Read lubukusu Yosh. 14 Bible Online

Yosh. 14 - lubukusu bible

Yosh. 14

¹Kino kili kimikabwa kie Baisiraeli khu maloba ke sibala sia Kanaani, niko Omusaayi Eliesa, Yoshua okhwa Nuni, ne babemeelesi be lisaaye lie chikholo cha Isiraeli bakaba.

² Nga Wele Omunyali Owa Bioosi ne aalaka Musa, kamaloba ke chikholo tisa ne nusu elubeka we mumbo mwa Yoritani kakabwa khulwe khukhupa chikura.[6]

³ Musa aaba aamala khukaba kamaloba elubeka we bukwe owa Yoritani khu kholo chichiindi chibili na ndala khu chibili.

⁴(Be lisaaye lia Yosefu baba chikholo chibili: Manase ne Efuraimu.) Musa se aelesia Balawi sitonyi sie kamaloba tawe. Ne kakhali, banyoola chingoba nicho bamenyamo, ne kamaayilwe ke chikhaafu ne bibiaayo biabwe.

⁵Baisiraeli bakaba kamaloba nga Wele Omunyali Owa Bioosi ne aalaka Musa.

⁶ Endaalo ndala babaandu khukhwama mu kholo eya Yuda bacha khu Yoshua e Kilikali. Mulala khu nibo, Kalebu okhwa Yefune, omukenisi, aboolela Yoshua ali, “Omanyile niko Wele Omunyali Owa Bioosi aaboolela Musa omundu owa Wele mu Kadeshi-barinea khwiwe ne nase.

⁷ Naba ne bukhulu bwe kimiiko kamakhumi kane nga omukholi owa Wele Omunyali Owa Bioosi Musa ne anduma khukhwama Kadeshi-barinea khukhola buyooti mu sibala sino. Ne namureerera e ripoti eya ng'ali nga nilwo nasuubila mu mwoyo kwase.

⁸Ne kakhali babaandu babaacha nase, bakhola babaandu befwe baria. Ne ese neyikina Wele Omunyali Owa Bioosi, Wele wase.

⁹ Nga neyikina Wele Omunyali Owa Bioosi, Musa anjichubila ali, kamaloba niko nakeendakho kaliba kumukabwa kwase ne babaana base mindali.

¹⁰Ne luno, lola kiaweele kimiiko kamakhumi kane na kiraano khukhwama nga Wele Omunyali Owa Bioosi ne aboolela Musa ario. Abwenao yaba Isiraeli basikeenda khubirira mu sichiimi. Wele Omunyali Owa Bioosi nga ne echuba, asiniinda khukhwola luno. Luno endi ne bukhulu bwe kimiiko kamakhumi munaane na kiraano.

¹¹Siili busa ne kamaani luno bulayi bwene nga ne naba endaalo niyo Musa andumira. Siilii ne kamaani khu khuupana liie namwe khukhola kimilimo kiosi kiosi.

¹²Nono luno, mbe ese sibala sie sikulu nisio Wele Omunyali Owa Bioosi aandaka endaalo eyo. Ewe waulila oli babaandu baboofu ba balaangwa Baanaki babaayo mu ngoba chimboofu che kamasiisi. Wakana Wele Omunyali Owa Bioosi acha khuba nase, ne nja khubatimania baruremo, nga nilwo Wele Omunyali Owa Bioosi aaloma.”

¹³Nio Yoshua abiita Kalebu okhwa Yefune chikhabi mala amua lukoba lwa Heburoni nga kumukabwa kwewe.

¹⁴Nono Heburoni lwekhola lukoba lwe lisaaye lia Kalebu okhwa Yefune omukenisi, khukhwola luno sikila eyikina Wele Omunyali Owa Bioosi, Wele owa Isiraeli.

¹⁵Kano ne kakhabao tawe, Heburoni lwalaangwa lukoba lwa Kiriati-Ariba (Ariba aaba omundu omukhulu owe Baanaki.) Nio kumuleembe kwabao mu sibala, liie khubaao tawe.