala balwibwaakala.

³⁹Aluaamba no mwami walwo ne chingoba chalwo chindiiti choosi. Bachiulila elala, nende buli mundu owalwo khulwe khurumikhira embalu. Se baramiakho omundu tawe. Bakholela Tebiri no mwami walwo nga nilwo bakholela Heburoni ne Libuna ne babaami balwo.

⁴⁰Nono Yoshua aula sibala sioosi. Akhila babaami be sibala sie mu bikulu bie ebukwe, ne mumaayo mwe bikulu bie mumbo, alala ne naabo be mungoongo lubeka lwe ebunafubo. Se alekhakho na mulala tawe. Buli mundu erwa. Lino nilio Wele Omunyali Owa Bioosi owa Isiraeli alaka.

⁴¹Yoshua aula khukhwama e Kadeshi-barinea, lubeka lwe ebunafubo, khukhwola e Kasa ne sibala sioosi sia Kosieni khukhwola e Kibeoni.

⁴²Yoshua aula babaami be bibala bino bioosi mu khupana lulala, sikila Wele Omunyali Owa Bioosi, Wele owa Isiraeli, apanila Isiraeli.

⁴³Enyuma wa kano, Yoshua ne banamae bewe bakobola mu kambi e Kilikali.