Read lubukusu Yosh. 18 Bible Online

Yosh. 18 - lubukusu bible

Yosh. 18

¹Enyuma we khuula sibala, Baisiraeli boosi babusiana e Shilo mala basimikhayo liiema lie kumuse.

²Chabayo chikholo saba che Baisiraeli chichaba ne chisiili khunyoola kumukabwa kwabwe kwe kamaloba.

³Nono Yoshua aboolela Baisiraeli ali, “Mulaliinda khukhwola liina nio mwingile ne khuaamba kamaloba niko Wele Omunyali Owa Bioosi, Wele owe bakuuka benywe, amuelesia?

⁴Khe mumbe babaandu be siseecha bataru khukhwama buli mu kholo. Nenya khubaruma bache khulambuula, mala bachoore epicha eye kamaloba niko mwenya kabe kakenywe, mala bangobolele.

⁵Bacha khukaba kamaloba mu bitonyi saba, lisaaye lia Yuda licha khumenya mu maloba kabwe ebunafubo, ne lisaaye lia Yosefu mu maloba kabwe e bunaswa.

⁶Ne bamalile khuandika kimikabwa saba kie kimikuunda kino banderere. Nio ekhupe chikura[7] ebweeni wa Wele Omunyali Owa Bioosi, Wele wefwe.

⁷Balawi, se balanyoola kumukabwa kwe kamaloba ne nanywe tawe, sikila kumukabwa kwabwe kuli busaayi, khukholela Wele Omunyali Owa Bioosi kimilimo. Chikholo cha Kati, Rubeni, nende balala khu kholo eya Manase chamala khunyoola kamaloba kabwe ebukwe owa Yoritani, niko Musa, Omukholi owa Wele Omunyali Owa Bioosi, aabaelesia.”

⁸Nio Babaandu barakikha lukeendo. Yoshua alaka ba bacha khu choora efwaani eye kamaloba ali, “Cha mulambuule kamaloba koosi, muchoore nga ne kali mala mungobolele. Ne ese ndareeba bunyali bwa Wele Omunyali Owa Bioosi e Shilo.”

⁹Nio babaandu abo bacha balambuula kamaloba mala bachoora efwaani yako mu sitabu, buli lukoba mu bitonyi saba. Nio bakobolela Yoshua mu kambi e Shilo.

¹⁰Yoshua apa chikura khu maloba ako ebweeni wa Wele Omunyali Owa Bioosi mala akaba Baisiraeli buli ekholo ne abuundu wayo.

¹¹Kamaloba ke lisaaye lie ekholo eya Benjamini khuloondekhana ne kimiliango kiayo niko kakanyoa khukabwa. Kamaloba kano kaba akari we chikholo cha Yuda ne Yosefu.

¹²Lulwakha lwabwe lwarakikhira lubeka lwe bunaswa khu Yoritani, mala lwaniina lwacha lwekha mu maayo mwe ebunaswa owa Yeriko. Lundi lwaniina mumbo mwe sibala sie bikulu lwamaliilikhila mu sichiimi sie Beta-beni.

¹³Khukhwama ao lulwakha lwabirira mu maayo ebunafubo lwola Lusi (lisina liliindi bali Beteli). Nio lwekha Atoroti-atari ne khu sikulu sili ebunafubo we emwaalo owa Beti-horoni.

¹⁴Khukhwama Beti-horoni, lulwakha, lwakobola lubeka luluundi lwe mumbo siafubo we sikulu sino mala lwacha khu Kiriati-Baali (namwe Kiriati-Yearimu) luli lwe kholo eya Yuda. Luno nilwo lulwakha lwe mumbo.

¹⁵Lulwakha lwe lubeka lwe siafubo lwarakikhira embi ne Kiriati-Yearimu mala lwacha Efurani lundi lwacha lwola khu numa eye kameechi ka Nefutoa.

¹⁶Nio lwekha mu maayo khu lwakha lwe sikulu sili siimbi ne Litooma lio musoleeli owa Hinomu, khundulo khwe bunaswa we Litooma lia Refaimu. Nio lundi lwacha ebunafubo lwabirira mwitooma lia Hinomu, ebunafubo we lukoba lwe Bayebusi khukhwola Enirokeli.

¹⁷Nio lwakobola lubeka lwe ebunaswa lwacha Enishemeshi mala lundi lwacha e Kililoti, eyaloleelela Engila echa Atumimu. Mala lulwakha lwekha emwaalo khu libaale lia Bohani (Bohani aba okhwa Rubeni)

¹⁸mala lwabirira ebunaswa we lubeka lulwaloleelela Litooma lia Yoritani.

¹⁹Khukhwama eyo, lwabirira e bunaswa we lubeka lwa Beti-Hokula, mala lwamaliilikhila ebunaswa we kumukhono kwe enyanja eya chumbe, niio luluuchi lwa Yoritani luweelamo. Luno nilwo lulwakha lwe ebunafubo.

²⁰Yoritani lwaba lulwakha lwe lubeka lwe ebukwe. Kuno kwaba kumukabwa kwe kholo eya Benjamini khuloondekhana ne kimiliango kiayo buli ekholo ne lulwakha chimbeka choosi.

²¹Chingoba chichaba che kholo eya Benjamini chaba Yeriko, Beti-Hokula, Emeki Kesisi,

²²Beti-araba, Semaraimu, Beteli,

²³Abimu, Para, Ofura,

²⁴Kefari-amoni, Ofuni, Keba: chingoba likhumi ne chibili alala ne birekere biacho.

²⁵Lundi chabayo chingoba cha Kibeoni, Rama, Beeroti,

²⁶Misipa, Kefira, Mosa,

²⁷Rekemu, Iripeeli, Tarala,

²⁸Sela, Haelefu, Yebusi (namwe Yerusalemu), Kibeati, Kiriati-Yearimu: chingoba likhumi na chine alala ne birekere biacho. Kuno nikwo kumukabwa kwe kholo eya Benjamini khuloondekhana ne kimiliango kiayo.