Read lubukusu Yosh. 7 Bible Online

Yosh. 7 - lubukusu bible

Yosh. 7

¹Baisiraeli se baria lilaka lia Wele Omunyali Owa Bioosi lie khubakaania khubukulakho sisiindu siosi siosi sisienyekhana sionakwe khukhwama e Yeriko tawe. Akani okhwa Karimi, omwichukhulu owa Sabuti okhwa Sera, owe ekholo eya Yuda aabukula bilala khu biindu bibiaanwa khu Wele Omunyali Owa Bioosi, mala liakila Wele Omunyali Owa Bioosi akhalalila Baisiraeli.

²Yoshua aaruma babaandu khukhwama Yeriko khucha Ai, lukoba luli e bukwe owa Beteli, embi ne Beta-beni. Abaruma khucha khukhola buyooti mu sibala esio. Nga ne bacha bakhola bario,

³bakobola baboolela Yoshua bali, “Mbao sifuno sikila babaandu boosi bebwaakale Ai tawe. Ruma ambi babaandu chielefu chibili namwe chielefu chitaru bong'ene. Okharuma banamae boosi ebweeneyo khu khuupana tawe, sikila babaandu baliyo bali batiiti lukali.”

⁴Khwako ambi Baisiraeli chielefu chitaru bacha bebwaakala Ai, mala babaandu ba Ai babatimania.

⁵Babaandu ba Ai batimania Baisiraeli khukhwama musilibwa sie lukoba khukhwola Shebarimu. Beera Baisiraeli ambi kamakhumi kataru na sita khungila eyiikha mumaayo mwe sikulu. Nio Baisiraeli bayengukha kimiooyo lundi baba ne buuri.

⁶Yoshua ne babemeelesi ba Isiraeli batabulaka chingubo chabwe, bakwa asi ebweeni we Lisanduku lie ndakaano eya Wele Omunyali Owa Bioosi, mala bakona ao khukhwola ekolooba. Bachukha lufuumbi khu mirwe kiabwe.

⁷Mala Yoshua aloma ali, “Ee Omwami WELE, sina sikila ne wakhwambusia Yoritani wakhura mu makhono ke Baamori bakhubunie efwe? Siina sikila ne okhakhulekha khwamenya engelekha owa Yoritani?

⁸Ee Wele Omunyali Owa Bioosi, ndoma ndi siina, ne bona Isiraeli yelukhe khukhwama khu basiku?

⁹Bakanaani ne babaandu babaandi be mu sibala muno bakhauliile kano. Bakhakhubotookhelele mala bakhwire efwe buli sia mulala! Olakhola oriena khuliinda lisina liowo liboofu?”

¹⁰Wele Omunyali Owa Bioosi aboolela Yoshua ali, “Yinyokha! Siina sikila ne okona asi ori?

¹¹Isiraeli yakholile bubwoni! Bafunake endakaano ne nase niyo nabalaka khuliinda. Baabukuule bibiindu bilala bibiakhalakilwa khukhwonakwa. Babiiba, mala babea. Babitubania alala ne bibiindu biabwe.

¹²Sino nisio sikila Baisiraeli ne bakhanyala khuula basiku babwe tawe. Baulilwe sikila babeene bakhalakiilwe khukhwonakwa. Se nja khuba nanywe lundi ne mukhonaake bibiindu nibio mwakaambilwa khulekha khubukula tawe!

¹³Cha okwalaasie babaandu kimiooyo mala berekekhe khukhwicha ebweeni wase. Baboolele berekekhe kumutikhinyi. Ese, Wele Omunyali Owa Bioosi owa Isiraeli, ndoma ndi, ‘Isiraeli, mu biindu bienywe bilimo bibiindu bibiaanwa khu Wele Omunyali Owa Bioosi bionakibwe. Se munyala mwaula basiku benywe ne mukhenyosiemo bibiindu bino tawe!’

¹⁴Nono baboolele oli, kumutikhinyi bakhareerwe ebweeni, buli ekholo sia ndala. Ekholo niyo mbukula niyo echa khwicha ebweeni, luuya sia lulala, luuya nilwo mbukula lucha khwicha ebweeni, enju sia ndala. Enju niyo mbukula echa khwicha ebweeni, omundu sia mulala.

¹⁵Omundu ocha khubukulwa mala anyoolekhane khuuba ne bibiindu biianwa khu Wele Omunyali Owa Bioosi bibienyekhana bionakwe aliosibwa, alala ne enju yewe ne buli siosi nisio ali ne nasio, sikila akholile sisiindu sie chisoni mu Isiraeli lundi afunaake endakaano yase.”

¹⁶Nio Yoshua enyokha kumutikhinyi makhelebeende ayila Baisiraeli ebweeni, ekholo sia ndala, mala ekholo eya Yuda yabukulwa.

¹⁷Areera ekholo eya Yuda ebweeni, luuya sia lulala, luuya lwa Sera lwabukulwa. Nio abukulamo luuya lwa Sera, enju sia ndala, ne enju eya Sabuti yabukulwa.

¹⁸Nio abukula enju eya Sabuti, omundu sia mulala. Akani, omwana owa Karimi, omwichukhulu owa Sabuti, abukulwa.

¹⁹Nio Yoshua amuboolela ali, “Mwana wase, boola bung'ali mala wiyame ebweeni wa Wele Omunyali Owa Bioosi, Wele owa Isiraeli. Mboolele luno niko okholile. Okhakhakakho wangisa tawe.”

²⁰Akani akobosia Yoshua ali, “Buli bung'ali, nakholile bubwoni khu Wele Omunyali Owa Bioosi, Wele owa Isiraeli. Ne kano niko nakholile:

²¹Mu biindu nibio khwaamba nabonamo engubo endayi eya Sinari, ambi bitonyi chimia chibili bie efwesa, ne bitonyi bie esahabu kamakhumi karaano. Nabiekoomba lukali nio nabibukula. Nabikisa asi mwiloba mu liiema liase, ne efwesa eli asi wabio.”

²²Nio Yoshua aruma babaandu batima bacha niio liiema lili mala banyoola bali ng'ali bibiindu chana ebio biaba biasiikhwa mwieema, mala efwesa yaba asi.

²³Babirusia enje we liiema babiyila khu Yoshua ne khu Baisiraeli boosi. Babira asi ebweeni wa Wele Omunyali Owa Bioosi.

²⁴Yoshua alala ne babaandu boosi ba Isiraeli, babukula Akani, ne efwesa, ne engubo eya Shaniri ne sibia sie esahabu, alala ne babaana bewe basoleeli ne bakhaana, chikhaafu chewe, chipunda, kamakheese, liiema liewe, nende buli siindu siosi nisio aaba nasio, mala babayila mwitooma lia Akori.

²⁵Yoshua aloma ali, “Siina sikila ne wareerire butinyu khwifwe? Luno Wele Omunyali Owa Bioosi acha khureera butinyu khwiwe!” Nio Baisiraeli boosi barakikha khu khuupa Akani kamabaale, bamwiira. Lundi baapa kamabaale ne khukhwosia lisaaye liewe ne kimiaandu kiewe.

²⁶Bamubungikhakho situumi sikali sie kamabaale. Situumi sino sisiliio khukhwola luno. Sino nisio sikila abuundu ao ne asilaangwa ali Litooma lia Akori. Nio Wele Omunyali Owa Bioosi akama khuba ne lirima.