Read lubukusu Yosh. 13 Bible Online

Yosh. 13 - lubukusu bible

Yosh. 13

¹Nono Yoshua aaba omusaakhulu ne kimiiko kimikali Wele Omunyali Owa Bioosi amuboolela ali, “Ewe oli omusaakhulu ne kimiiko kimikali ne kamaloba kasiilio kamakali kakenyekhana khubukulwa.

²Kamaloba karamire koosi kali: ka Filisiti ne Keshuri,

³akhaba ne kamaloba koosi ka Abimu elubeka lwe ebunafubo. (Kamaloba khukhwama khu luuchi lwa Sihori, khu lwakha lwa Misiri, khukhwola ebunaswa khu lwakha lwa Ekironi kebaasibwa khuba ke Bakanaani, Babaami be Bafilisiti bamenya e Kasa, Ashitoti, Ashikeloni, Kati ne Ekironi.)

⁴Kamaloba koosi ke Bakanaani kasiliinge busa, ne Meara (kasiili ke Basidoni) khukhwola Afeka, khu lwakha lwe Baamori,

⁵kamaloba ke Bakebali, Lebanoni yoosi lubeka lwe bukwe, khukhwama Baalikati, mu maayo mwe sikulu sia Herimoni khukhwola khukhwingilila khwa Hamasi.

⁶ Kamaloba kakaandi kano kaaramire kali kamaloba koosi ke Basidoni, bamenyile mu sibala sie sikulu akari we bikulu bia Lebanoni ne Misirefoti-maimu. Nja khutimania babaandu bano bosi barure nga Baisiraeli ne bechamo. Okhoya okabanie kamaloba khu Baisiraeli nga nakhulaka khukhola.

⁷Khwako, kabania kamaloba kano khu kholo tisa ne balala khu be kholo eya Manase, kabe nga kumukabwa kwabwe.”

⁸ Chikholo cha Rubeni ne Kati nende balala khu kholo eya Manase baba banyoola kamaloba kabwe. Musa, omukholi owa Wele Omunyali Owa Bioosi, abaelesia kamaloba kakaba elubeka lwe bukwe we luluuchi lwa Yoritani.

⁹Kamaloba kabwe kamalatana khukhwama Aroeri (khu sikiingi sie litooma lia Arinoni) ne lukoba lulwaba akari we litooma elio ne kumweyeywe kwosi khukhwama e Meteta khukhwola e Diboni.

¹⁰Chingoba choosi chichaba asi we bubwami bwo Omwami Sihoni owe Baamori, owamiia khukhwama mu lukoba lwa Heshiboni chaba mu maloba kano.

¹¹Kileati ne bibala bia Keshuri, ne Maaka, ne sikulu sia Herimoni sioosi, ne Bashani yoosi khukhwola Saleka.

¹²Bubwami bwoosi bwa Oku mu Bashani owamiia Asitaroti ne Etirei. Oku yeng'ene niye owarama mu batiiti ba Efuraimu. Musa aula babaandu bano ne khubatimania barure mu maloba kabwe.

¹³Ne kakhali Baisiraeli se batimania babaandu ba Keshuri ne Maaka tawe. Khwako basimenya mu Isiraeli khukhwola luno.

¹⁴ Ekholo niyo Musa akhaelesia kumukabwa kwe kamaloba tawe yaba eya Lawi yong'ene. Nga Wele Omunyali Owa Bioosi ne aababoolela ali, kumukabwa kwabwe kwaba bilala khu biianwa bibiosebwa khu alutare khulwa Wele Omunyali Owa Bioosi owa Isiraeli.

¹⁵Musa aelesia kumukabwa khu kholo eya Rubeni khuloondekhana ne babaandu ba buli luuya mu kholo eyo.

¹⁶Kamaloba kabwe kamalatana khukhwola Aroeri (khulukhingiki lwe Litooma lia Arinoni) ne lukoba luuli akari we litooma elio. Kamaloba ke kumweyeywe ka kakara Meteba kabamo.

¹⁷Heshiboni ne chingoba choosi che kumweyeywe, chichaba Diboni, Bamoti-Baali, Beti-Baalimeoni,

¹⁸Yahasi, Ketemoti, Mefati,

¹⁹Kiriataimu, Sibima, Sereti-Sahari khu sikulu sie mwitooma,

²⁰Beti-peori, mu bikulu bia Pisika, ne Beti-yeshimoti, choosi chabamo.

²¹Kamaloba ke kholo eya Rubeni kabamo lundi chingoba choosi che kumweyeywe ne bubwami bwosi bwo mwami Sihoni owe Baamori, owamiia khukhwama Heshiboni. Musa aula Sihoni, ne babaami Bamidiani ba baaba Efi, Rekemu, Suri, Huri, ne Reba. Boosi baamiia sibala khulwo mwami Sihoni.

²²Mu baandu nibo Baisiraeli beera ne embalu, abamo omufumu Balamu okhwa Beori.

²³Luluuchi lwa Yoritani lwaba lulwakha lwe mumbo lwe kholo eya Rubeni. Chingoba chichekesiibwe mu nyilili chino chaba chingoba nicho bakabila lisaaye lie kholo eya Rubeni nga kumukabwa kwabwe khuloondekhana ne chinju chabwe.

²⁴Musa lundi aakaba kumukabwa kwe kamaloba khu kholo ya Kati khuloondekhana ne kimiliango kiabwe.

²⁵Kamaloba kabwe kabaamo Yaseri ne chingoba chosi cha Kileati, malala khu maloba ka Amoni khukhwola Aroeri, kaali ebukwe owa Raba.

²⁶Kamaloba kabwe kamalatana khukhwama Heshiboni khukhwola Ramati-Misipe ne Betonimu, khukhwama Mahanaimu khu lwakha lwa Tebiri.

²⁷Ne mwitooma lia Yoritani kaba kamaloba ka Beti-haramu, Beti-nimura, Sukoti, Safoni, ne sibala sioosi sisiaba sio mwami Sihoni owa Heshiboni; lubeka olwo lwoosi lwaba ebukwe wa Yoritani khukhwola emwaalo khu siakamo sie nyanja eya Kinereti.

²⁸Chingoba chino ne birekere bino nibio bibiaebwa khu miliango kie kholo eya Kati khuba kumukabwa kwabwe.

²⁹Musa aaba aakaba kamaloba malala nga kumukabwa khu lisaaye lilala lia Manase khuloondekhana ne chinju chabwe.

³⁰Kamaloba kabwe kamalatana khukhwama Mahanaimu mala kabamo Bashani ne bubwami bwoosi bwa Oku, omwami owa Bashani, akhaba ne chingoba kamakhumi sita choosi cha Yairi mu Bashani.

³¹Kamaloba kano kabamo e nusu khu maloba ka Kileati akhaba Asitaroti ne Etirei, chingoba chimboofu che bubwami bwa Oku mu Bashani. Chino chosi chaebwa khu balala khu lisaaye liliama khu Makiri okhwa Manase, khuloondekhana ne kimiliango kiabwe.

³²Kimikabwa ekio nikio Musa akabania ebukwe owa Yeriko ne Yoritani mu mweyeywe kwa Moabu.

³³ Ne kakhali se aakho kumukabwa khu kholo eya Lawi tawe. Wele Omunyali Owa Bioosi, Wele owa Isiraeli, ali kumukabwa kwabwe nga ne aababoolela.