Read lubukusu Yosh. 24 Bible Online

Yosh. 24 - lubukusu bible

Yosh. 24

¹Yoshua abuusia alala chikholo choosi cha Isiraeli e Shekemu. Alaanga basaakhulu ne bakasa, babemeelesi, ne banamae Baisiraeli, mala beecha ebweeni wa Wele.

² Yoshua aboolela babaandu boosi ali, “Kano niko Wele Omunyali Owa Bioosi owa Isiraeli aboola, ‘Khaale bakuuka benywe ba baamenyanga lubeka lwe sikelekha sie luluuchi lwa Efurati, ne basaaya bawele babaandi. Mulala khu bakuuka benabo aba Tera, raraawe owa Aburahamu ne Nahori.

³ Nio nabukula Aburahamu, kuuka wenywe, khukhwama mu sibala engelekha we luluuchi lwa Efurati mala namurangirira khukhwola mu sibala sia Kanaani. Namua lisaaye likali. Namua Isaaka,

⁴ ne Isaaka namua Yakobo ne Esau. Naelesia Esau sibala sie sikulu sia Seiri nga kimiaandu kiewe, ne kuuka wenywe Yakobo ne babaana bewe beekha e Misiri.

⁵ Nio naruma Musa ne Aruni, mala nareera butinyu bukali khu Misiri. Enyuma wako namurusia mu Misiri.

⁶ Narusia bakuuka benywe khukhwama e Misiri. Mala Bamisiri ba batimania ne kamakaari ne chifarasi khukhwola khu Nyanja eya Shamu.

⁷Nga balilila Wele Omunyali Owa Bioosi abayeete, arao sisiilima akari wabwe ne Bamisiri. Akhola enyanja yafuuma Bamisiri mala yabeera. Mumanyile niko nakholela Misiri. Mwamenya mu sichiimi siise sileeyi.

⁸ Nio namureera mu sibala sie Baamori, ba baamenya lubeka lwe bukwe owa Yoritani. Baamori bamupania enywe, ne kakhali namua enywe bukhili khubaula. Mwaba bukula kamaloba kaabwe, mala nababunia mumoni chenywe.

⁹ Nio Balaki omwami owe Baamori okhwa Sipori, echa apania Baisiraeli. Arumania elomo khu Balamu okhwa Beori eche amulame enywe.

¹⁰Ne kakhali se nenya mbulile Balamu tawe, khwako amubiita enywe chikhabi, mala mu ngila ng'eneyo nabaonisia khukhwama khu Balaki.

¹¹ Mwambukha Yoritani mweecha e Yeriko. Babaandu be Yeriko ba baapania nga Baamori ne bakhola, Baperisi, Bakanaani, Bahiti, Bakirikashi, Bahibi, ne Bayebusi. Ne kakhali namuelesia enywe bukhili khu boosi.

¹² Nga ne mwachiililila, naruma kamaaraamba katimania babaami babili be Baamori. Chimbalu chenywe ne buyiingo bwenywe mbao sioosi nisio biakhola tawe.

¹³ Nabaa sibala nisio mukhaalimamo ta ne chingoba nicho mukhoombakha tawe. Luno mumenyileyo mala mulikho mulia bibiaamo khukhwama khu misabibu nikio mukhaabiaala tawe, ne kimiseituni khukhwama khu bisaala nibio mukhaabiaala tawe.’ ”

¹⁴“Nono, chiililila khuria Wele Omunyali Owa Bioosi mumukholele ne kumwoyo kwe bung'ali ne busuubilwa. Mwata bawele nibo bakuuka benywe basaayanga ne bali e Mesopotamia ne mu Misiri, mala musaaye Wele Omunyali Owa Bioosi.

¹⁵Nono mwaba ne mukhenya khukholela Wele kimilimo tawe, robora luno niye mucha khukholela, bawele nibo bakuuka benywe bakholelaanga mu Mesopotamia namwe bawele be Baamori, mu sibala nimwo mumenyile luno. Ne kakhali ese ne enju yase, khulakholela Wele Omunyali Owa Bioosi.”

¹⁶Nio babaandu bakobosia Yoshua bali, “Likhuwa lie khulekha Wele Omunyali Owa Bioosi mala khukholeele bawele babaandi likhoya liaba aleeyi ne nafwe!

¹⁷Sikila Wele Omunyali Owa Bioosi Wele wefwe niye owakhurusia efwe ne bakuuka befwe khukhwama mu sibala sia Misiri, khukhwama munju eye bunasioobi e Misiri ne efwe khwabona kamaya kamaboofu niko aakhola. Aakhuliinda buli abuundu niio khwachichanga, ne mu baandu boosi nimwo khwabiraangamo.

¹⁸Nga khweecha mu sibala sino, Wele Omunyali Owa Bioosi aatimania ebweeni wefwe Baamori boosi ba baamenyanga mu sibala sino. Nono efwe fweesi khucha khukholela Wele Omunyali Owa Bioosi, sikila ali Wele wefwe.”

¹⁹Ne kakhali Yoshua aboolela babaandu ali, “Se munyala mwakholela Wele Omunyali Owa Bioosi tawe, sikila ali Wele omutakatifu. Ali Wele owe likhendekha, se akhamubeele bumayaanu bwenywe namwe kamakhiikha kenywe tawe.

²⁰Ne mulekha Wele Omunyali Owa Bioosi mala mwakholela bawele Be Chikholo chichiindi, acha khumuukuuma ne khumua butinyu. Acha khumumila, akhaba ne aaba omulayi khwinywe e khunyoa.”

²¹Babaandu baboolela Yoshua bali, “Tawe! Khulakholela Wele Omunyali Owa Bioosi.”

²²Nio Yoshua aboolela babaandu ali, “Enywe muli baloli mwabeene muli mwaroboore Wele Omunyali Owa Bioosi, mumukholela?” Baloma bali, “Ee, khuli baloli.”

²³Nio Yoshua aloma ali, “Nono khe mulekhane ne bawele be chikholo chichiindi baali mwinywe, mala mure kimiooyo kienywe khu Wele Omunyali Owa Bioosi, Wele owa Isiraeli.”

²⁴Nio babaandu baboolela Yoshua bali, “khucha khukholela Wele Omunyali Owa Bioosi, Wele wefwe. Ne kumumilo kwewe khucha khukuria.”

²⁵Nio Yoshua akhola endakaano ne babaandu endaalo ng'eneyo, abakholela kamalaka e Shekemu bweneyo.

²⁶Mala Yoshua aandika kamakhuwa kano mu sitabu sie Lilaka sia Wele. Abukula libaale liboofu mala alira asi we kumukhoonge abuundu e khusaayilao Wele Omunyali Owa Bioosi.

²⁷Mala Yoshua aboolela babaandu boosi ali, “Libaale lino licha khuba buloli khwifwe. Liauliile kamakhuwa koosi niko Wele Omunyali Owa Bioosi akhuboleele efwe. Nono licha khuba buloli khwinywe, nio mukhakhola murio mwakhola bubeeyi khu Wele wenywe tawe.”

²⁸Nio Yoshua alekhuula babaandu bacha, buli mulala mu mukabwa kwewe.

²⁹Enyuma wako, Yoshua okhwa Nuni, omukholi owa Wele Omunyali Owa Bioosi afwa ne ali ne bukhulu bwe kimiiko emia ndala ne likhumi.

³⁰ Bamusiikha mumukabwa kwewe a Timunati-Sera eli mu sibala sie bikulu sia Efuraimu ebunaswa we sikulu sia Kaasi.

³¹Baisiraeli bakholeela Wele Omunyali Owa Bioosi biise bioosi nibio Yoshua aba omulamu. Akhaba enyuma we lifwa liewe, bachiililila khukhola bario nga babemeelesi bababona niko Wele Omunyali Owa Bioosi aakholela Isiraeli baba ne basiili balamu.

³² Kamakuumba ka Yosefu niko Baisiraeli basuta khukhwama e Misiri, kasiikhwa e Shekemu, mu sitonyi sie kumukuunda nikwo Yakobo akula khukhwama khu ba okhwa Hamori (Hamori aaba raraawe owa Shekemu.) Yakobo akula kumukuunda okwo khu bukusi bwe bitonyi bie efwesa emia ndala. Kumukuunda kuno kwekela kumukabwa kwe lisaaye lia Yosefu.

³³Eliesa okhwa Aruni afwa mala asiikhwa e Kibea, lukoba luuli mu sibala sie sikulu sia Efuraimu sisiakabwa khu mwana wewe Fineasi.