Read lubukusu Yosh. 11 Bible Online

Yosh. 11 - lubukusu bible

Yosh. 11

¹Efuma eye khuula khwe Baisiraeli yolela omwami Yabini owa Hasori. Yabini arumania likhuwa khu mwami Yobabu owa Matoni ne khu baami be Shimuroni ne Akishafu,

²ne khu baami be mu sibala sie bikulu lubeka lwe bunaswa. Arumania khu baami be mwitooma lia Yoritani lubeka lwe ebunafubo we Enyanja eya Kinereti, mu bikiingi, ne khu lukhingiki embi e Tori.

³Lundi arumania likhuwa khu Bakanaani ba baaba chimbeka chombi cha Yoritani ne khu Baamori, Bahiti, Baperisi, ne Bayebusi mu sibala sie bikulu, akhaba ne khu Bahibi ba baamenya mu maayo mwe sikulu sia Herimoni mu sibala sie Misipa.

⁴Babaami bano becha ne banamae babwe boosi, mala baba bakali nga kumuyekhe. Becha ne chifarasi chingali ne kamakaari.

⁵Babaami bano boosi baambania banamae babwe mala babusiana alala a meechi ka Meromu, nio bapane ne Isiraeli.

⁶Wele Omunyali Owa Bioosi aboolela Yoshua ali, “Okhabaria tawe. Nga mu siise sino muchuli ndaba nabareere mu bunyali bwa Isiraeli. Mukhareme kimikotio kie chifarasi chabwe ne khukhwosia kamakaari kabwe.”

⁷Khwako Yoshua ne babaandu bewe be liie babebwaakala matundubiikha a meechi ka Meromu.

⁸Wele Omunyali Owa Bioosi aelesia Baisiraeli bukhili, mala Baisiraeli babebwaakala ne khubatimania khukhwola lubeka lwe ebunaswa, khukhwola e Misirefoti-maimu ne e Sidoni, ne lubeka lwe ebukwe khukhwola mwitooma lia Misipa. Khu khuupana khwachiililila khukhwola nga basiku ne bafwa boosi.

⁹Yoshua abakholela nga Wele Omunyali Owa Bioosi ne aamulaka: aarema kimikotio kie chifarasi chabwe ne khukhwosia kamakaari kabwe.

¹⁰Yoshua akobola mu siise sienesio, aamba lukoba lwa Hasori mala eera Omwami walwo. (Mu siise esio Hasori nilwo lulwaba lukoba lulwemeelela chingoba chino choosi.)

¹¹Beera buli mundu, ne lukoba lwa Asori lwosibwa, mbao owalekhwa omulamu tawe.

¹²Yoshua aamba chingoba chino choosi ne babaami baacho ne khukhwira buli sia mulala, nga Musa, omukholi owa Wele Omunyali Owa Bioosi ne aalaka.

¹³Kakhaba kario, Baisiraeli se boosia lukoba lwosi lwosi lwe chingoba chichombakhwa khu biili tawe, ne lukhali lukoba lwa Hasori, nilwo Yoshua osia.

¹⁴Babaandu ba Isiraeli babukula bibiindu bioosi bie bukhala ne chikhaafu khukhwama mungoba chino biaba bibiaabwe. Ne kakhali beera buli mundu.

¹⁵Nga Wele Omunyali Owa Bioosi ne aaelesia kamalaka kewe khu mukholi wewe Musa, Musa naye akaelesia Yoshua, ne Yoshua aakhola buli siindu nisio Wele Omunyali Owa Bioosi aalaka Musa.

¹⁶Yoshua aamba sibala sioosi. Aamba sibala sie mu bikulu nende sie mu maayo, e bunaswa ne ebunafubo, sirekere sioosi sia Kosieni ne lukoongo lwe sibala ebunaswa wasio, akhaba ne litooma lia Yoritani.

¹⁷Sibala siabalaa khukhwama khu sikulu sia Halaki lubeka lwe ebunafubo embi Edomu, khukhwola Baalakati ebunafubo. Sibala sino siabalaa sioola mwitooma lia Lebanoni, ebunafubo we sikulu sia Herimoni. Aamba babaami abapa ne khubera boosi.

¹⁸Yoshua apana liie ne babaandu be bibala bino khulwe siise sileeyi.

¹⁹Mbaao lukoba lulwakhola endakaano eye kumuleembe ne babaandu ba Isiraeli ne lukhali lwa Kibeoni, nilwo Bahibi bamenyamo tawe. Chichiindi choosi chaulwa mwiie.

²⁰ Wele Omunyali Owa Bioosi akhola kimiooyo kie babaandu bano khuba kimilume nio bapane ne Isiraeli. Nio boosi babunila elala mala khukholelwa siisa tawe, nga Wele Omunyali Owa Bioosi ne aalaka Musa.

²¹Mu siise sino Yoshua acha mala abunia ekholo eye Baanaki ba baamenya mu sibala sia Heburoni, Tebiri, Anabu, ne mu sibala sioosi sie sikulu sia Yuda ne Isiraeli. Yoshua ababunisilia elala ne chingoba chabwe.

²²Mbao Omuanaki na mulala owalekhwa mu sibala sia Isiraeli tawe. Ne kakhali batiiti barama mu Kasa, Katihi, ne Ashitoti.

²³Nono Yoshua aamba sibala siosi, nga Wele Omunyali Owa Bioosi ne aalaka Musa. Yoshua aelesia Baisiraeli sibala nga kumukabwa. Akaba bitonyi khuloondekhana ne chikholo che Baisiraeli, mala sibala siaba ne kumuleembe khukhwama khu liie.