Read lubukusu Yosh. 21 Bible Online

Yosh. 21 - lubukusu bible

Yosh. 21

¹Nio babemeelesi be lisaaye lie Balawi bacha khu musaayi Eliesa ne Yoshua okhwa Nuni, ne khu bemeelesi be lisaaye liosi lie chikholo cha Isiraeli.

² Baba e Shilo mu maloba ka Kanaani bababoolela bali, “Wele Omunyali Owa Bioosi aalaka khubirira khu Musa ali khuebwe chingoba nicho khumenyamo, alala ne kamaloba ke kamaayilwe ke chikhaafu chefwe.”

³Nono khuloondekhana ne lilaka lia Wele Omunyali Owa Bioosi babaandu ba Isiraeli baelesia Balawi chingoba chichiindi ne kamaloba ke kamaayilwe khukhwama khu ngoongo chabwe babeene.

⁴Lisaaye lie kumuliango kwe Balawi kwa Kohati nilio lilianyoa khukabwa chingoba. Lisaaye lie Balawi liliama khu musaayi Aruni liaebwa chingoba likhumi ne chitaru khukhwama khu ngoongo cha Yuda, Simioni, ne Benjamini.

⁵Kumuliango kwa Kohati kukwarama kwakabwa chingoba likhumi khukhwama khu chingoongo cha Efuraimu, Dani, ne Manase eye mumbo.

⁶Be kumuliango kwa Kerishoni bakabwa chingoba likhumi na chitaru khukhwama khu maloba ka Isakari, Asheri, Nafutali, ne Manase eye bukwe.

⁷Lisaaye lie kumuliango kwa Merari liakabwa chingoba likhumi na chibili khukhwama khu maloba ka Rubeni, Kati, ne Sebuluni.

⁸Khulwe khu khuupa chikura, babaandu ba Isiraeli bakaba chingoba ne kamaloba kabwe ke kamaayilwe khu Balawi, nga Wele Omunyali Owa Bioosi aalaka khubirira khu Musa.

⁹Kano niko kamasina ke chingoba khukhwama khu maloba ka Yuda ne Simioni ka kaakabwa

¹⁰khu lisaaye lia Aruni, be kumuliango kwa Kohati, enda eya Lawi. Kumukabo kwabwe nikwo kukwanyoa khukholekha.

¹¹Babaelesia lukoba lwa Kiriati-Ariba, (Ariba aaba raraawe owa Anaki). Olwo nilwo lukoba lwa Heburoni, mu sibala sie sikulu sia Yuda, alala ne kamaayilwe ka kalubotookhelela.

¹²Ne kakhali, kimikuunda kie lukoba, alala ne birekere, biaba biamalwa khukabwa khu Kalebu okhwa Yefune nga kumukabo kwewe.

¹³Khutubakho Heburoni (lulala khu ngoba che omwiiri khumulilamo), chingoba chiloondakho chakabwa khu lisaaye lio omusaayi Aruni. Chingoba echo chaba Libuna

¹⁴Yatiri, Eshitemoa, shemeshi,

¹⁵Holoni, Tebiri,

¹⁶Aini, Yuda, ne Beti-shemesi, alala ne kamaayilwe kabwe. Chingoba tisa chichakabwa khukhwama khu kholo cha Yuda ne Simioni.

¹⁷Khukhwama mu ekholo eya Benjamini babaandu ba Aruni lundi bakabwa chingoba chine: chingoba chino chaba, Kibeoni, Keba,

¹⁸Anatoti, ne Alumoni, alala ne kamaloba ke kamaayilwe kabwe.

¹⁹Nono chingoba likhumi ne chitaru choosi alala ne kamaloba ke kamaayilwe biakabwa khu basaayi, be lisaaye lia Aruni.

²⁰Lisaaye liliindi lie kumuliango kwe Balawi be owa Kohati bakabwa chingoba chichiindi khukhwama khu kholo eya Efuraimu.

²¹Bakabwa chingoba chine: Shekemu mu lukoongo lwe bikulu bia Efuraimu (lukoba olwo lwaba lwa omwiiri khumulilamo), Keseri,

²²Kibisaimu, ne Beti-horoni, ne kamaloba kabwe ke kamaayilwe.

²³Khukhwama khu kholo eya Dani bakabwa chingoba chine: Eliteke, Kibetioni,

²⁴Aiyaloni, ne Kati-Rimoni, ne kamaloba ke kamaayilwe kaabwe.

²⁵Khukhwama mu kholo eya Manase eye mumbo, bakabwa chingoba chibili: Taanachi, ne Kati-Rimoni, alala ne kamaloba ke kamaayilwe kabwe.

²⁶Lisaaye lino lie kumuliango kwa Kohati lia nyoola chingoba likhumi chong'ene, alala ne kamaloba ke kamaayilwe kaabwe.

²⁷Sipupu sisiindi sie Balawi kumuliango kwa Kerishoni, sianyoola khukhwama khu kholo eya Manase eye Bukwe chingoba chibili: Kolani mu Bashani (lulala khu ngoba che omwiiri khumulilamo) ne Beeshitera, alala ne kamaloba ke kamaayilwe kabwe.

²⁸Khukhwama mu kholo eya Isakari banyoola chingoba chine: Kishioni, Taberati,

²⁹Yarimuti, ne Enganimu, alala ne kamaloba ke kamaayilwe kabwe.

³⁰Khukhwama mu kholo eya Asheri banyoola chingoba chine: Mishali, Abitoni,

³¹Helikati, ne Rehobu, alala ne kamaloba ke kamaayilwe kabwe.

³²Khukhwama khu kholo eya Nafutali banyoola chingoba chitaru: Kadeshi mu Kalilaya, (Kateshi luli lulala khu ngoba che omwiiri khumulilamo), Hamoti Tori, ne Karitani, alala ne kamaloba ke kamaayilwe kaabwe.

³³Lisaaye liliindi liliaukhaane lie kumuliango kwa Kerishoni lianyoola chingoba choosi likhumi ne chitaru alala ne kamaloba ke kamaayilwe kaabwe.

³⁴Ne Balawi babarama, be kumuliango kwa Merari, banyoola khukhwama khu kholo eya Sebuluni chingoba chine, Yokineamu, Karita,

³⁵Timuna, ne Nahalali, alala ne kamaloba ke kamaayilwe kabwe.

³⁶Khukhwama mu kholo eya Rubeni banyoola chingoba chine: Beseri Yahasi,

³⁷Ketemoti, ne Mefati alala ne kamaloba ke kamaayilwe kaabwe.

³⁸Khukhwama mu kholo eya Kati banyoola chingoba chine: Ramoti mu Kileati, (Ramutohi lwaba lulala khu ngoba cho mwiiri khumulilamo), Mahanaimu,

³⁹Heshiboni, ne Yaseri, alala ne kamaloba ke kamaayilwe kaabwe.

⁴⁰Khwako ekholo eya Merari yakabwa bukali bwe chingoba likhumi ne chibili.

⁴¹Khukhwama mu maloba niko babaandu ba Isiraeli baba nako, kaba bukali bwe chingoba kamakhumi kane,

⁴²alala ne kamaloba ke kamaayilwe khubibotookhelela, kakabwa Balawi.

⁴³Nono Wele Omunyali Owa Bioosi owe Baisiraeli abaa kamaloba koosi niko aba alaka bakuuka baabwe. Ne nga bamala khukaamba, bakamenyamo.

⁴⁴Nio Wele Omunyali Owa Bioosi abaelesia kumuleembe mu mbeka choosi, nga aalaka bakuuka baabwe. Mbao omusiku wabwe akhaba mulala owanyala khubaula tawe sikila Wele Omunyali Owa Bioosi aa Baisiraeli bukhili khu basiku baabwe.

⁴⁵Wele Omunyali Owa Bioosi aakhola koosi niko aasuubisia Isiraeli. Sesiabakhoo siosi siosi silayi nisio aasuubisia mala alekha khusikhola tawe.