Read lubukusu Yosh. 15 Bible Online

Yosh. 15 - lubukusu bible

Yosh. 15

¹Kamaloba ka kaakabwa Lisaaye lie ekholo eya Yuda kakabwamo khuloondekhana ne kimiliango kiabwe. Kamaloba kamalatana khucha ebunafubo khu lwakha lwa Edomu, mu sichiimi sia Sini ebunafubo aleeyi.

²Ne lulwakha lwabwe lwe ebunafubo lwama khundulo khwe Nyanja eya chumbe khukhwama khu mukhono kwe enyanja kukwaloleelela ebunafubo.

³Lwacha elubeka we ebunafubo khukhwama khu ngila eya Akirabimu ne khukhwola khu Sini. Lwacha lwola elubeka we ebunafubo owa Kadeshi-barinea, mala lwabira Hesironi lwola khu Atari. Khukhwama abwenao lwakobola lwola e Karika mala,

⁴lwacha lwola Asimoni. Lwaloonda luluuchi khu lwakha lwa Misiri lwola khu nyanja eya Mediterenia. Olwo lwaba lulwakha lwa Yuda elubeka we ebunafubo.

⁵Lulwakha lwe bukwe lwaba Enyanja eya Chumbe, khuchiililila khukhwola niio luluuchi lwa Yoritani luchukhila mu nyanja. Lulwakha lwe ebunaswa lwarakikhira amukhono kwe nyanja niio luluuchi lwa Yoritani luchukhila mu nyanja,

⁶lwacha lwola khu Beti-Hokula, mala ebunaswa owa Beti-araba. Nio lwaniina lwola khu libaale lia Bohani okhwa Rubeni.

⁷Nio lulwakha lwe ebunaswa luno lwacha khukhwama mwitooma lia Akori khukhwola khu Tebiri, mala lwakobola lwe bunaswa lwalola e Kilikali eli siimbi ne ngila echa Atumimu elubeka we ebunafubo we litooma. Khukhwama abwenao lulwakha lwacha khukhwola khu meechi ka Eni-Siemesi nende ka Enirokeli.

⁸Nio lulwakha lwaniina lwabirira mwitooma lia Beni-Hinomu lubeka lwe ebunafubo we lukoba lwe Bayebusi (lulwalaangwa Yerusalemu). Mala lulwakha lwachiililila khuniina khukhwola khu ngaaki khwe sikulu elubeka lwe mumbo mwe Litooma lia Hinomu, elubeka we khumaliilikha khwe ebunaswa we Litooma lie Barefaimu.

⁹Khukhwama khu ngaaki khwe sikulu lulwakha lwacha lwola khu moni eye luluuchi lwa Nefutoa ne khucha khukhwola khu ngoba chichaba siimbi ne sikulu sia Efuroni. Abwenao lulwakha lwakobola lwalola Baala (lukoba lulwalaangwa Kiriati-Yearimu).

¹⁰A Baala ao lulwakha lwaukha lwacha elubeka we mumbo mwa Baala khucha e sikulu sia Seiri. Lwachiililila elubeka we ebunaswa we sikulu sie Yearimu (namwe Kesaloni), lwola e Beti-shemesi. Khukhwama abwenao lwabirira e Timuna.

¹¹Lulwakha lwacha lwoola a sikula elubeka we ebunaswa owa Ekironi. Khukhwama abwenao lwakobola lwacha e Sikeroni, lwabirira khu sikulu sia Baala, mala lwacha Yabineeli lwola khu nyanja eya Mediterenia.

¹²Enyanja eya Mediterenia ne chinjakha chayo nibio bibiaba lulwakha lwe lubeka lwe mumbo. Olwo nilwo lulwakha lulwabotookhelela babaandu ba Yuda khuloondekhana ne kimiliango kiabwe.

¹³ Nga Wele Omunyali Owa Bioosi ne aalaka Yoshua, sitonyi sie kamaloba ka Yuda kaebwe khu Kalebu okhwa Yefune, khukhwama mu kholo eya Yuda. Kalebu anyoola lukoba lwa Heburoni, lukoba lulwaba lwa Ariba (Ariba, raraawe owa Anaki).

¹⁴Kalebu atimania lisaaye lia Anaki khurura mu lukoba, chikholo cha Sheshai, Ahimani, ne Talimai.

¹⁵Khukhwama abwenao acha khusera babaandu ba baamenya mu Tebiri (lukoba luno khale lwalaangwa luli Kiriati-Seferi.)

¹⁶Nio Kalebu aloma ali, “Omundu yesi yesi ocha khukhwibwaakala Kiriati-Seferi mala alubukule, ese ndamuelesia omwana wase omukhaana abe omukhasi wewe.”

¹⁷Nio Otinieli, okhwa Kenasi (Kenasi aba wandaaye owa Kalebu), aamba lukoba olwo. Kalebu amua omukhaana Akisa abe omukhasi wewe.

¹⁸Nga aamwichakho, Akisa aboolela Otinieli areebe raraawe Kalebu amue kumukuunda. Akisa aaba ekhaale khu punda. Nga ne ekha asi khukhwama khu punda yewe, Kalebu amureeba ali, “Wenya siina?”

¹⁹Akisa akobosia ali, “Mbelesie siianwa, sikila kamaloba niko ewe wambeelesia kali mu sibala sisioomu. Mbelesie ne chisebele che kameechi chosi.” Nio Kalebu aelesia Akisa chisebele che kameechi che ngaaki nende che mwaalo.

²⁰Kuno nikwo kumukabwa kwe ekholo eya Yuda khuloondekhana ne kimiliango kiabwe.

²¹Chingoba che ekholo eye babaandu ba Yuda chaba ebunafubo lukali lubeka lwe lulwakha lwa Edomu, chaba Kabuseeli, Eteri, Yakuri,

²²Kina, Timona, Atata,

²³Keteshi, Hasori, Itinani,

²⁴Sifi, Telemu, Beoloti,

²⁵Hasori-Hatata, Kerioti-Hesironi (namwe Hasori),

²⁶Amamu, Shema, Molata,

²⁷Hasar-Kada, ne Heshimoni, Beti-peleti,

²⁸Hasari-shueli, Beerisheba, Bisiotia,

²⁹Baala, Limu, Esemu,

³⁰ne Elitolati, ne Kesili, ne Horima.

³¹Sikilaki, Matimana, Sanisana,

³²Lebaoti, Shilihimu, Aini, Rimoni. Choosi chaba chingoba kamakhumi kabili ne tisa, alala ne birekere biacho.

³³Chingoba chichaba mumaayo mwe sikulu chaba Eshitaoli, Sora, Ashina,

³⁴Sanoa, Enganimu, Tapua, Enamu,

³⁵Yarimuti, Atulamu, Soko, Aseka,

³⁶Shaaraimu, Atitaimu, Ketera, ne Keterotaimu. Choosi chaba chingoba likhumi ne chine, alala ne birekere biacho.

³⁷Lundi chabayo chingoba cha Senani, Hatasia, Mikitalikati,

³⁸Tileani, Misipa, Yokiteli,

³⁹Lakishi, Bosikati, Ekironi,

⁴⁰Kaboni, Lamami, Kitilishi,

⁴¹Keteroti, Beti-takoni, Nahama ne Maketa. Choosi chaba chingoba likhumi ne sita, alala ne birekere biacho.

⁴²Lundi chabayo chingoba cha Libuna, Eteri, Ashani,

⁴³Yifuta, Ashina, Nesibu,

⁴⁴Keila, Akisibu, Maresha. Choosi chaba chingoba tisa, alala ne birekere biacho.

⁴⁵Lundi baebwa lukoba lwa Ekironi alala ne chingoba chalwo ne birekere biacho,

⁴⁶khukhwama Ekironi khukhwola khu nyanja eya Mediterenia, bioosi bibiaba lubeka lwa Ashitoti ne birekere biabio.

⁴⁷Lwabayo Ashitoti ne Kasa, alala ne chingoba chabwe ne birekere khukhwola khu lwakha lwa Misiri ne khundulo khwe nyanja eya Mediterenia.

⁴⁸Chingoba chichaba mu sibala sie bikulu chaba Shamiri, Yatiri, Soko,

⁴⁹Tana, Kiriati-Seferi (namwe Tebiri),

⁵⁰Anabu, Ashitemoa, Animu,

⁵¹Kosieni, Holoni, ne Kilo. Choosi chaba chingoba likhumi ne lulala, alala ne birekere biacho.

⁵²Baebwa akhaba chingoba cha Arabu, Tuna ne Eshani,

⁵³Yanimu, Beti-Tapua, Afeka,

⁵⁴Humuta, Kiriati-Ariba (nilwo Heburoni) ne Siori. Choosi chaba chingoba tisa, alala ne birekere biacho.

⁵⁵Lundi baebwa chingoba cha Maoni, Karimeli, Sifu, Yuda,

⁵⁶Yesireeli, Yokiteamu, Sanoa,

⁵⁷Kaini, Kibea, Timuna, choosi chaba chingoba likhumi, alala ne birekere biacho.

⁵⁸Chabayo Halihuli, Beti-suri, Ketori,

⁵⁹Maarati, Betamoti, ne Elitekoni: choosi nicho baebwa chaba chingoba sita, alala ne birekere biacho.

⁶⁰Chabayo Kiriati-Baali (namwe Kiriati-Yearimu) ne Raba. Choosi chaba chingoba chibili alala ne birekere biacho.

⁶¹Mu sichiimi mwabamo Beti-araba, Mitini, Sekaka,

⁶²Nibushani, lukoba lwa chumbe, ne Engedi. Choosi chaba chingoba sita, alala ne birekere biacho.

⁶³ Ne kakhali babaandu ba Yuda bakhilwa khutimania Bayebusi, ba baamenya mu Yerusalemu. Bayebusi basimenya alala ne babaandu ba Yuda khukhwola luno.