Read lubukusu Yosh. 2 Bible Online

Yosh. 2 - lubukusu bible

Yosh. 2

¹ Nono Yoshua aruma bayooti babili khukhwama mu kambi e Sitimu bache mu bwikisi bamenieelesie sibala sie Kanaani, ne lukali, lukoba lwa Yeriko. Nga ne boola mu lukoba, bacha bakona munju eya Rahabu omueeyani.

²Omwami owa Yeriko aulila bali babaandu Baisiraeli batiiti bari bechile siilo khukhola buyooti mu sibala.

³Nio aruma likhuwa khu Rahabu ali, “Babaandu babechile munju mwowo bechile khukhola buyooti mu sibala sioosi! Barusie enje!”

⁴Ne kakhali Rahabu aba akisile babaandu abo, nio akobosia ali, “Ng'ali babaandu babaandi bechile munju mwase. Ne kakhali se enyala namanya niio bamile tawe.

⁵Bachile enyanga ne elikho ekwa, bilibwa bie mu lukoba ne bikhekalwa tawe. Se manya niio bachile tawe. Ne mwaba ne mubatimakho munyala mwabanyoola.”

⁶(Abeele Rahabu aniiniisie bayooti abo khungaaki khwe enju ne khubakisa, mala ababiimba bunyaasi nibwo aba ne arerekho.)

⁷Nono babaandu bo mwami owa Yeriko batima khu bayooti Baisiraeli khukhwola mwifubukho lia Yoritani. Ne nga babaandu bo mwami bano barura busa mu lukoba bari, silibwa siekalwa.

⁸Bayooti ne basiili khukona tawe Rahabu aniina khunju

⁹mala ababoolela ali, “Manyile ndi Wele Omunyali Owa Bioosi amuelesie enywe sibala sino. Fweesi mu sibala sino khwamuriire enywe. Enywe mwakhurengiisie. Ne babaandu boosi bayenguukhile kimiooyo ebweeni wenywe.

¹⁰ Khwaulile nga Wele Omunyali Owa Bioosi ne oomia enyanja eya Shamu ebweeni wenywe nga ne mwarura e Misiri. Khwaulile lundi nga ne mwera Sihoni ne Oku, babaami babili be Baamori be bukwe owa Yoritani.

¹¹Nga khwaulila busa khuri, kimiooyo kiefwe kiayenguukhile sikila enywe. Wele Omunyali Owa Bioosi Wele wenywe niye ali niye ooli Wele owe mwikulu ne mu liloba.

¹²Nono khe mwechube khwise mu lisina lia Wele Omunyali Owa Bioosi muli mucha khukholela enju yefwe bulayi nga ese emukholeele enywe. Mbelesie simanyisio,

¹³muli mucha khuonia paapa ne maayi, bawandaayase basoleeli ne bakooko basiaase, ne chinju chabwe choosi! Mukhakhulekha khwerwa tawe!”

¹⁴Nio bayooti abo bamuboolela bali, “Bulamu bwefwe buli khwiwe ne bulamu bwowo buli khwifwe! Walekha khuboolelakho omundu yesi yesi niko khulikho khukhola tawe, khukhulaka khuli Wele Omunyali Owa Bioosi ne acha khukhua efwe sibala sino, khucha khukhukholela kamalayi mu busuubilwa.” [1]

¹⁵Rahabu aba amenya munju eyombakhwa khwisiisi lie lukoba, mala ekhisia asi babaandu abo ne kumukoye khubirira mu numa.

¹⁶Aloma ali, “Khe muche mu bikulu, ne busa babaandu bo mwami bacha khu munyoola. Mwikise eyo khu ndaalo chitaru khukhwola nga bakobola. Enyuma waako munyala mwachiililila ne lukeendo lwenywe.”

¹⁷Bayooti baboolela Rahabu bali, “khucha khukhola niko wakhwechubiisie efwe.

¹⁸Ne khulibwaakala sibala sino, kano niko olikhola: oliboa kumukoye kumubesemu kuno mu numa nimwo wakhwikhisila. Olibukula raraao ne maao, bawandaayo be sisoleeli ne lisaaye lia raraao lioosi alala munju yenywe.

¹⁹Omundu yesi yesi ne arura munju mala afwa kumusaango kuliba ku kwewe. Ne omundu se alikhubiiya efwe tawe. Ne kaaba bali omundu yesi yesi oli ne nanywe erwa, aba khubiiye.

²⁰Khebulila oli waboolelakho omundu yesi yesi niko khukholile, aba khucha khuba balekhuule mu niko ewe wakhwechubia.”

²¹Rahabu afukiilila mala abalekha bacha. Ne bamalile khucha, aboa kumukoye kumubesemu mu numa niyo bekhelamo.

²²Bayooti bacha mu bikulu mala bekisa. Babaandu bo mwami baabayima khu muyila kwoosi khu ndaalo chitaru, mala khubanyoola tawe, nio bakobola e Yeriko.

²³Bayooti abo beekha khukhwama mu bikulu, bambukha luluuchi lwa Yoritani mala bakobola khu Yoshua. Bamuboolela buli siindu sisiabekholekhakho.

²⁴Baloma bali, “Khuli na ng'ali khuli Wele Omunyali Owa Bioosi akhueele efwe sibala sia Kanaani sioosi. Babaandu boosi bali ebweeneyo bafwiile kimiooyo sikila efwe.”