Read lubukusu Yosh. 16 Bible Online

Yosh. 16 - lubukusu bible

Yosh. 16

¹Kamaloba ka kaakabwa khu lisaaye lia Yosefu karakikhira siimbi khu luuchi lwa Yoritani ebukwe we kameechi ka Yeriko, khubirira mu sichiimi, khukhwola e sibala sie bikulu ne khucha khukhwola Beteli.

²Khukhwama e Beteli, lulwakha lwamalatana khukhwola Lusu, lwachiililila lwola khu Ataroti-atari, niio Baariki bamenya.

³Mala lwacha elubeka we mumbo elubeka we Bayafuleti, khukhwola elubeka lwe mwaalo owa Beti-horoni. Lwama ao lwacha lwola khu Keseri, mala lwaweela mu nyanja eya Mediterenia.

⁴Lisaaye lia Yosefu, ekholo eya Efuraimu ne ekholo eya Manase eyaba lubeka lwe mumbo, banyoola kamaloba kano nga kumukabwa kwabwe.

⁵Kano kaba kamaloba ke lisaaye lia Efuraimu: Lulwakha lwabwe lwama khu Ataroti-Atari khucha ebukwe khukhwola Beti-horoni eya ngaaki,

⁶mala khukhwama ao khukhwola khu nyanja eya Mediterenia. Mikimetati siaba lubeka lwabwe lwe bunaswa. Ebukwe eye lulwakha lwalola Taanati-shilo mala lwacha lwabirira ebukwe owa Yanoa.

⁷Mala lwekha khukhwama Yanoa lwola Ataroti ne Naara, khukhwola Yeriko mala lwakamila khu luuchi lwa Yoritani.

⁸Lulwakha lwacha lubeka lwe mumbo khukhwama Tapua khukhwola khu luuchi lwa Kana mala lwakama khu nyanja eya Mediterenia. Kano kali kamaloba ka kaakabwa khu lisaaye lie kholo eya Efuraimu nga kumukabwa kwabwe.

⁹Chingoba chindalakho ne birekere bibiaba mu sibala sisiakabwa khu Manase, biatasibwa khu Baefuraimu.

¹⁰ Ne kakhali se batimania Bakanaani ba baamenya mu Keseri khururamo tawe. Nio Bakanaani abo bamenya akari we Baefuraimu khukhwola endaalo eya luno ne kakhali Baefuraimu ba barakho kimilimo kie kamaani nga nasioobi.