Read lubukusu Yosh. 23 Bible Online

Yosh. 23 - lubukusu bible

Yosh. 23

¹Siise sileeyi Wele Omunyali Owa Bioosi ne eleesie Baisiraeli kumuleembe khukhwama khu basiku baabwe ba baabotookhelela. Siise esio, Yoshua aba omukofu lukali.

²Alaanga Baisiraeli boosi: basaakhulu, babemeelesi, bakhalaki ne banamae bakhulu be babaandu mala aloma ali, “Luno luri nabeele omusaakhulu lukali.

³Mwaboone buli siindu nisio Wele Omunyali Owa Bioosi, Wele wenywe akholile khu bibala bino sikila enywe. Wele Omunyali Owa Bioosi, Wele wenywe amupaniile.

⁴Namukabile kamaloba ke bibala bibiarama nga kumukabwa kwe chikholo chenywe. Lundi namueleesie kamaloba ke bibala nibio malile khuula, khukhwama khu luuchi lwa Yoritani, elubeka lwe bukwe, khukhwola khu nyanja eya Mediterenia, elubeka lwe mumbo.

⁵Wele Omunyali Owa Bioosi, Wele wenywe acha khubakobosia enyuma, ne khubatimania khukhwama khwinywe nga ne mucha khubolakho. Mucha khuaamba kamaloba kaabwe, nga Wele Omunyali Owa Bioosi, Wele wenywe ne amusuubisia.

⁶Khwako mube barekerefu ne khuria buli siindu sisiaandikwa mu sitabu sie lilaka lia Musa. Mukhalekelesiakho liosi liosi tawe.

⁷Ne lundi mukhatubaanakho ne babaandu be bibala bibiarama akari wenywe namwe mukhalangakho kamasina ke bawele baabwe namwe khukechuubila mu lilomaloma lienywe, namwe khusaaya bawele abo namwe khubasikamila tawe.

⁸Ne kakhali, mukhoyela mwaria Wele Omunyali Owa Bioosi, nga mwabele khukhwola luno.

⁹Sikila Wele Omunyali Owa Bioosi atimaanie chikholo chingali lundi che kamaani ebweeni wenywe. Mbao yesi yesi owanyalile khu khuupana ne nanywe tawe.

¹⁰ Ne mulala khwinywe anyala akhola babaandu e elefu ndala belukha, sikila Wele Omunyali Owa Bioosi, Wele wenywe niye omupanila, nga nilwo amusuubisia.

¹¹Nono ba barekerefu mukhusiima Wele Omunyali Owa Bioosi, Wele wenywe.

¹²Sikila mwaba ne mukobola enyuma lundi mwaambana ne chikholo echo chisiili akari wenywe, mukhwaane nabo,

¹³mukhoya mumanye muli aba Wele Omunyali Owa Bioosi, Wele wenywe se acha lundi khumutimanisilia chikholo chino chirure ebweeni wenywe tawe. Ne kakhali chicha khuba basiku khwinywe nga kumureko namwe liloo lundi nga buchuuni bwe kumukhomwa khu mukoongo kwowo namwe kamawa mumoni chenywe. Ne kano kakhekholekhe khukhwola nga mubuna mwesi khukhwama mu maloba kamalayi kano niko Wele Omunyali Owa Bioosi, Wele wenywe aamuelesia.

¹⁴“Ne siise siase sie khufwa, siolile. Buli mulala khwinywe amanyile mu mwoyo kwewe omwene ali, Wele Omunyali Owa Bioosi, Wele wenywe amalile khubaa bibiindu bilayi bioosi nibio abasuubisia. Buli lisuubisia nilio aasuubisia, aakhola. Mbao akhaba lilala likholisibwa tawe.

¹⁵Ne nga nilwo akholile bibiindu bilayi bioosi nibio aamulaka, Wele Omunyali Owa Bioosi anyala khurera kamabi koosi khukhwola nga ne amubunia khukhwama mu liloba lilayi lino nilio Wele Omunyali Owa Bioosi, Wele wenywe amuelesia.

¹⁶Mwaba ne mukhaliinda endakaano niyo Wele Omunyali Owa Bioosi, Wele wenywe amulaka khuliinda tawe, lundi mwaba ne mukholela ne khukhwinamila bawele babaandi, mu lirima alimubunia. Ne mbao khwinywe ocha khurama mu maloba kamalayi kano niko aamuelesia tawe.”