Read lubukusu Yosh. 4 Bible Online

Yosh. 4 - lubukusu bible

Yosh. 4

¹Nga babaandu boosi ne bamala khukhwambukha Yoritani, Wele Omunyali Owa Bioosi alomaloma ne Yoshua.

²Amuboolela ali, “Robora babaandu be siseecha likhumi na babili, mulala khukhwama mu buli ekholo.

³Balake babukule kamabaale likhumi na kabili khukhwama akari we luluuchi lwa Yoritani, abuundu abwene niio basaayi bemaanga. Baboolele basute kamabaale kano ne khukara asi niio mulakona siilo sia luno.”

⁴Nio Yoshua alanga babaandu be siseecha likhumi ne babili nibo arobora khukhwama mu baandu ba Isiraeli, mulala khukhwama mu buli ekholo.

⁵Ababoolela ali, “Khe muche mu luuchi lwa Yoritani ebweeni we Lisanduku lie ndakaano eya Wele Omunyali Owa Bioosi, Wele wenywe. Buli mulala khwinywe asute libaale lilala khwibeka liewe. Buli lilala lilaba mu bweyaangu bwe ekholo eya Isiraeli.

⁶Kamabaale kano kacha khuba simanyisio mwinywe. Mu biise bibiicha, babaana benywe ne balireeba sifuno sie kamabaale kano.

⁷Mulibaboolela muli, ‘Kameechi ka Yoritani keema khukhwiikha nga Lisanduku lie ndakaano eya Wele Omunyali Owa Bioosi ne liambusibwa luluuchi!’ Kamabaale kano kacha khuba likhebusia khu baandu ba Isiraeli mindali na mindali.”

⁸Babaandu ba Isiraeli baloonda kamalaka ka Yoshua. Nga Wele Omunyali Owa Bioosi ne alaka Yoshua, babukula kamabaale ekhumi ne kabili khukhwama akari we luluuchi lwa Yoritani, khuloondekhana ne chikholo cha Isiraeli. Bakasuta khukhwola abuundu we khukona, mala bakaruura asi ebweeneyo.

⁹Yoshua yesi emia kamabaale ekhumi ne kabili akari we luluuchi lwa Yoritani, niio basaayi babasuta lisanduku lie endakaano beema. (Kamabaale kano kaliio khukhwola luno.)

¹⁰Basaayi beema akari we luluuchi lwa Yoritani khukhwola nga buli sisiindu nisio Wele Omunyali Owa Bioosi alaka Yoshua khuboolela babaandu siekholekha. Kano koosi kakholekha nga Musa ne alaka Yoshua. Babaandu bambukha bwangu.

¹¹Ne bamalile khukhwaambukha, basaayi ne lisanduku lie endakaano eya Wele Omunyali Owa Bioosi babira ebweeni we babaandu.

¹²Babaandu Be Chikholo cha Rubeni ne Kati ne balala khu kholo eya Manase, babira ebweeni we Baisiraeli ne bakangile bulwaani nga Musa ne abalaka.

¹³Babaandu embi chielefu kamakhumi kane baberekekhera liie bambukha ebweeni wa Wele Omunyali Owa Bioosi khu siangalaamwe sia Yeriko.

¹⁴Khu ndaalo eyo, Wele Omunyali Owa Bioosi akaalia Yoshua ebweeni we Baisiraeli boosi mala baelesia Yoshua liria, mu bulamu bwewe bwoosi nga baba ne baria Musa.

¹⁵Nio Wele Omunyali Owa Bioosi aboolela Yoshua ali,

¹⁶“Laka basaayi basutile Lisanduku lie ndakaano barure mu Yoritani.”

¹⁷Nio Yoshua alaka basaayi ali, “Rura mu luuchi.”

¹⁸Nga basaayi ne barura mu luuchi lwa Yoritani bikele biabwe biola khu sikiingi sisioomu, kameechi karakikha khukhwiikha mala kechusia bikiingi bialwo lundi.

¹⁹Babaandu barura mu luuchi lwa Yoritani mu ndaalo eye likhumi mu mwesi kunyoa mala baapa ekambi e Kilikali, ebukwe owa Yeriko.

²⁰Yoshua emia e Kilikali kamabaale likhumi, na kabili niko babukula khukhwama mu luuchi lwa Yoritani.

²¹Aboolela babaandu ba Isiraeli ali, “Mu biise bibiicha, babaana benywe ne balimureeba sifuno sie kamabaale kano,

²²mulibaboolela muli, ‘Biise ebio Baisiraeli bambukha Yoritani asi abalakafu.’

²³Mukhababoolele muli, Wele Omunyali Owa Bioosi, Wele wenywe oomia kameechi ka Yoritani sikila enywe khukhwola nga ne mwambukha, bulayi bwene nga ne oomia Enyanja eya Shamu nio efwe fweesi khwambukha.

²⁴Sikila kano, babaandu boosi be mu sibala balimanya bali Wele Omunyali Owa Bioosi ali owe kamaani. Nio murie Wele Omunyali Owa Bioosi, Wele wenywe mindali na mindali.”