Read lubukusu Yosh. 5 Bible Online

Yosh. 5 - lubukusu bible

Yosh. 5

¹Babaami be Baamori boosi be mumbo mwa Yoritani, ne babaami be Bakanaani boosi sia nyanja eya Mediterenia baulila bali Wele Omunyali Owa Bioosi omisie Yoritani khukhwola nga babaandu ba Isiraeli ne bambukha. Sikila kano, babaami abo baria ne khuyengukha kimiooyo.

²Mu siise esio Wele Omunyali Owa Bioosi aboolela Yoshua ali, “Khola kimibano kie kamabaale mala okhebe Baisiraeli sisiingilo sikhola khabili.”

³Nono Yoshua akhola kimibano kie kamabaale mala aakhebela Baisiraeli a Kibea-haaraloti.

⁴Ne sino nisio sifuno sisiakila Yoshua abakheba: babaandu be siseecha boosi babaama Misiri, babaandu be siseecha boosi banamae, bafwila khu ngila mu sichiimi, enyuma we khurura e Misiri.

⁵Akhaba babaandu boosi ba baarura e Misiri ne baba ne bakhebwa, babasaalwa khu ngila mu sichiimi baba basiinde.

⁶ Baisiraeli bakeenda mu sichiimi khu miiko kamakhumi kane. Mu biise ebio, babaandu boosi be liie bafwa sikila se baria Wele tawe. Nio Wele Omunyali Owa Bioosi echuba ali se balibona sibala nisio kamabeele ne bubuukhi biseleetekhanga nisio alaka ali alielesia bakuuka babwe tawe.

⁷Babaana be babaandu bano bali nibo Yoshua akheba sikila se bakhebwa ne bali khu lukeendo tawe.

⁸Enyuma we khumala siikhebo, ekholo yoosi yarama mu kambi khukhwola nga baona.

⁹Wele Omunyali Owa Bioosi aboolela Yoshua ali, “Luno namurusiisiekho chisoni che khuuba ba nasioobi mu Misiri.” Elio liliakila abuundu ne alaangwa Kilikali[2] khukhwola luno.

¹⁰ Baisiraeli ne basiili mu kambi e Kilikali, mu keewa eya Yeriko, bakhola kumulukha kwe e Pasaka, ekolooba we endaalo ekhola likhumi na chine eye kumwesi.

¹¹Endaalo ekhola khabili yaba eye bweeni khu nibo khulia biakhulia bie mu Kanaani, balia biakhulia bibiosie ne kumukaati kukhalimo limela tawe. Yaba endaalo eloondela eye pasaka.

¹² Endaalo eloondakho biakhulia bia mana biakama khukwa, mala Baisiraeli khubaakho lundi ne nabio tawe. Khukhwama mu siise esio khuchiililila, balia biakhulia bimiichwa mu Kanaani.

¹³Yoshua ne ali embi Yeriko, abona omundu emile ebweeni wewe, atiilile embalu. Yoshua acha niio ali mala amureeba ali, “Ewe oli mulala khu banamae befwe, namwe oli owe basiku?”

¹⁴Omundu oyo akobosia ali, “Khaba tawe, endi ano nga komanda owe banamae ba Wele Omunyali Owa Bioosi.” Yoshua akwa asi khwiloba mala asaaya, aloma ali, “Wenya ese omukholi wowo khole siina Omwami?”

¹⁵Omwimeelesi owe banamae ba Wele Omunyali Owa Bioosi amuboolela ali, “Fuula biraaro biowo, sikila wemile Abuundu Atakatifu.” Mala Yoshua akhola ario.