Read lubukusu Yosh. 6 Bible Online

Yosh. 6 - lubukusu bible

Yosh. 6

¹Nono bilibwa bie lukoba lwa Yeriko biekalwa lundi bialiindwa khukhiingilila Baisiraeli. Mbao yesi yesi owengila namwe owarura khukhwama mu Yeriko tawe.

²Wele Omunyali Owa Bioosi aboolela Yoshua ali, “Ndikho nda lukoba lwa Yeriko mu makhono kowo, ne Babaami balwo, ne banamae balwo boosi.

³Ewe ne banamae bowo mucha khukeenda ne mulubotookhelela lulala buli ndaalo, khu chindaalo sita.

⁴Basaayi saba, buli mulala asute ekhoombi eye lulwiika lwe limiiku, barangire ebweeni we Lisanduku lie ndakaano. Ewe ne banamae bowo mu ndaalo eya saba mucha khukeenda mubotookhelele lukoba olwo khukhwola saba ne Basaayi nende balikho baapa chikhoombi.

⁵Bakhape ekhoombi ne kamaani. Ne nga mukhaulile ekhoombi, babaandu boosi bakhoya bayokele lukali. Kamasiisi ke lukoba kakhakwe asi. Nio babaandu boosi bengile mukari buli mundu khukhwama niio ali balwibwaakale.”

⁶Nio Yoshua omwana owa Nuni alaanga basaayi mala ababoolela ali, “Bukula Lisanduku lie ndakaano, mala basaayi saba barangire ebweeni walio, ne basutile chikhoombi.”

⁷Mala alaka babaandu bewe khurakikha khukeenda khubotookhelela lukoba. Banamae baba ebweeni we lisanduku lie ndakaano eya Wele Omunyali Owa Bioosi.

⁸Nga Yoshua ne alaka babaandu, basaayi saba barangira ne baapa chikhoombi. Enyuma wabo, Lisanduku lie ndakaano eya Wele Omunyali Owa Bioosi liabaloondakho.

⁹Banamae ba baaba ne bakangile bulwaani bacha ebweeni we basaayi babaapanga chikhoombi. Ne Banamae be enyuma baloonda khu Lisanduku lie ndakaano. Chikhoombi chapa ne chichiililila.

¹⁰Ne kakhali Yoshua aba alakile babaandu bewe ali bakhayokela namwe balomakho likhuwa liosi liosi tawe khukhwola nga ne arusia lilaka.

¹¹Nio babotookhelela lukoba lulala ne basutile Lisanduku lie ndakaano eya Wele Omunyali Owa Bioosi mala becha bengila mu kambi bakonamo siilo esio.

¹²Yoshua enyokha makhelebeende endaalo eloondakho mala basaayi basuta Lisanduku lie ndakaano eya Wele Omunyali Owa Bioosi.

¹³Basaayi saba basutile chikhoombi saba barangira ebweeni we Lisanduku lie ndakaano, ne balikho baapa chikhoombi. Banamae bakangiile bulwaani bacha ebweeni wabwe. Ne banamae be enyuma baloonda khu lisaanduku lie ndakaano. Ne chikhoombi chapwa buchiililila.

¹⁴Mu ndaalo ekhola khabili bakeenda lundi babotookhelela lukoba khukhwola lulala mala bakobola mu kambi. Bakhola bario khu ndaalo sita.

¹⁵Khu ndaalo ekhola saba benyokha makhelebeende mala babotookhelela lukoba bario khukhwola saba. Endaalo yino yong'ene niyo babotookhelela khukhwola saba.

¹⁶Lukhola saba, basaayi ne bamalile khu khuupa chikhoombi, Yoshua aboolela babaandu ali, “Yokela, sikila Wele Omunyali Owa Bioosi amueele lukoba luno!

¹⁷Lukoba nende buli sisiindu silulimo bikhoya bionakwe bioosi nga siianwa khu Wele Omunyali Owa Bioosi. Ne kakhali omueeyi Rahabu nende be munju yewe balekhwe, sikila akisa bayooti befwe nibo khwaruma.

¹⁸Mukhabukulakho sisiindu siosi siosi siikhoyeele sionakibwe nga siianwa khu Wele Omunyali Owa Bioosi tawe. Mwakhola murio mucha khurera bubwonaki mu kambi eya Isiraeli mala mukhureerere butinyu.

¹⁹Ne efwesa ne esahabu ne bibiindu bibiakholwa khukhwama khu mikasa ne bichuuma bili bia Wele Omunyali Owa Bioosi. Bikhoya biabiikhwa mu libiikhilo lia Wele Omunyali Owa Bioosi.”

²⁰ Nio basaayi baapa chikhoombi. Nga babaandu ne baulila busa bari, bayokela lukali, mala kamasiisi katechukha. Babaandu boosi bacha mu lukoba buli mundu khukhwama niio ali balwibwaakala baluamba.

²¹Beera buli mundu mu lukoba ne mbalu; be siseecha nende be siikhasi, baele ne basaakhulu. Beera akhaba chikhaafu, kamakheese ne chipunda.

²²Nio Yoshua aboolela babaandu babili babayoota sibala esio ali, “Khe muche munju mwo omueeyi oyo mala mumurusie enje ne babaandu bewe, nga ne mwamwechubila.”

²³Nio babaandu babili abo bacha mala barusia enje Rahabu, raraawe ne maawe, bawandaaye ne babaandi nibo amenyanga nabo. Bababukula boosi, balebe ne banasioobi, babayila enje mu kambi eye Baisiraeli.

²⁴Nio baambia kumulilo lukoba lwaya lwakwa, alala ne buli siindu sisiabamo. Ne kakhali babukula efwesa, esahabu ne bibiindu bibiakholwa khukhwama khu mikasa ne bichuuma, babibukula mala babira mwibiikhilo lia Wele Omunyali Owa Bioosi.

²⁵ Yoshua aonia bulamu bwo omueeyi Rahabu, ne balebe bewe boosi, sikila Rahabu akisa bayooti babili nibo Yoshua aruma khuyoota Yeriko. (Lisaaye lia Rahabu limenyile mu Isiraeli khukhwola luno.)

²⁶ Mu biise ebio Yoshua arusia liliechuba ali, “Yesi yesi okhakakho khukhwombakha lundi lukoba lwa Yeriko, acha khuba asi we silaamo sia Wele Omunyali Owa Bioosi. Yesi yesi orakikha khukhwombakha kamasiisi, acha khufwiisia omwana wewe omubele, Yesi yesi owombakha bilibwa, acha khufwiisia omwana wewe omutua.”

²⁷Nono Wele Omunyali Owa Bioosi aaba ne Yoshua, ne efuma eya Yoshua yaba mu sibala sioosi.