Read lubukusu Yosh. 3 Bible Online

Yosh. 3 - lubukusu bible

Yosh. 3

¹Bwasia kumutikhinyi Yoshua ne babaandu boosi ba Isiraeli benyokha makhelebeende barura mu kambi e Sitimu, mala bacha e Yoritani, niio bapayo e kambi ne basiliindiilila khukhwambukha.

²Enyuma we chindaalo chitaru babemeelesi bacha mu kambi,

³mala baboolela babaandu bali, “Ne mubona basaayi Balawi ne basutile lisanduku lie ndakaano eya Wele Omunyali Owa Bioosi, Wele wenywe, yinyokha mala muliloondekho.

⁴Bacha khubeekesia engila niyo muchilakho sikila mukhabaakho ano tawe. Ne mukhesenda embi ne Lisanduku lie ndakaano tawe. Mukhoya mube enyuma ambi bikele chielefu chibili.”

⁵Yoshua aboolela babaandu ali, “Mwikwalaasie mwabeene, sikila kumutikhinyi Wele Omunyali Owa Bioosi akhakhole kamayia mwinywe.”

⁶Nio aboolela basaayi babukule Lisanduku lie ndakaano mala barangire ne nalio ebweeni we babaandu. Bakhola nga ne aaloma.

⁷Wele Omunyali Owa Bioosi aboolela Yoshua ali, “Endaalo yino ndarakikha khukhukhola obe omukali ebweeni we babaandu Baisiraeli boosi, nio bamanye bali Ese ndaba nawe nga ne naba ne Musa.

⁸Ne olilaka basaayi basute Lisanduku lie ndakaano. Ne boola khu sikiingi sie luluuchi, bengile mu meechi mala beme.”

⁹Nio Yoshua aboolela babaandu ali, “Khe mwisende siimbi murekeeresie kamakhuwa ka Wele Omunyali Owa Bioosi, Wele wenywe.

¹⁰Nga ne muchiililila, mu bung'ali, Wele acha khutimania Bakanaani, Bahiti, Bahibi, Baperisi, Bakirikashi, Baamori ne Bayebusi. Mucha khumanya muli Wele omenyile mindali ali ne nanywe.

¹¹Lisanduku lie ndakaano eya Wele Omunyali Owa Bioosi owe liloba lioosi licha khwaambukha Yoritani ebweeni wenywe.

¹²Nono robora babaandu be siseecha likhumi ne babili, mulala khukhwama mu buli ekholo eya Isiraeli.

¹³Basaayi bakhasute Lisanduku lie ndakaano ya Wele Omunyali Owa Bioosi, Wele Omunyali Owa Bioosi owe liloba lioosi. Nga bakhaswale bikele biabwe mu meechi ka Yoritani busa bari, kameechi kakhemikhwe khukhwiikha. Ne kameechi kakaama lwe engaaki kaliima nga siikulu alala.”

¹⁴Nio babaandu barekukha khukhwama mu maeema kabwe khukhwaambukha luluuchi lwa Yoritani ne barangiriirwe ne Basaayi.

¹⁵Basaayi nga boola khu Yoritani ne basutile lisanduku lie ndakaano eya Wele, baswala mu meechi. (Luluuchi lwa Yoritani lwichuulanga ne lubira bikiingi bialwo mu biise bioosi bie likesa.)

¹⁶Kameechi kaakama khukhwiikha mala keema. Luluuchi lwakama engaaki a lukoba lwa Adamu, lukoba luuli ambi ne Saretani. Kameechi kakeekha mu nyanja eya chumbe kekhela elala, ne babaandu bambukhila embi e Yeriko.

¹⁷Nga Baisiraeli baaba ne balikho baambukha, basaayi ba baaba ne basutile Lisanduku lie ndakaano bema abuundu abalakafu akari we luluuchi lwa Yoritani khukhwola nga babaandu boosi ne bambukha.